¹ Huwo kelim le umon , " Al hak anan kelim le intum, fi baad min nas min intum ma bi jeribu mutu gubal ma umon ma ainu malakut ta Allah bi ja ma guwa." ² Baad sita ayam, Yesua shilu Butrus wa Yuhana fok fi jebel, wa umon barau. Yala shikil tou geiru fi gidam tomon. ³ Gumas tou tala abiyad, gi lama shedid ze telij, ma fi haja tani abiyad fi duniya ze de.. ⁴ Baad dak Elia wa Musa zahar le umon wa umon kan gi wonusu ma Yesua, ⁵ Buturus juwabu wa kelim le yesua, " Rabbi", huwo kwes le nina ashan bi kun hini, wa hasa keli nina amulu talata Rakuba, wahid le Inta, wahid le Musa, wa wahid le Elia." ⁶ (Huwo ma arufu huwo bi kelim shunu, umon kan mustagarabiin wa gi kafu.) ⁷ Sehab ja wa kati umon. yala umon asuma sot min juwa sihab , " De yau weled tai al ana bi hibu. asuma takum le huwo." ⁸ Fajaa, zaman umon aiynu min hawli umon, umon ma aiynu ai zol ma umon Lakin Yesua bes. ⁹ Ze ma umon nazilin min ras jebel, huwo kelim le umon ashan kede ma wori le ai zol haja al umon aiynu, lahadi Ibin insan gam min mutu. ¹⁰ Biga umon askut ma kalam de, lakin umon kan nakishu fi bein tomon inu " Gum min mutu de" mana tou shunu. ¹¹ Umon asalu huwo, " Lee Kataba bi kelimu gali Elia yau bi ja awel?" ¹² Huwo kelim le umon, " Elia ja awel ashan bi reja hajat kulu. Teib lee katibu inu Ibin al insan lazim bi ligo taab ketir wa bi alisu? ¹³ Lakin ana bi kelim le intum inu Elia ja wa umon amulu le huwo kulu hajat al umon deiru, ze ma katibu an huwo." ¹⁴ Zaman umon ja le talamiz, umon aiynu nas kutar hawli umon, wa nas kataba kan gi nakishu ma umon. ¹⁵ Wa ze ma umon aiynu Yesua, nas kulu kan mustagarabiin wa ze ma umon jere le huwo ashan bi selimu huwo. ¹⁶ Huwo asalu talamiz tou, " Intum gi nakishu ma umon an shunu?" ¹⁷ Wahid zol min nas de juwabu huwo, " Mu-alim, ana jebu weled tai le inta. Huwo indu roho al bi kutu huwo ma bi wonusu. ¹⁸ Gi rubuto huwo wa gi jada huwo tehet, wa buzak gi tala min kasuma tou, huwo gi adi sunun wa bi tala gowi. ana asalu talamiz taki ashan bi turudu aruwah de bara, lakin umon ma agdeir." ¹⁹ Huwo juwabu umon, " Intum jil al ma indu imaan, ana bi geni ma intum lahadi miten? Lahadi miten ana bi ithamal ma intum? Jibu huwo le ana." ²⁰ umon jibu weled de le huwo. zaman roho de aiynu Yesua, roho de tuwali jada weled de wa biga bi juru. Weled de waga tehet wa buzak abiyad bi tala min kasma. ²¹ Yesua asalu Abu tou, "Kalam de bi amulu huwo zede min miten?" Abu de juwabu," Min zaman huwo suker. ²² Roho de gi jada huwo fi nar au fi juwa moyo wa hawil ashan bi katulu huwo. Iza kan inta bi agdeir amulu ai haja, amulu rahma le nina wa saidu nina." ²³ Yesua kelim le huwo, "Iza kan inta bi agdeir'? Ai haja mumkin le zol al amin." ²⁴ Abu ta weled de tuwali kore be sot fok wa kelimu, Ana amin! Saidu weled tai al ma amin de!" ²⁵ Zaman Yesua aiynu nas ketir gi jeri le umon huwo wobiku roho al sherir de a kelim, " Inta ya roho al tamtam wa ateresh, ana gi amiru