¹ Wokit Jena koruf de fiku kitim nimira saba, sama askut nus saa. ² Min hinak ana ainu saba malaikat wogif gidam Allah, wa wodi le umon saba torombetat. ³ Malaika tani ja, gobudu mabhara ta bokhur min dahab, wa wogif fi mazbah ta bohur. Wa wodi le huwo bokhur tani ketir ashan huwo bi gedimu salawat ta kudusin fi mazbah ta bokhur gidam ta kursi. ⁴ Dukhan ta bokhur, sawa ma salawat ta kadisin gum fok gidam ta Allah min ida ta malika de. ⁵ Malaika de gum shilu mabkhara ta bokhur al min dahab de wa malau be nar min mazbah. Biga huwo jadau tehet fi ard, wa hasil saga dugu, sot shedid, nur wala, wa zalzal . ⁶ Saba malaikat al kan indu saba torombetat del umon gum isteid ashan bi bada afuku . ⁷ Awel malaika wokit bada afuku torombeta tou, wa kan sekete wa nar lakabatu sawa ma dom. Jadao tehed fi ard ashan tilit tou bi haragu, tilit ta ashjar haragu, wa kan kulu gesh akhdar haragu . ⁸ Malika nimira itnin wokit afuku torombeta tou, haja tani kebir ze jebel bi haragu wa jadau fi bahar. Tilit ta bahar tala dom, ⁹ wa tilit ta haiwanat al fi bahar kan mutu, wa kaman tilit ta sufun demiru. ¹⁰ Malika nimira talata wokit afuku torombeta tou, nejma kebir kalis waga min sama, bi wala ze nur, waga fi tilit ta bahar wa fi ena moyo. ¹¹ Isim ta nejma de Marara. Tilit ta moyo bahar tala mur, wa nas kutar al ashrab kan mutu be sabab marara ta moyo de. ¹² Wokit malaika nimira arba afuku torombeta tou, hasil darba le tilit ta shemis , wa kaman tilit ta gamara wa tilit ta nujum. Wa tilit tumon gilibu biga duluma; tilit ta nahar wa tilit ta bilel biga kan ma indu nur. ¹³ Ana ainu, wa ana asuma ter (Nasr) al kan bi tiri fi nus sama, bi kore be sot fok kalis, "Laana, laana, laana, le del al sakinin fe ard, ashan bagi torombeta al bija afuku be bagi talata malaikat."