¹ De kelimat ta Melik Lemuel – an wassia ali huwo ligo min uma tou. ² Shunu ya jena tai? Shunu ya jena ta batna tai? Inta azu shunu, jena ta ahad tai? ³ Mata wodi guwa taki le nuswan, au sika taki le delin al be demiru muluk. ⁴ huwo ma le Muluk , ya lemuel, huwo ma le Muluk ashan be ashrubu merisa, weli le hukam ashan limisu Merisa al gowi, ⁵ leanu kan umon ashurubu umon be nesitu haja al kariru, wa be karabu kulu huguk ta masakin. ⁶ Wodi merisa al gowi le zol al deefi.wa khamr le delin al fi huzun shedid. ⁷ Huw be ashrubu wa be nesitu shokol meskin tou. Wa huwu ma be zekir mashakil tou. ⁸ Wonusu le deliin al ma be wonusu. Le asbab tou kulu nas al umon deifiin. ⁹ Wonus bara wa hakimu be adala, wa dafi an huguk ta musakin wa muhtajin. ¹⁰ Munu be ligo mara al kwes? Taman tou be futu hajir al kerim. ¹¹ Gelba ta rajil tou indu sigha le hiya, huwo ma be kun meskin. ¹² Hiya be amulu hajat al kwes le huwo ma batal kulu ayam ta haya tou. ¹³ Hiya bi fetis suf wa gutun wa bi ishtakal be farah be eden tou. ¹⁴ Hiya ze sefina ta tajir; al bi jibu akil tou min beid. ¹⁵ Hiya bi gum bilel wa wodi akil le nas bet tou, wa hiya bi wazau shokol le kadamin tou al banat. ¹⁶ Hiya be fetisu mahal zirah wa bi esteri, be samar ta iden tou. Hiya zarah jinena enab. ¹⁷ Hiya bi libisu nefsa ta tou be guwa, wa bi kutu iden tou gowi. ¹⁸ Hiya bi arufu haja al bi wodi le hiya ribe; lamba tou ma bi batulu bilel ¹⁹ Hiya be kutu iden tou fi mahal khiyata, wa hiya bi amsuku keit al lifu. ²⁰ Hiya bi saidu nas al masakin, wa be saidu nas al muhtajin. ²¹ Hiya ma be kafu min jelid le bet tou, leanu kulu ahal bet tou be libisu malais dafi. ²² Hiya be salau milayat le seriri tou. Wa bi libisu gumash al amulu min ketan wa arjowa ²³ Rajil tou maruf fi kulu bowabat , kan huwo be wonusu ma nas kubar ta medina. ²⁴ Hiya be salau malabis min ketan, wa bi biyu umon, hiya bi jahizu rubta le tajir ²⁵ Hiya bi libisu malabis al gowi wa endu sharaf, wa hiya bi ataku be mustakbal . ²⁶ Hiya bi wonusu ma hikma wa fi lisan tou wa alam al maaruf ²⁷ Hiya bi aiynu hajat ta bet tou, wa ma be akulu akil ta kaslan. ²⁸ Iyal tou be gum fok wa be bariku hiya, wa rajil tou bi shukuru hiya, gali ²⁹ " Nuswan ketir amulu kwes, lakin inta futu umon kulu." ³⁰ Haja al kwes huwo kabasu, jamala kalam farik, lakin mara al be kafu Yahwa be shukuru hiya. ³¹ Wodi le hiya samar ta eda tou wa keli shokol tou shukuru hiya fi buwabat.