¹ Baad dak Roho shilu Yesua le beriya ashan sitan bi jeribu huwo. ² Zaman huwo kan saim arbein yom nahar wa leil, huwo biga jiyan. ³ Sitan ja wa kelim le huwo, ''Kan inta sei Jena ta Allah, aglibu hujar del ashan bikun esh.'' ⁴ Lakin Yesua juwabu wa kelimu le huwo, ''huwo moktub, 'insan ma bi ish ashan esh bes lakin be kulu kelima al bi ja min kasma ta Allah.'' ⁵ Baad dak sitan shilu huwo le Medina Al mukudas wa kutu huwo fi akir mahal ta ras Kenisa, ⁶ wa kelim le huwo, '' Kan inta sei Jena ta Allah, Jadau nefsak tehet, fa huwo moktub, ' Huwo bi amiru malaikat tou bi shilu musulia taki,' wa, 'Umon bi alagu inta be idan tomon. ashan inta ma bi dugu kura taki fi hajer.'' ⁷ Yesua kelim le huwo, Tanimara huwo moktub,' Mata jeribu Rabana Allah taki.'' ⁸ Tanimara, Sitan shilu huwo le jebel al fok shedid wa wori le huwo kulu mamalika ta Alam ma kulu hajat al fogo. ⁹ Huwo kelimu le huwo ''Anna bi wodi le inta kulu hajat del, kan inta dengir tehet wa abidu ana.'' ¹⁰ Baad dak Yesua kelimu le Huwo, ''Ruwa bara min hina Sitan! Fa huwo moktub, '' Inta bi abidu Rabana Allah taki, wa inta bi kadimu huwo bes.'' ¹¹ Baad dak sitan sibu huwo, wa malaikat ja khadimu huwo. ¹² Zaman Yesua asma gal gobudu Yuhana, huwo tala le Jelil. ¹³ Huwo sibu Nazareta wa ruwa geni fi Capernaum, al gerib ma bahar ta Jelil, fi hudud ta Zebulum wa Naphatli. ¹⁴ De hasal ashan bi kamilu kalam al nebi Isaiah kelimu, ¹⁵ ''Ardi ta Zebulum wa Ardi ta Naphtali, gerib le bahar, aksa Ordon, Jelil ta Nas al geir Yahudiyin! ¹⁶ Nas al kan gaidin fi duluma umon shafu nur al azim, wa del al kan gaidin fi iklim wa dul ta mutu, fog umon nur gam.'' ¹⁷ Min zaman dak Yesua bada beshiru wa kelimu, ''Tuub, ashan molokut ta sama biga ja Gerib.'' ¹⁸ Ze ma huwo masi gerib ma bahar Galileya, huwo aiynu itnin akwan, Samaan al bi nadi butrus, wa Andraus aku tou, bi jada sabaka fi bahar, umon kan sayadin ta gobudu samak. ¹⁹ Yesua kelim le umon, ''Talu, warai, wa ana bi kutu intakum ashan bi gobudu nas.'' ²⁰ Tawali umon sibu sabaka wa ruwa warau. ²¹ Ze ma Yesua bi ruwa min hinak huwo aiynu itnin akwan al tanin, Yakub weled ta Zebedayo, wa Aku Yuhana. umon kan fi murkap ma abu tomon bi salau shabakat. Huwo nadi umon, ²² wa umon sibu murkab wa abu tomon wa ruwa wara tou. ²³ Yesua ruwa fi kulu makan ta Galileya, bi derisu fi biyut ta salawat, bi bashiru an injil ta molokut, wa bi aliju amrat wa ayanat bein al nas. ²⁴ Kabar an huwo kan ruwa fi kulu Syria, wa nas jabu le huwo del al kan ayanin ma ayanat mukhtelif wa waja gisim, nas al kan moskunin be aruwa sherir. wa al indum marad sarrah wa shalal. Yesua aliju umon kulu. ²⁵ Adad kebir min nas ruwa wara huwo min Galileya, Decapolis, Urselim, wa Judeya, wa aksa Ordon.