1
WE ra to ne min mi kasora mgɔ ye matgi ra, ne aa biɛ dare ko aa krila krili min na, aa tgɔnma tgo la bɛn wo ma,
2
ni yɛɛmandginiya ni sabari ani munɲuni biɛ ye.
3
Aa ngɔn ka kwow munɲu ni kanuya we. A' aa jeja ka Ɲi senuma ka kelenya mra hɛrɛ srinan la.
4
Piikoo keen min Ɲin , ani Ɲin senuman keen , e ko Yaa masa laa kri dgiya keen kamaa tgo min naa .
5
Mantgi din keen ne min Ɲin , ani danaya keen , ni batiseli keen .
6
Yaa Masa din keen ne min Ɲin , aan biɛ fa ro , a min fɛn biɛ kun nan , biɛ shɛman , biɛ kɔɔna.
7
Nɛɛman jira aan biɛ ken ken man ka kanɲan ni krista ka ɲinnin shɔnni kundama we.
8
We ra to a fwɔ ko : A yɛɛra yaaman minkɛ, a taa ni mgɔ mnanni shaanma ye . Ee ɲinnifɛn ji mgɔw maa .
9
K' a fwɔ ko a yɛɛra yaama, wo mi mɔn ye ni ɲin tɛ , ko a tin dgira ka dun dgukoo jukɔɔ jaw ra?
10
Min dgira ani min yɛɛra sankoo jaw biɛ yaama , yaako a ra fɛn biɛ pa, wo mi keen nee .
11
Ee mgɔw jɔɔ jii , jɔɔ ra kɛ cedinw ye, jɔɔ ra kɛ ceraw ye, jɔɔ ra kɛ kibaro junman fwɔbgaw ye , jɔɔ ra kɛ sga ngɛnnanw ni kaamgɔw ye ,
12
yaako Yaa masa ka mgɔ senunmanw la labɛn Yaa masa ka koma baara kaman , ka to ka jɔ fra krista piikoo kan ,
13
fwɔ aan biɛ ra kɛ kee ye danaya ni Yaa masa dincɛ dɔniya ra , ka kɛ mgɔ mwɔnniw ye , fwɔ ka she krista ka dapaniya jɔ kun dama ma ,
14
Yaako aan kaa to dɛɛnsɛnya ra kun. An kaa dgudgu ka ɲɔntin ka ta yan fɛ ani ka ta yan fɛ kran shifaya biɛ fiyɛn fɛ mgɔw ka nanbaa ni aa ka mgɔ lafrili cekuya tgo junniw ra .
15
Nga aan shɛn fwɔ ni kanuya we , ka mwɔn fɛ biɛ ra krista ra , wo mi piikoo kunkoo we .
16
Piikoo biɛ labɛnni mi we ra , a jaw biɛ ngɔn mnan kootgu jaw baaka ra ka kanɲan ni aa biɛ keen keen ka baara kɛ tgo we . Wo tgo ra e ren jidi ka jɔ fra a yɛɛ baaka kan kanuya ra .
17
Ayiwa ne min fwɔ aaye ye mantgi ra ka piɛ, wo fɛɛ ɲin ye , ko aa kaa tgɔnma kun e na fwɔ Yaa masa dɔnbiiw tgɔnma aa ka myirili fufafwu la tgo min na .
18
Aa hakri jibini no . Aa min donanw ye Yaa masa ka ɲranmanya ta pan aa ka kwo dɔnbiiya kɔsɔ , wo min naan dosokun gwreya .
19
Aa dosokun ti shaa bɔ fɛn shi shɛɛrɛ ma kun . Aa r'a yɛɛ ji kakaraya man ka kwo ngɔnni shifaa biɛ kɛ ka grin aa kan .
20
Nga aaye kpin ma krista ka kwo kran tin dɛ ,
21
na ra sɔɔ ko aa ra mɛn ka kran a ra ka kanɲan ni shɛn we min mi Yesu ra ,
22
ko aa aah tgo kɔɔ bla , wo min nan yɛɛ tii ka kanɲan ni lafrili ngew ye .
23
Aa lakulaya aa ɲin ani aa hakri ra,
24
ka tgo kula dun aa yɛɛ ra, wo min dara Yaa masa bisgi ra , shɛ ka teenniya ni a ka senumaya ra .
25
We kɔsɔ, aa fiɲan dabla, aa biɛ ken ken nan shɛ fwɔ ngɔn ye , katgu aan min ngɔn piikoo jaw le ye .
26
Ni aa ka jinmin, aa kaa jrumun kɛ . Tee kaa byin ka aa jinminnin to .
27
Aa kaa da shi ji shitani ma .
28
Min tiin soɲanni kɛ , wo kaa soɲannin kɛ kun , nga a ra e jeja ka baara bɛnnin kɛ ni a yɛɛ boow ye , yaako miin makwo mi fɛ na, a ra she ka fɛ jɔ ji wo ma.
29
Koma dgu shi kaa bɔ aa daa ra , fwɔ koma bɛnnin miin she ka jɔ fra mgɔ kpɛɛma baaka kan , ka nɛɛma ji a lamɛnbgaw ma.
30
Aa kaa Yaa masa ɲi senuma doso kashi , wo min kɛra Yaa masa ka tgɛmashɛn dani we aa kan kunmabɔri dun ɲan .
31
Aa kunaya ni doso bɔ ni jiminya ni wɔyɔ ni nɛnin ani kɔɔna dguya shifa biɛ dabla .
32
Nga aa kwo ɲuman kɛ ngɔn ye , ka hina ka yafa ngɔn ma, e ko Yaa masa yafara aa ma krista ra tgo min na