¹ kutar hawiel ashan bi katibu an hajat al timu fi nus tanina, ² bes ze ma humon kan selimu humon le nina, humon al min bedaya kan shuhudin wa kudam ta kelima. ³ Ashan keda le ana huwo bi beinu kwes - bi digkha hagigu sabab ta kulu hajat del min bedaya - ashan bi katibu le inta bi nezam, Theophilus al aziz. ⁴ De ashan intum bi arufu al hagiga an hajat derisu le intum. ⁵ Fi ayam ta melek, Herodus ta Yahudiya, kan fi kahiin (Abuna) tani isim tuo Zechariah, min firikha ta Abijah. Mara tuo min banat ta haroon wa kan isim ta heya Elizabeth. ⁶ Humon kan kulu nedifiin fi gedam ta Allah, humon ihteramu kulu wosia wa gawaniin ta Rabuna. ⁷ Lakin humon kan ma indu jena, la anu Elizabeth kan ma bi weledu, humon kan kulu biga kubar fi umuur fi zaman dak. ⁸ Fi zaman al Zechariah kan fi gedam ta Allah, bi amulu shokol ta kahiin bi nizam ta firikha tuo. ⁹ Hasab teriga ta adaat ta kahnuut ta azilu yatu kahiin yau bi kadimu azilu huwo ma nas ketir ahan bi dakalu fi haikal ta Rabuna ashan bi haragu bakuur. ¹⁰ Kulu nas al limu kan bi seli bara fi zaman al kan bi haragu bakuur. ¹¹ Hasa zahir le huwo malayika ta Rabuna wa wogif fi tija yemiin ta mazbah ta bakuur. ¹² Zaman Zechariah ayinu huwo, huwo kan kala wa kafu waga fogo huwo. ¹³ Lakin malayika kelim le huwo, ''ma ta kafu, Zechariah, la anu salawat taki asumau. Mara taki Elizabeth bi weledu le inta jena. Inta bi nadi isim tuo Yuhana. ¹⁴ Inta bi indu farah wa mokosuut, wa ketir bi afrah bi welada tuo. ¹⁵ La anu huwo bi kun kebir fi ena ta Rabuna. Huwo ma bi ashirab merisa aw shiraab al gowi, wa huwo bi mala ma Roho al kuduus min batna ta uma tuo. ¹⁶ Ketir min nas ta Israel bi rija le Rabuna Allah tomon. ¹⁷ Huwo bi ruwa gedam ta wosa ta Rabuna fi Roho wa gowa ta Elijah. Huwo bi amulu de ashan bi rija guluub ta abuhaat le iyal, ashan nas al ma bi ihteramu bi dowuro fi hikma ta adalla - ashan bi jahizu le Rabuna nas al jahizu le huwo.'' ¹⁸ Zechariah kelimu le malaika, ''kef ana bi agder arufu de? Ana rajil kebir wa mara tai kebiir shedid. '' ¹⁹ malaika juwabu wa kelim le huwo, ''ana Jibiriel, al wogif fi gedam ta Allah. Rasulu ana ashan bi wonusu le inta, bi jibu le inta kabar al kwes de. ²⁰ inta ma bi wonusu, lahadi hajat de bi hasil. De ashan inta ma amin fi kelimat tai, al bi kamilu fi zaman al sah. '' ²¹ Hasa nas bi istena Zechariah. Humon kan mustagarabiin huwo bi shilu zaman ketir fi haikaal. ²² Lakin zaman huwo tala bara, huwo ma bi agder wonusu le humon. Humon la hizu bi inu huwo ayinu ruya fi zaman huwo kan fi haikaal. Huwo geni amulu ishara le humon wa huwo fadulu ma bi wonusu. ²³ Wa ja fi zaman al ayam ta kidma tuo kalasu, huwo ruwa le bet tuo. ²⁴ Bad ayamat del, mara tuo Elizabeth hamil wa kamsa shahar heya dusu nefsa tuo. Heya kelimu, ²⁵ de yau haja al Rabuna amulu le ana zaman huwo ayinu le ana ma neima ashan bi shilu fadiya tai fi gedam nas.'' ²⁶ Fi shahar nimra sita, al malaika Jibiriel kan rasulu min Allah le medina fi Jeilel isimu Nasira, ²⁷ le azra muktuba le rajil kan ismu Yousif. Huwo min usra ta Dauud, wa azra kan ismu Marriam. ²⁸ Huwo ja le heya wa kelim, ''salam le inti, al indu neima! Rabuna huwo ma inti. ²⁹ Lakin heya kan kafu shedid ma kelimat tuo wa heya istagarab de yatu salam ze de. ³⁰ Al malaika kelimu le heya, '' Ma ta kafu Marriam, la anu inti ligo neima ma Allah. ³¹ Ayinu inti bi hamil fi batna taki wa inti bi weldu jena. inti bi nadi isim tuo ' Yesua. ' ³² Huwo bi kun azim wa bi nadi Jena al ta fok. Rabuna Allah bi wodi le huwo al kursi ta jedo tuo Dauud. ³³ Huwo bi hukumu le bet ta Yakub elel abad, wa malakuut tuo ma bi kun indu nihaya. '' ³⁴ Marriam kelimu le malaika, ''Kef de bi hasil, wa ana ma nuum ma ayi rajil?'' ³⁵ Al malaika juwabu wa kelimu le heya, ''Al Roho al kuduus bi ja le inti, wa gowa min fok bi ja le inti. Biga al kuduus al bi weledu bi nadi Jena ta Allah. ³⁶ Ayinu, nesiba taki Elizabeth kaman hamil ma jena fi umur al kebir. De yau shar nimira sita le heya, al kan bi kelimu gali ma bi weledo. ³⁷ Ashan ma fi haja gowi le Allah. ³⁸ '' Marriam kelim, '' Ayinu, ana mara al kadam ta Rabuna. Kede timu le ana ze ma inta kelim. '' bad dak malaika sibu heya. ³⁹ Bad dak Mariam gum fi zaman dak wa ruwa bi sura le beled ta jubaal, le madina fi Yahudia. ⁴⁰ Heya ruwa fi bet ta Zechariah wa selimu Elizabeth. ⁴¹ Zaman Elizabeth asuma salam ta Mariam, jena al fi batna tuo harig, wa Elizabeth kan mala ma Roho al kuduus. ⁴² Heya arufa sout tou wa kelim, Mubarak inta fi nus ta nuswan,wa mukarak samar ta batna taki. ⁴³ Le bi hasil le ana inu uma ta Rabuna bi ja le ana? ⁴⁴ Ayinu, zaman sout ta salam taki wosolu fi adana tai, jena al fi batna tai harik be farah. ⁴⁵ Baraka le heya al amin gali kalam al wonosu min Rabuna be timu le heya. ⁴⁶ Mariam kelim, ''nefsa tai bi sabihu Rabuna, ⁴⁷ wa roho tai afra fi Allah mukalis tai ⁴⁸ v 48 La ano huwo ayenu le zorof ta kadam tou al mara. Ayenu, min allela kulu ajiyal be nadi ana mubark. ⁴⁹ Ashan kebir bito huwo amulu hajat azem le ana, wa isim tou kuduus. ⁵⁰ Rahma tou be gani min jeel le jeel le del al be kafu huwo. ⁵¹ Huwo zahir gowa ta tuo; ferteku del al mutakabriin fi gulub tomon. ⁵² v 52 Huwo shilu sulta min umara wa arufa del al hala tomon deif. ⁵³ Huwo mala al-jeanin be hajat al-kuwes, lakin al- ghaniyanin huwo rasulu humon fadi. ⁵⁴ Huwo wodi musada le Israel khadim tou, wa zekeru ashan be beinu rahma ⁵⁵ (ze ma huwo kan kelimu le abuhat ta nina) le Ebrahim wa iyal tou lel abad. ⁵⁶ Marriam kan geni ma Elizabeth fatra ta talata shahar baad dak heya rija le bet. ⁵⁷ Wokit zaman jaa le Elizabeth ashan be weledu heya kan weledu weled. ⁵⁸ Jeranat wa ahal ta heya kan asuma inu Rabuna zahir rahma tuo al kebir le heya, humon kan farhanin sawa ma heya. ⁵⁹ Fi yom nemra temeniya humon kan ja ashan be taharu jena.Humon kan der wode isim "Zeckariya,' ashan abu. ⁶⁰ Lakin umma tuo kan kelim, "la. Isim tuo Yohana". ⁶¹ Nas kan kelimu le heya," mafi zol fi usra takum gi nadi be isim de". ⁶² Kan amulu ishara le abu ta tuo an isim al huwo der kutu le jena de. ⁶³ Abu de kan asalu kitab wa katibu, "Isim tuo Yuhanna". Humon kan kulu istagrab. ⁶⁴ Baad dak kasuma ta Zakariya kan fata wa huwo biga gi wonosu.Huwo wonosu wa guna le Allah. ⁶⁵ Kafu kan dakalu le kulu jerenat ta tou. Kalama de kan intshir fi kulu jebal ta medina Judeya. ⁶⁶ Del al asuma kabar de humon hafizu fi geliba, wa kelim," jena de bi tala shunu baden?" la anu ida ta Rabuna kan fi ma huwo. ⁶⁷ Abu ta tou Zakariya kan mala ma Roho Al- Kudus wa itnabaa, gali, " ⁶⁸ Tesbeh le isim ta Rabuna, Allah ta Israel, le anu huwo ja le musadda wa timu kalas le nas ta tuo. ⁶⁹ Huwo arufa gurun ta khalas le nina fi bet ta Dauud khadam tuo ⁷⁰ ze ma huwo wonuso be wasat ta anbiya tuo al kudusiin al kan fi zaman al bedri. Huwo be jebu ⁷¹ khalas min adu tanina wa min eda ta nas al bi amulu anina batal. ⁷² Huwo bi amulu ze de ashan bi wori rahma le abuhat tanina wa bi zekir itifagia tuo al mukadas, ⁷³ halifa al huwo wonusu le Ibrahim abu ta nina. ⁷⁴ Huwo halifo le nina inu anina, hariru anina min eda ta adu tanina, bi kalisu huwo bidun kafo, ⁷⁵ fi kadasa wa adeel fi gidam tuo kulu ayam. ⁷⁶ aye, wa intum, iyal bi nadi nebi ta Allah al fok, le anu inta bi ruwa gidam wusa ta Rabuna ashan bi jahizu sikat tuo, ashan bi jahizu nas le ja tuo, ⁷⁷ ashan bi wodi marifa ta kulasa le nas tuo bi wasat gufuran le kataya tomon. ⁷⁸ De bi hasil ashan Rabuna ta nina indu rahma ketir le nina, nur ta shemish gi wala min fok ashan saido anina, ⁷⁹ bewala le del al be geni fi duluma wa fi dul ta mutu. Huwo gi amulo zede ashan saidu kura ta nina daurru fi sika ta salam. ⁸⁰ Hasa Jena de raba wa biga guwi fi roho, huwo kan geni fi sahara la hadi yom al huwo ja zahir le Israel.