¹ Bad dak ana ainu malaika nazil min sama. Huwo indu mufta ta hufra hawiya, wa huwo indu jenzir gowi fi idan tou. ² Huwo amsuku tinin, wa debiba al gedim, al huwo ibilis, aw shetan, wa robutu huwo le fetra ta alf sena. ³ Huwo jadau huwo fi hufra al ma indu nihaya (hawiya). Huwo gofulu wa kutu kitim fogo. De ashan huwo ma bi kabasu nas tanimara lahadi kan alf sena de kalasu. Bad dak, bi fiku huwo le zaman besit. ⁴ Bad dak ana ainu karasi. Nas al indo sulta ta hukum yao geni fogo. Ana ainu kaman nufus al gatau ras tumon ashan umon bi shihada an Yesua wa kilma ta Allah. Umon kan ma abidu wahsh de aw sura tou, wa umon shelu alama fi usa aw idan tumon. Umon biga hai, wa umon geni fi sulta ma Mesih le fetra ta alf sena. ⁵ Bagi nas al meitin del ma gum le haya lahadi alf sena de kalasu. De yau giyama al awel. ⁶ Mubarak wa mukadas ai zol al ligu makan tou fi giyama al awel. Mutu nimra itnin ma indu guwa fi ras tumon. Umon bi kun gusus ta Allah wa Mesih wa bi geni fi hukum ma huwo le fetra ta alf sena. ⁷ Zaman alf sena de kalasu, bi fiku sitan min sijin. ⁸ Huwo bi ruwa ashan kabasu umam fi kulu arba zawiya ta ard- Gog wa Magog- bi jibu umon sawa le harib. Umon bi kun ketir ze rumla ta bahar. ⁹ Umon ruwa fi ardi al wasi wa gordonu kem ta nas ta Allah al kudusin- medina al mahbub. Lakin nar nenzil min sama wa haragu umon. ¹⁰ Sitan, al kabasu umon, jadau fi buheira ta nar ta kibirit, fi mahal al jadau wahsh wa nebi al kadab fogo. Bi azibu umon bilel wa nahar le abad al abadin. ¹¹ Bad dak ana ainu kursi kebir abiyat wa de al gaid fogo. Ard wa sama jere min gidam tou, lakin mafi mahal le umon ashan bi ruwa fogo. ¹² Ana ainu meitin- al mohimin wa al ma mohimin bi wogif gidam kursi takursi (arsh), wa fatau kutub. Kaman fatau kitab tani- Kitab ta haya. Hukumu meitin be hasab hajat al moktub fi kutub, be hasab amail tumon. ¹³ Bahar wodi meitin al kan huwo indu. Mutu wa hawiya talau meitin al kan indum, wa hakimu meitin be hasab hajat al umon kan amulu. ¹⁴ Jadau mutu wa hawiya fi buheira ta nar. De yau mutu nimra itnin- buheira ta nar. ¹⁵ Ai zol al isim tou ma ligo fi kitab ta haya, bi jadau huwo fi buheira ta nar.