¹ Yesua tala min hinak wa ja fi Yahudiya wa fi mahal al bara min nahar al Ordon, wa nas ja le huwo tani mara. Huwo kan alimu umon tani mara, ze kulu yom. ² Baad dak Phariseen ja le huwo ashan bi jeribu huwo wa umon asalu, "Hal huwo ganuni ashan Rajil bi talagu mara tou?" ³ Huwo juwabu, " Musa kelimu le intum shunu?" ⁴ Umon kelimu, " Musa rudu ashan rajil bi katibu waraga talag wa baad dak bi turudu mara de." ⁵ Yesua kelim le umon " Ashan gulub takum al gowi yau Musa katibu le intum ganun de, " ⁶ Lakin min bidaya ta kaliga, ' Allah kalagu Rajil wa Mara,' ⁷ Be sabab de rajil bi sibu bet ta abu wa uma tou wa bi limu ma mara tou, ⁸ Wa itniin bi kun jisim wahid. 'Umon biga ma itniin, Lakin jisim wahid. ⁹ Ashan kida haja al Allah limu sawa, kede insan ma ferigu. ¹⁰ Zaman umon biga fi bet, talamiz tou asalu huwo tanimara an kalam de. ¹¹ Huwo kelimu le umon, " Ai zol al talagu mara tou wa jowzu mara tani huwo amulu zina ma hiya. ¹² Iza kan mara talagu rajil tou wa hiya jowzu rajil tani hiya amulu zina." ¹³ Baad dak umon jibu iyal tomon al sukar le huwo ashan huwo bi lemesu, lakin talamiz abusu umon. ¹⁴ Lakin zaman Yesua aiynu, huwo kan ma moksut wa Huwo kelimu le umon, " Kede iyal sukeriin del ja le ana, wa ma takum abusu umon, ashan molokut ta Allah le del al ze umon. ¹⁵ Hagiga ana bi kelim le intum, " Ai zol al ma gabilu molokut ta Allah ze jena sukeir de huwo ma bi dakalu fogo." ¹⁶ Baad dak huwo shilu iyal del fi iden tou wa baraku umon. ¹⁷ Zaman huwo bada safar, fi zol tani jere wara huwo wa dengir gidam huwo wa asalu, " Ya mualim al kwes, ana bi amulu shunu ashan ana bi ligo haya al abadiya?" ¹⁸ Yesua kelim, "' Lee inta gi nadi ana kwes? mafi zol kwes ila Allah bes. ¹⁹ Inta arufu wosiya al bi gul mata katulu, mata amulu zina, mata seregu, mata shahid be kizib, mata kabasu, ihterim abu taki wa uma taki."' ²⁰ Zol de kelim, " Ya Mualim, ana hafisu hajat de kulu min zaman ana sukeir." ²¹ Yesua aiynu le huwo wa hibu huwo. Huwo kelim le huwo , " Fi wahid haja al nagis le inta. keli int biyu kulu hajat al inta indu, wa wodi le nas al masakiin, wa inta bi ligo hisab fi sama. Yala taal, dowru wara tai." ²² Lakin ashan kalam de huwo tala haznan wa huwo ruwa, leanu huwo indu mali ketir. ²³ Yesua aiynu hawlu wa huwo kelimu le talamiz tou, " Huwo saab shedid le nas al ganiyaniin ashan bi dakalu fi molokut ta Allah!" ²⁴ Talamiz kan istagarab min kelimat tou de. Lakin Yesua kelimu le umon tani mara, " Ya iyal, huwo saab shedid ashan inta bi dakalu fi molokut ta Allah! ²⁵ Huwo besit le jemel shan bi dakalu fi hufura ta ibra min zol al ganiyan ashan bi dakalu fi molokut ta Allah." ²⁶ Umon kan mustagrabiin shedid wa kelim le baad tomon, " Biga munu yau bi ligo kulasa? ²⁷ Yesua aiynu le umon, wa kelimu, " De mustehil le nas, lakin ma le Allah, kulu hajat mumkin le Allah." ²⁸ Butrus bada kelim le huwo, " Aiynu, nina sibu kulu hajat wa ja wara taki. ²⁹ Yesua kelimu, " Hagiga ana bi kelim le intum, mafi zol min intum al sibu bet au akwana au ikuwat au uma aw abu au