¹ Yahwa kelim le Musa. Huwo gal, ² " Wanusu le shab ta Israel. Kelim le umon, iza kan rajil au mara nedifu nefsa tuo le Yahwa be alifa al kas ashan bikun zol al Nazirite, ³ huwo lazim bikun beit min merisa au ai shikil ta moshrubad al gowi. Huwo lazim ma bi ashirub ai asir ta hinab wale akulu ena ta hinab au hinab al nashif ⁴ Fi kulu ayam ta nadafa tou, huwo lazim ma bi akulu ai haja al salau min shejera ta hinab, fogo ai haja min ena tou wa galild tou. ⁵ Fi kulu zaman ta alifa tou ta shokol nadafa de, kele ma haligu shar tou be mus lahadi kan ayam tou ta nadafa le Yahwa kalas kalasu. Huwo lazim bi wodi gisim tou le Yahwa bes. Huwo lazim bi kutu shar keli raba ketir fi ras tou. ⁶ Fi kulu zaman al huwo bi wadi gisim tou le Yahwa, huwo lazim ma ja gerib ma zol al mutu. ⁷ Huwo lazim ma bi waskanu gisim tou sala kan abu tou, uma tou, aku tou, wale ukut tou yau mutu. De ashan huwo biga nedif le Allah, zei kulu zol bi aiynu min shar tou. ⁸ Fi kulu zaman al huwo bi nedifu gisim tou,huwo bi geni kudus, bes le Yahwa. ⁹ Iza kan zol tani mutu mufaja jambu tou au waskanu gisim tou al nedif de, huwo lazim bi aligu shar tou fi yom ta nadafa fi yom nimira saba, huwo lazim bi aligu shar de bara. ¹⁰ Fi yom nimira tamaniya, huwo lazim bi jebu itnin hamam al sukerin le gesis fi kasma bab ta khaima ta ijtima. ¹¹ "Gesis lazim bi gedimu zebiha ta ter wahid le katiya wa tani ze hataya al bi haragu. De bi wori gali kalas asalu afu ashan katiya tou ashan huwo kan geni jambu zol al mutu.huwo lazim bi nedifu gisim tou tani fi yom dak. ¹² Huwo lazim bi kutu gisim tou le Yahwa ashan yom tou ta nadafa. Huwo lazim bi jebu koruf abu rajil al endu wahid sena ze hataya ta katiya. Ayam al gubal huwo lisa ma waskano gisim tou bi hasibu, leanu shokol nadafa tou kan karabu. ¹³ De yau ganun an zol al Nazirite fi zaman al sokol nadafa tou kalasu. Lazim bi jibu huwo fi bab ta khama al ijtima. ¹⁴ Huwo lazim bi gedimu hataya tou le Yahwa. Huwo lazim bi gedimu hataya al bi haragu ta jena koruf abu rajil al endu wahid sena wa al ma endu ai ayan fi gisim tou. Huwo bi gedimu hataya ta katiya min jena koruf abu mara al timu wahid sena wa ma endu ai wasaka. Huwo lazim bi jibu koruf abu rajil ze hataya ta shiraka, al ma endu ai ayan. ¹⁵ Huwo lazim bi jibu esh al amulu bidun kemira malian bistila. esh al salau min degit al lakbatu be zet, ragaga al amulu bedun kemira lakin masau be zeit, sawa be hataya ta dura wa hataya al bi asurubu. ¹⁶ Gesis lazim bi gedimu umon gidam Yahwa. Huwo lazim bi gedimu hataya ta katiya wa zebiha al haragu. ¹⁷ Wa bistila ta esh al bedun khemira, huwo lazim bi gedimu koruf abu rajil ze zebiha, hataya le Yahwa. Al gesis bardu lazim al bi gedimu hataya ta dura wa hataya al bi asurubu. ¹⁸ Zol al Nazaria lazim bi haligu shar tou al karisu de fi bab ta kema al ijtima. Huwo lazim bi shilu shar de min ras tou wa bi kutu fi nar al fi tehet hataya ta sharaka. ¹⁹ Gesis lazim bi shilu kidfa ta koruf al kalas fouru, wahid reqif al amulu budun kemira min juwa bistila, wa wahid raqaqa al amulu budun khemira. Huwo bi kutu hajat de fi iden ta zol al Nazaria de baad ma kan kalas huwo aligu shar tou al karisu de. ²⁰ Al gesis lazim bi gedimu hajat de ze hataya gidam Yahwa, ka juzu al mukadas le kahana, sawa ma sudur tou wa maganis tou bardu bikun kan toburwat le gesis. Baad de, al nazaria biga bi agder ashirab merisa. ²¹ De gunun ta zol al Nazirite al bi alifu ashan bi gedimu gisim tou le Yahwa le kerisu gisim tou. Fi kulu haja al huwo bi wodi, lazim huwo bi hafisu gawanin ta alifa al huwo shilu ashan bi hafisu wahad al ganun ta kerisu nufus bi kelim. ²² Yahwa wonusu le Musa tanimara. huwo gal. ²³ "kelim le Haron wa le awulad tou, intum lazim keli bariku shab ta Israel be teriga de. intum bi kelim le umon. ²⁴ Keli Yahwa bariku intum wa hafisu intum ²⁵ Keli Yahwa ainu le intum be teriga kwes wa bi indu neima le intum. ²⁶ Keli Yahwa aiynu le intum ma be tefriga wa wodi le intum salam. "' ²⁷ De yau teriga al umon bi wodi be huwo isim tai le shab ta Israel. wa ana bi bariku umon."