¹ Bad hajat del ana asuma sot ze sot ta nas ketir fi sama bi nadil, ''Haleluya! Kulasa, mejid, Allah yau indu guwa. ² Hukum tou hagiga wa indu adala, ashan huwo hakimu mara kebir ta zani al amulu fasad fi ard be sokol zina tou. Huwo dafa dom ta khudam tou al heya dofugu.'' ³ Umon wonusu tani: ''Halleluya! Dukhan bi tala min heya el abad al abadin.'' ⁴ Shuyuk al arba wa ishirin wa haiwanat al arba waga tehet wa abidu Allah. al kan geni fi kursi. Umon kan bi kelimo, ''Amen. Halleluya!'' ⁵ Bad dak sot ja min kursi de, gali, "Sabihu Allah tanina, intum kulu khadamin ta tou, intum al bi kafu huwo, kulu del al ma mohimin wa al gowin.'' ⁶ Bad dak ana asuma sot ze ta nas ketir, ze sot ta moyo ketir, wa ze sot ta saga, bi kelimo, "Halleluya! Ashan Rabana fi hukum, Allah ta nina, al Gadirala kulu shei. ⁷ Keli nina afarh wa kon murtah wa wodi le huwo mejid ashan ihtifal ta iris ta koruf ja kalas, wa arusa tou jahizu nefsa tou. ⁸ Wori le heya ashan bi libisu gumash abiad naim ta iris al bi lama'' (gumas al naim huwo yau sokol bir ta nas ta Allahal kudusin) . ⁹ Malaika kelimu le ana, '' Katibu de: Baraka le del al nadi le iris ta Koruf." Huwo kaman kelimu le ana, ''Del kalam ta Allah al hagiga.'' ¹⁰ Ana waga tehet korein tou wa abidu huwo, lakin huwo kelimu le ana, ''Mata amulu kalam de! Ana khadam ze inta wa akwana taki al bi shahidu an Yesua. Abidu Allah, ashan shihada an Yesua huwo roho ta nubuwa.'' ¹¹ Bad dak ana ainu sama fata, wa ana ainu wa hinak kan fi husan abiyad. Zol al bi arkab fi ras husan de bi nadi huwo amin wa sadik. Huwo bi harib be adala al huwo indo. ¹² Uyun tou ze nar al saab, wa fi ras tou taj ketir. Huwo indu isim moktub fi jesim tou al mafi zol tani bi arufu ile huwo bes. ¹³ Huwo labis gumash al bilu be dom, wa isim tou yau Kilma ta Allah. ¹⁴ Jesh ta samawat mashi wara huwo be kusanat al abiyat, humon Libisu gumasat naim min gutun, abiyat wa nedif. ¹⁵ Shef senin bi tala min kasuma tou al huwo bi demiru kulu umam, wa hukumu umon be asaya min hadid. Huwo bi dusu umon fi mahal ta asuru kamur be zel ta Allah al Gadir ala kulu shei. ¹⁶ Huwo indu isim katibu fi gumas tou wa fi kura tou: ''Melik al muluk wa Rab al Arbab.'' ¹⁷ Ana ainu malaika wagif fi shemis. Huwo nadi kulu tiyur al bi tiri fi jou be sot fok, ''Taalu, limo takum sawa le ihtifal kebir ta Allah. ¹⁸ Taalu akulu takum jisim ta muluk, jisim ta khadad ta jesh, jisim ta nas al kubarin, laham ta husanat wa nas al arkab fogo, wa laham ta kulu nas,, nas al hur wa abid, nas al ma mohimin wa nas al indo guwa". ¹⁹ Ana ainu wahsh wa muluk ta ard be jesh tumon. Umon limu sawa ashan bi harib ma zol al arkab husan wa be jesh tou. ²⁰ Gobudu wahsh de ma nebi al kadab al bi amulu mujizat fi gidam tou. Be mujizat del huwo kabasu nas al akudu alama ta wahsh wa abidu sura tou. Jadau umon kulu itnin hai fi buheira ta nar ta kibirit. ²¹ Bagi nas tumon de katulu be shef al bi tala min kasuma ta zol al arkab husan. tiyur kulu kan akulu jisim tumon al meit.