inta, atla bara, wa mata dakalu le huwo tani mara." ²⁶ Roho al sherir de kore be sot fok wa juru weled de shedid wa baad dak tala. Weled de zahir ze zol al kan mutu, biga nas kutar kelim, "Inu huwo mutu." ²⁷ Lakin Yesua amusuku huwo fi iden wa arfa huwo fok, wa weled de wogaf fok. ²⁸ Zaman Yesua ja fi bet, talamiz tou asalu huwo," Lee nina ma agdeir ashan bi turudu roho al sherir de?" ²⁹ Huwo kelim le umon, " shikil roho de ma bi agdeir turudu ile be salawat." ³⁰ Umon ruwa min hinak wa mururu be wasat Galilleya. Huwo ma deir keli ai zol arufu mahal tomon, ³¹ Ashan huwo kan gi derisu talamiz tou. Huwo kelim le umon," Ibini Insan bi selimu fi iden ta nas, wa umon bi katulu huwo zaman kan umon katulu huwo, Huwo bi gum baad talata yom." ³² Lakin umon ma agdeir fahimu kalam de, wa umon gi kafu ashan asalu huwo. ³³ Baad dak umon ja fi Capernaum, baad huwo dakalu fi juwa bet huwo asalu umon , " Intum bi nakishu shunu fi sika?" ³⁴ Lakin umon askut. umon kan gi nakishu ma baad tomon inu munu yau bi kun mosuul. ³⁵ Huwo geni tehet, huwo nadi al itnashar talamiz sawa wa huwo kelimu le umon, " Iza kan ai zol deiru kun al awel, huwo lazim bi kun akir wa kadam ta nas kulu." ³⁶ Huwo shilu jena sukeir wa kutu huwo fi wasat tomon. Huwo arufa jena de fi iden tuo wa kelim le umon," ³⁷ Ai zol al gabilu jena al sukeir de ma isim tai huwo gabilu ana; Ai zol gabilu ana huwo ma gabilu ana lakin huwo gabilu zol al rasulu ana." ³⁸ Yuhana kelim le huwo, " Ya Mualim, nina ligo zol tani gi turudu siyatiin bi isim taki wa nina wogifu huwo, leanu huwo ma gi duwru ma nina," ³⁹ Lakin Yesua kelim, Ma takum wogifu huwo, Mafi ai zol tani al bi amulu shokol kebir bi isim tai wa kaman bi kelimu kalam batal an ana. ⁴⁰ Ai zol al ma did nina huwo tabi le nina. ⁴¹ Ai zol al wodi le intum kubaya ta moyo ashan intum bi asurubu fi isim tai ashan intum tabi le al Mesih, hagiga ana gi kelim le intum, huwo ma bi fagidu ujura tou. ⁴² Ai zol al kutu wahid min iyal al suhar al amin fi ana de waga, huwo bi kun kwes ashan bi robutu hajer kebir fi ragabta tou wa bi jadau fi bahar. ⁴³ Kan ida taki sibu inta waga fi katiya, gatau bara. huwo bikun kwes ashan inta bi dakalu fi haya al abadiya bidun ida bidal inta bi endu itnin iden wa inta bi ruwa fi johanam, fi nar al gi batulu. ^{44 45} Iza kan kura taki shilu inta fi katiya, gatau bara huwo kwes le inta ashan inta bi dakalu fi haya al abadiya bidal inta bi endu itniin kura wa bi jadau inta fi johanam. ^{46 47} Iza kan ena taki sibu inta amulu katiya talau bara, Huwo bi kun kwes le inta dakalu fi molokut ta Allah be wahid ena, bidal inta bi kun be itniin uyun wa bi jadau inta fi johanam. ⁴⁸ mahal al dudu tomon ma gi mutu, wa nar tou ma gi batulu. ⁴⁹ Kulu wahid bi masau be milee ta nar. ⁵⁰ Milee kwes, lakin iza kan milee fagidu ta-am tou, inta bi rejau ashan bikun milee kef? Keli indakum milee fi nefsa takum, wa keli intum kun fi salam fi baad takum