¹ A ĩ bĩniɛ le ĩ lon a ĩ man wiɛ donso na dĩn le hãani na mu yamu ɲumu yi. A ɲuna lee buo heɲun, a wãa lee buo piru. Hã wãa mu mi buo piru zĩiniɛ le mu bazamu ƙãnlue zaɓa. Hã ɲuna mu a ɓa tɔ̃nna hã yennaa wan a la le le Donbeeni. ² A wiɛ mu ka le ũ mɛnɛmuindaa. A ninƙonna ka le ũ ɓuƙa ninƙonna, a ɲii ka le ũ kuden ɲii. A a wiɛ wabeeni a nan ũ panka mansii a yi, a nan mi bazamu mansii a yi. ³ A yiɛ mu ɲuhũ dakeni ka le ɓa ha ha ho a a la a hi. Ɛɛ ka ho mahã bĩniɛ wan. Bii mu wo kɛ a ho dĩmiɲa nipomu ɓuenɓuen wo coon mu buo yi, a ɓa ta a wiɛ mu buo. ⁴ A ɓa lee ɓuaani a wiɛ wabeeni lebii a a nan ũ panka mansii a yi. Ɓa mun lee ɓuaani a wiɛ mu ka ɓa a bii: «yiɛ a a tee le a wiɛ mu won miɛ. Yiɛ da a miɛ». ⁵ A yu le nii a a lee yaa ũ ɲii yi ka a la le Donbeeni. Bũn man wero nii nan a yi hã pĩina ɓuaraɲun naa buo ɲun yi. ⁶ A a lee bii hã binkora liɛ le Donbeeni yi ka a la le yeni, naa hen na le wi yi, naa biɛ wi le waani. ⁷ A yu le nii a a fi naa biɛ buo sã le Donbeeni yi a dan ɓa. A yu ho panka ho dĩmiɲa kãna niviɛ le ũ siiɓa ɓuenɓuen wan, hari ɓa kɛn laho le laho, hari ɓa bii biini le biini. ⁸ Ho dĩmiɲa niviɛ ɓuenɓuen a a ɓuaani a. Ban na yennaa yi tɔ̃nna hari ho dĩmiɲa ɲuhũ ɓuɛɛnii biɛ yu le mukɛ̃ni binbiri yennaa vãahũ yi, hiɛ a a Piiza na ɓa ɓo to, le ban a a ɓuaani a. ⁹ Yiɛ lee ɲi buo, a manso ɲi bii a bii : ¹⁰ yiɛ ho kaso zoro sã yi, won a zo ho. A yiɛ ho ƙatoni humu sã yi, won ɓa a ɓue naa ho. Lebũn a biɛ buo sã le Donbeeni yi ko ɓa hĩn mi tĩɛ yi, a wiika de mi tĩɛ le Donbeeni yi. ¹¹ A ĩ bĩniɛ le ĩ lon a ĩ tĩn man wiɛ donso a a lii lo ho ta yi. A wãa le mu buo ɲun a ka le ũ Piiza wãa. Ka a mahã lee bii le a wiɛ wabeeni buosii. ¹² A ninyiɛni wiɛ panka mansii a a yu bona a ni a a we sa a yaho. A lee kĩkã ho dĩmiɲa niviɛ ɓuenɓuen yi a ɓa ɓuaani a ninyiɛni wiɛ na ɓa ha a a la a hi ka a mahã bĩniɛ wan. ¹³ A lee we mu yereke bobeera. A yiɛ lee we a ho dɔ̃hũ le le waani lii a ɓa niviɛ ɓuenɓuen mi. ¹⁴ A lee vĩini ho dĩmiɲa niviɛ lebii a a yu le nii a weraa bũn yereke buoɓa so a wiɛ na lo mu yamu ɲumu yi yaho. A lee bii le a wiɛ na ɓa ha le ho ƙatoni a yi hurũn, a ɓa mi man kansi a deraa ho cuku wo yi. ¹⁵ A yu ho panka a a de le mukɛ̃ni a kansi mu yi a a we dan bii, a a mun dan ɓue biɛ ɓuenɓuen na le ũ man ɓuaani a kansi mu. ¹⁶ Biɛ buo ɲuhũ wi naa biɛ buo ɲuhũ miɛ, ho naforo mansua wa le ɓa niƙeniɛ, ɓa niviɛ na wi miten le ɓa wobaani, ban ɓuenɓuen a a wiɛ mu lee kĩkã yi a ɓa be le wĩini mi nintĩɛni nini wan taa mi ɓuraa wan. ¹⁷ Ka le wĩini mu miɛ nive wan, a manso yi da buo man ya, a a mun yi da buo man yiɛ. Le wĩini mu le a ninyiɛni wiɛ yeni, taa ho milo ɲii na man le le yeni mu. ¹⁸ Ɓa niviɛ ko ɓa le ũ yiɓa hen sese : yiɛ zũ mu buo, a manso da a zũn a wiɛ mu yeni milo ɲii man kuara. Mu lee zeeni a nive buo. Hã ɲii lee 666.