¹ Yesua dakaulu wa kan bi ruwa min Ariha. ² Kan fi rajil inak isimu Zakayo. Huwo kan rais ta daayib wa kan ghani. ³ Huwo kan hawil ashan ayenu Yesua, lakin huwo ma agder min jumhuur al ketir la anu huwo kan gaser fi tul. ⁴ Fa huwo jere gidam ta nas wa nutu fi shejera jemeza ashan bi ayenu huwo, lakin Yesua kan bi ga der ruwa. ⁵ Zaman Yesua ja le mahal, huwo ayenu fok wa kelim le huwo, ''Zakayo, nezil tihit sere, la anu alela Ana der ruwa fi bet taki. ⁶ ''Fa huwo sere nezil tihit wa rahibu huwo ma fara. ⁷ Zaman kulu zol ayenu kede, humon kulu neng neng, kelim, ''Huwo ruwa ziyara le zol al huwo katti.'' ⁸ Zakayo wogif wa kelim le Rabuna, ''Ayenu, Rabuna, nus ta hajat tai Ana bi wodi le meskin, wa iza ana zulumu aye zol fi aye haja, Ana bi rija arba marat.'' ⁹ Yesua kelim le huwo, ''Alela kulasa ja fi bet de, la anu huwo kaman jena ta Abraham. ¹⁰ La anu jena ta insan ja ashan bi fitisu wa kalisu nas al wodoro,'' ¹¹ Ze ma humon asuma hajat del, huwo istemir onusu wa wori misal, la anu huwo kan gerib ma Uruselim, wa humon fekeri inu malakuut ta Allah kan bi beinu tuwali. ¹² Ashan kede huwo kelim, ''Zol tani muhim ruwa le mahal beid ashan bi shilu le nefsa tuo malakuut wa bi rija. ¹³ Huwo nadi ashara min kadamin tuo wa wodi le humon, ashara amanat ishtakal lahadi kan ana rija wara. ¹⁴ Lakin moatinin akra huwo wa rasulu mojomu ta nas wara huwo, kelim, 'Anina ma der rajil de bi hukumu anina, ¹⁵ huwo hasil wokit huwo rija wara tani, bad ma huwo shilu malakuut, huwo amiru al kadamin al huwo wodi gurush le humon ashan bi nadi le huwo, inu huwo bi arufu yatu maksab humon ligo ma amulu tijara. ¹⁶ Al awel ja gidam tuo, kelim, 'Rabuna amana taki bi ga tala ashara tanin. ¹⁷ Al zol mohim kelim le huwo, ''Tamum kadam al kwes. La anu inta kan amin fi soker, inta bi indu sulta fi ashara modun. ¹⁸ Al tani ja, kelim 'Amana taki Rabuna, tala kamsa amanat. ¹⁹ Zol al mohim kelim, 'Inta shilu mosulia sulia ta kamsa modun. ²⁰ Tani ja, kelimu, 'Rabuna amana taki yau de ini, al ana hafizu kwes fi gumash, ²¹ la anu ana kan kayif min inta, la anu inta zol saab. inta bi shilu haja al inta ma kutu, wa inta bi gata haja al inta ma zara. ²² Zol al mohim kelim le huwo, Ma kelimat taki Ana bi hukumu inta, inta kadim al sherir. Inta arufu ana zol al der, bi shilu haja al ana ma kutu wa gata haja al ana ma zara ²³ Yala lei inta ma kutu gurush tai fi benki, ashan kan ana rija ana bi limu humon ma ribeh?' ²⁴ Zol al mohim kelimu le humon al wogif, Shilu bara min huwo al amana, wa wodi le huwo al indu ashara. ²⁵ Humon kelimu, Rabuna huwo indu ashara. ²⁶ Ana kelim le intum, inu kulu wahid al indu bi wodi ketir, lakin min huwo al ma indu, hata al huwo indu bi shilu bara. ²⁷ Lakin adu tai al humon ma der ana bi hukumu humon, jibu humon ini wa katulu gidam tai.'' ²⁸ Zaman huwo kelim hajat del, huwo ruwa gidam, le Uruselim. ²⁹ Zaman huwo ja gerib le Bethphage wa Bet ania, le jebel zeitun, huwo rasulu etnin min al talamiz, ³⁰ kelim, ''Ruwa fi beled tani. kan inta dakalu inta bi ligo humar soker ma geni fogo. Fiku wa jibu le ana. ³¹ Kan aye zol asalu inta, 'lei intum bi fiku? kelim, Rabuna muhtaj. ³² Del al kan rasulu wa ligo al humar ze ma Yesua wori le humon. ³³ Ze mayadum humon kan bi fiku humar, siyadum kelim le humon, Lei intakum bi fiku humar? ³⁴ Humon kelim, ''Rabuna muhtaj. ³⁵ Humon jibu le Yesua, wa humon jada gumash tomon fi humar wa Yesua arkab fogo. ³⁶ Ze ma huwo ruwa, humon ferisu gumash tomon fi sika. ³⁷ Ze ma huwo bi wosulu le mahal al jebel al zeitun, nas ketir min talamiz bada afra wa mejdo Allah ma sout kebir le amayiel al kebir al humon ayenu. ³⁸ kelim, ''Baraka huwo melek al ja fi isim ta Rabuna! Salam fi sama wa mejid fok!'' ³⁹ Bad min al Firiseen fi nas al ketir de kelim le huwo, ''Mo alim, sakitu talamiz taki. ⁴⁰ Yesua juabu wa kelim, '' Ana wori le intum, kan humon asukut, al hijar bi kore.'' ⁴¹ Zaman Yesua wosulu fi medina, huwo kore, ⁴² kelim. ''Kan ita kan arufu yom de, hata inta, al hajat jibu salam le inta! Lakin humon dusu min ena taki. ⁴³ La anu al ayam bi ja fogo inta wokit adu bi abinu hosh hawoli inta wa humon bi asuru inta min kulu tija. ⁴⁴ Humon bi kasuru inta tihit fi hufura, wa iyal taki, Humon ma bi sibu hajer fi ras hajer la anu inta ma arufu zaman al kan Allah bi hawil kalisu inta.'' ⁴⁵ Yesua dakalu fi kenisa wa bada turuju del al kan bi beau hajat, ⁴⁶ kelimu le humon, ''Huwo muktub, 'Bet tai bi kun bet ta salawat, lakin intum amulu huwo mahal ta haramia,'' ⁴⁷ Fa Yesua kan bi derisu kulu yom fi kenisa. Rais ta kahna wa kataba wa mo sulin ta nas der katulu huwo, ⁴⁸ lakin huwomon ma ligo teriga la anu kulu nas kan bi kutu bala wa bi asuma le huwo.