¹ Mata fekiru an bukra ,leanu inta ma be arufu yom be kun keef. ² Kely zol tani yau Shukuru inta; ma kasma taki, al garib ma kasma taki. ³ Kede inta arufu tegil ta hajer wa wozin ta rumla , lakin zalan ta belit tegil min umon kulu. ⁴ Zalan ma indu rahma wa zalan al shedid be demiru , lakin munu be wogif gidam ta hasada? ⁵ Tobiik al zahir huwo kwes min muhaba al ma gi aiynu. ⁶ Dabarat al sabi taki yau augu aksan min gublat ta adu. ⁷ Zol al shabaan bi aba asel, lakin le zol al jiyan hata haja al mur hilu le huwo. ⁸ Ze teer al b tiri juwa tou ze zol al be jere min makan al huwo be geni fogo. ⁹ Riiha wa bowkur be kutu gilba farhan lakin halwa ta shokol sabi min wasaya al kwes ¹⁰ Mata sibu sabi wa sabi ta abu taki, wa mata dakalu fi bet ta aku taki fi yom ta mushkila. aksan jiran al gerib min aku al beid shedid. ¹¹ Kun hakim ya jena tai, wa kutu gilba tai mokosut ;biga ana be juwabu le zol al be alisu ana. ¹² Zol al negit be aiynu shaar wa be dusu, lakin zol al belit bi rua wa be turudu huwo. ¹³ Shilu Gumash ta zol ze amni min zol al shilu dein min ajnabi. hafisu gumash de ashan bi hafisu nefsa taki ashan inta ma bi woduru gurus taki wokit huwo gi hafisu mara zani. ¹⁴ Zol al gi alinu baraka le jeran tou be sot fok sabah bediri, bi asibu baraka dak ze laana. ¹⁵ Mara ta korekore geni ze motoro al gi naga kulu yom fi zaman amtar. ¹⁶ gobodu tou ze gobodu hawa , au hawilu gobudu zet be eda al yemin . ¹⁷ Ze ma hadid be seninu hadid, kaman insan be seninu insansabi tou. ¹⁸ Zol al raba Shejera ta tiin be akulu samar tou, wa zol al be hami said tou be kerimu. ¹⁹ Ze ma moya gi akisu wusa ta zol, gelba ta insan kaman gi akisu insan. ²⁰ Ze ma Mutu wa Demiru ma be shabaan, bardu ena ta zol ma bi shabaan. ²¹ Sahan le sokunu fida wa furun le Dahab; wa bi jeribu insan wokit gi shukuru huwo ²² Hata kan inta dugu zol belit fi funduk sawa ma dura- lisa shokol belit tou de ma bi sibu huwo. ²³ Kun mut akit ashan bi arufu hala ta korufan taki , wa kutu balak le bahaim taki ²⁴ Leanu shokol ganiyan ma lel abad, Hal taj bi bi geni lel abad? ²⁵ Kede inta arufu wokit gesh bi mut wa judad bi tala, wa zaman al bi gatau gesh min jiba fii mahal wahid. ²⁶ Korufan del le gumasat taki , wa ganamayat del le dafa taman ta zira. ²⁷ Wa inta bi indu leben ta ganamaya le akil taki, wa akil le ahal Bet taki , wa akil le kadamin taki.