Iyal au awutan ashan ana wa kalam injil. ³⁰ Munu ma bi ligo miya marat wa ketir fi duniya de: biyut wa akwana wa ikuwat wa umahat wa Iyal wa awutan ma taab, wa fi duniya al bi ja, haya abadiya. ³¹ Lakin nas kutar al kan awel bikun akir, wa al akir bikun awel." ³² Umon kan fi sika bi ruwa fi Urselim, wa kan Yesua gi ruwa gidam tomon. Talamiz kan mustagrabiin, wa nas al kan gi dowru wara de kan gi kafu. Biga Yesua shilu talamiz shuwiya beyid wa bada kelim le umon an shunu al gerib bi hasil le huwo. ³³ "Asuma takum, nina gi ruwa fi Urselim,wa Ibin al insan bi selimu le reis al khahana wa kataba. umon bi hukumu huwo bi mutu, wa bi selimu huwo le wathanyiin. ³⁴ Umon bi alisu huwo bi tufu buzak le huwo, wa bi katulu huwo, Lakin fi yom nemira talata huwo bi gum." ³⁵ Yakub wa Yuhana, iyal ta Zebedee, ja le huwo wa kelimu, "Ya Mualim, nina deir keli inta amulu le nina haja al nina asalu min inta." ³⁶ Yesua kelim le umon, "Intum deiru keli ana amulu le intum shunu?" ³⁷ Umon kelim " Asuma le nina ashan nina bi geni ma inta fi mejid taki, wahid fi iden taki yemin wa tani fi iden taki al shamal. ³⁸ Lakin Yesua kelimu le umon, " Intum ma arufu haja al intum gi asalu de. Hal intum bi agdeir ashan bi ashrub kas al ana gi ruwa ashrubu de au agdeir mamudiya al gi ruwa amidu ma ana de?" ³⁹ Umon kelim le huwo, " Nina bi agdeir." Yesua kelim le umon, " al kas al ana gi ruwa asurubu de, intum bi asurubu, wa intum kaman bi amidu be mamudiya al amidu ma ana. ⁴⁰ Lakin le zol al bi geni fi iden yemin tai aw fi iden shamal tai ma ana yau gi wodi, lakin le nas al jahizu. ⁴¹ Zaman bagi ashara talamiz de asuma kalam de, umon bada tala zalaniin min Yakub wa Yuhana. ⁴² Yesua nadi umon le huwo wa kelim, " Intum arufu le nas al gal umon ruasa ta umam gi seitar le umon, wa nas al kubar tomon gi marisu sulta fi ras tomon. ⁴³ Lakin de ma bi kun fi nus takum, ai zol al deir ashan bi kun kebir fi nus takum lazim bikun kadam takum, ⁴⁴ Wa ai zol al deir ashan bi kun awel fi nus takum lazim bikun abid le nas kulu. ⁴⁵ Ashan Ibin al insan ma ja ashan bi akdimu, Lakin ashan bi kadimu nas, wa ashan bi wodi haya tou le ajil nas kulu. ⁴⁶ Umon ja fi Jericho. Zaman huwo tala min Jericho ma talamiz tou wa nas kutar, kan weled ta Timaeus, al huwo Bartimaeus, al amiyan gi geni fi taraf sika ashan bi asadu. ⁴⁷ Zaman huwo kan asuma inu de Yesua al Nasiri, huwo bada kore wa kelim, "Ya Yesua, ibin Daudi, amulu maruf le ana!" ⁴⁸ Nas kutar kore kore ma zol al amiyan de, ashan bi askut. Lakin huwo kan biga kore shedid, Yesua ibin ta Daudi, amulu maruf le ana!" ⁴⁹ Yesua wogifu wa kelimu gal kede nadi huwo, umon nadi zol al amiyan de, umon kelim le huwo, " kun shuja! gum fok! Huwo gi nadi inta." ⁵⁰ Huwo jada gumas tou bara, wa gum ja le Yesua. ⁵¹ Yesua juwabu huwo wa kelim, " Inta deiru keli ana amulu le inta shunu?" Zol al amiyan de kelim, "Mualim, ana deiru aiynu tani." ⁵² Baad dak Yesua kelim le huwo, " Ruwa. Imaan taki aliju inta," Tuwali huwo bada aiynu tani mara, wa huwo bada ruwa wara Yesua fi sika