¹ Yala al nas ta Israel, kulu mujtama, ruwa le gaba fi beriya ta zin fi awel shahar; umon geni fi kadesh. Miriam mutu hinak wa dofunu. ² Kan mafi moyo le mujtama, yala umon limu sawa diid Musa ma Harun. ³ Al nas itzamar diid Musa. Umon kelim “huwo kan bikun kwes iza kan nina mutu ze kan akwana ta nina israeliin mutu fi gidam ta Yahwa! ⁴ Malu inta jibu mujtama ta Yahwa fi beriya ashan mutu hini, nina wa haiwanat ta nina? ⁵ Malu intum jibu nina min masir fi mahal al kaab? Al mafi mahal le tirab, ashjar, zuhur, wa mafi moyo le sharab.” ⁶ Yala Musa wa Harun ruwa bara min mujtama. Umon ruwa fi baab ta kem ta ijtima wa nam wusa tehet hinak mejid ta Yahwa al abiad zahir le umon. ⁷ Yahweh wonusu le Musa wa gal, ⁸ Shilu asaya wa limu mujtama, inta wa Haroon aku taki. Kelim le hajer fi gidam ena tomon. Wa amiru moyo keli tala min hajer. Inta bi talau moyo le umon min hajer, wa inta lazim bi wodi le mujtama wa bahaim tomon ashan ashurubu.” ⁹ Musa shilu asaya min gidam ta Yahwa, ze Yahwa amiru ashan amulu. ¹⁰ Baad dak Musa wa Harun limu nas sawa gidam Hajer de. Musa kelimu le umon, asuma hasa, intum mudmeridiin, nina lazim keli tala moyo bara min hajer de le intum? ¹¹ Yala Musa arfa edan wa dugu hajer maraten ma asaya tou, wa moyo ketir tala. mujtama ashurubu, wa bahayim tomon ashurubu. ¹² Baad dak Yahwa kelim le Musa wa Harun, “ashan intum ma wasik sigha fi ana au iktaramu ana ze kudus fi ena ta nas ta Israel, inta ma bi jibu mojmu de le ard al ana wodi le umon.” ¹³ Mahal de kutu isim tou moyo ta Meribah ashan nas ta Israel kore kore ma Yahwa hinak, wa huwo wori nefsu le umon kudus. ¹⁴ Musa rasulu murasulat min kadesh le melik ta Edom aku taki Israel kelim kida; ‘inta bi arif kulu al taab al ligo nina. ¹⁵ Inta arif gal judud ta nina ruwa le Masir wa ishu fi Masir zaman towil. Al Masriin amulu nina batal wa Kaman judud ta nina. ¹⁶ Wokit nina kore le Yahwa, huwo asuma sot ta nina wa rasulu Malaika wa tala nina bara min Masir shuf, nina fi kadesh, al medina fi hudud taki. ¹⁷ Ana bi asalu inta ashan keli nina ruwa abiri ardi taki. Nina ma bi ruwa abiri mahal zira au ginena wala ashurubu min moyo ta abiar takum. Nina bi ruwa abri sika al reisi ta melik en mabi gelibu wele shamal wala jemiin lahadi nina bi abir hudud takum.” ¹⁹ Lakin melik ta Edom juwabu huwo," Intum ma bi ruwa be sika de. Iza kan intum tala be sika de, Ana bi ja be sef ashan bi hajimu intum." ¹⁸ Baad dak shab ta Israel kelimu le huwo, "Nina bi ruwa be sika kebir. Iza kan bahaim ta nina ashurubu moyo takum, nina bi dafau. Nina kede douru bes be kura, bidun nina ma amulu ai haja." ²⁰ Lakin melik ta Edom juwabu, “intum ma bi ruwa be sika de” Yala melik ta Edom tala diid Israel ma edan al gowi ma asakir ketir. ²¹ Melik ta Edom aba kulu kulu ashan nas ta Israel bi gata be wasat hudud tomon, ashan de, Israel gelibu bara min ardi ta Edom. ²² Yala shab de safiru be wasat kadesh. Shab ta Israel, mujtama kulu, ja le jebel Hor, ²³ Yahwa wonusu le Musa wa Harun fi jebel Hor, fi hudud ta Edom. Huwo kelim. ²⁴ Harun lazim bi limu le nas tou, huwo mabi dakalu fi ardi al ana wodi le shab ta Israel. De ashan intum itmaradu diid kalam tai fi moyo ta Meribah. ²⁵ Shilu Harun ma weled tou Eleazer, wa jibu umon fok le jebel Hor. ²⁶ Shilu julabiya ta gesis bara min Harun wa libisu le weled tou Eleazer. Harun lazim bi mut wa bi limu sawa le nas tou hinak. ²⁷ Musa amulu ze Yahwa amiru, umon ruwa fok jebel hor fi ena ta kulu mujtama. ²⁸ Musa shilu jalabiya ta gesis min Harun wa libisu le weled tou Eleazar. Harun mutu hinak fi ras jebel. Yala Musa wa Eleazar ja tehet ²⁹ Wokit kulu al mujtama aiynu gal Harun mat. Kulu bet ta Israel kore Harun le muda teletin ayam.