¹ Baad Yesua weledu fi Bethlaham ta Yahudiya fi ayam ta Herodos al Melik, nas ulama min sherik wosulu Urselim kelimu, '' ² Wenu huwo al weledu Melik ta Yahud? Nina sufu nijima tou fi sherik wa nina ja ashan bi abidu huwo.'' ³ Zaman Herodos al melik asma kalam de, huwo ma Urselim kulu kan zalanin, ⁴ Herodos limu kulu ruasa ta khahana wa baad min nas, wa huwo asalu umon, ''Bi weledu Al Mesih wen?'' ⁵ Umon kelimu le huwo, ''Fi Bethlaham ta Yahudiya, fa da yau al kan anbiya katibu, ⁶ Lakin inta Bethlaham, fi ardi ta Yahud, ma yau akhir fi wosat ta khadad ta Yahud, fa min inta bija reis al bi suf nas bitai Israel.'' ⁷ Baad dak Herodos nadi rijal al uluma de wa asalu umon be dapt yatu zaman nijima de kan zahir. ⁸ Uwo rasulu umon le Bethlaham, kelimu, ''Ruwa wa fetisu jena al suker de be teriga kwes. Kan intum ligo huwo, jibu kabar de le ana, ashan ana kaman bija wa abidu huwo.'' ⁹ Baad umon asma kalam ta melik, umon ruwa, wa nijima al umon kan sufu fi sherik mashi gidam tomon lahadi ja wogifu fi mahal al jena de fogo. ¹⁰ Zaman umon aiynu nijima de, umon farhanin be fara azim. ¹¹ Umon ruwa fi bet wa aiynu Jena Al suker ma uma tou Mariam. Umon dengiru tehet wa abidu Huwo. Umon fata santat tomon wa gedimu hadaya tomon dahab, Luban, wa Bohur. ¹² Allah anziru umon fi hilim ma kede raja le Herodos, wa umon raja le beled tomon be sika tani. ¹³ Baad umon ruwa, malaika ta Rabuna zahir le Yusif fi hilim wa kelimu, '' gum fok, shilu jena al suker de ma uma tou, wa jere takum le Masir. geni takum hinak lahadi ana bi wori le intum. Fa Herodos bi fetis jena al suker de ashan bi Katulu. ¹⁴ fi bilel dak Yusif gam wa shilu jena al suker de wa uma tou wa jere le Masir. ¹⁵ Huwo geni hinak lahadi mutu ta Herodos. De kamilu kalam al Rabuna kelimu be wasat anbiya,'' min Masir ana nadi jena tai.'' ¹⁶ Baad dak Herodos, Zaman huwo aiynu be inu uluma del kabasu huwo, huwo biga zalan kalis. Huwo rasulu wa katulu kulu iyal sukerin al awulad al kan fi Bethlaham wa fi kulu akalim al iyal indu itnin sena wa tehet itnin sena, be asab zaman al rujal ulama kelim be dabt. ¹⁷ Baad dak kalam al kan Nebi Jeremiah wonusu hagag nefsu, ¹⁸ ''Sot kan asmau fi Ramah, kore wa huzun shedid, Rakele bi kore ashan iyal tou, Wa hiya aba taziya, leanu umon biga mafi.'' ¹⁹ zaman Herodos maat, malaika ta Rabuna zahar fi hilim le Yusif fi Masir wa kelimu, ²⁰ ''Gum fok wa shilu jena ma uma tou wa ruwa le beled ta Israel, del al kan deir katulu jena de mutu.'' ²¹ Yusif gam, shilu jena wa uma tou wa ja fi ardi ta Israel. ²² Lakin zaman huwo asma be-inu Archelaus bi hakimu Yahudiya fi mahal ta abu Herodos, huwo kan kafu ashan bi ruwa hinak. baad Allah anziru huwo fi hilim, Huwo ruwa le iklim ta Galileya ²³ wa ruwa ashan geni fi medina isim tou Nazaretha. De kamilu kalam al kan wonusu be wasat al anbiya, ashan bi nadu huwo Nazarene.