¹ Bad de ana ainu arba malaikat wogif fi arba arkan ta dunia, bi amsugu arbaa riyah ta dunia ashan kede mafi habub afuku ardia, fi bahar, aw fi ai shejera. ² Ana ainu malaika tani jai min sherik, huwo indu kitim ta Allah al hai. Huwo kore shedid be sot fok le arba malikat al kan wodi le umon izin ashan bi awgu dunia wa bahar. ³ "Matakum awgu ard, bahar, aw ashjar lahadi kan nina kutu kitim fi wusa ta kadamin ta Allah ta nina. ⁴ Ana asuma gali adad ta del al katimu: 144,000, del al katimu umon min kulu gabail ta nas Israel: ⁵ itnashar alf min gebila ta Yahuza, itnashar alf min gebila ta Raubin, itnashar alf min gebila ta Jad, ⁶ itnashar alf min gebila ta Ashir, itnashar alf min gebila ta Naftali, itnashar alf min gebil ta Manasa. ⁷ itnashar alf min gebila ta Shamaun, itnashar alf min gebila ta Lawi, itnashar alf min gebila ta Yasakir, ⁸ itnashar alf min gebila ta Zabalun, itnashar alf min gebila ta Yusif, wa katimu itnashar alf min gebila ta Binyamin. ⁹ Bad hajat de ana ainu, kaman kan fi adaa ta nas ketir kalis al mafi zol bi agder idu - min kulu umma, gebila, nas, wa luga -umon wogif gidam kursi wa gidam Jena koruf. Umon libisu jelebiyat abiad wa bi amsuku awrak ta zaaf fi idan tumon, ¹⁰ wa umon bi nadi be sot shedid kalis: "Kulasa fi le Allah ta nina, al bi geni fi kursi, wa le Jena khoruf!" ¹¹ Malaikat kulu kan bi wogif hawle kursi wa hawle shiukh wa arba haiwanat, wa umon waga be wusa gidam ta kursi. Umon kan bi abudu Allah, ¹² wa bi kelim gali, "Amin! Al hamdu, mejid, hikma shukran, ihteram, guwa, wa gudra kede kon le Allah ta nina daiman wa lel abad.! Amin!" ¹³ Biga wahid min shiyukh del asalu ana, "Del nas munu al libisu jelebiat abiad de, wa umon ja min wen?" ¹⁴ Ana kelim le huwo, "Ya seid, inta aruf," wa huwo kelim le ana, "Del yau nas al tala bara min azab al kebir. Umon kasulu jelebiyat tumon abiad be dom ta Jena koruf. ¹⁵ Be sabab de, umon fi gidam kursi ta Allah, wa bi abudu Huwo nahar wa bilel fi haikal tou. Wa al bi geni fi kursi de huwo bi fata khema tou fok ras tumon. ¹⁶ Umon ma bi tala jiyanin tani mara, wa ma bi kon atshanin tani mara. Shemis ma bi dugu umon, wole sakana bi haragu umon. ¹⁷ ashan Jena koruf al fi nus kursi de yau bi ainu umon, wa bi sugu umon fi mahal moyo ta haya bi tala fogo, wa Allah bi masa moyo ena bara min uyun ta tumon."