¹ Baad ma Ehud mutu, Iyal ta Israel tani mara amulu shar fi gidam ta Rabuna. ² Rabuna wodi humon fi iden ta Jabin melik ta Canaan al gi hakimu fi hazor, kaid ta tou isim tou Sisera, wa huwo gi geni fi Harosheth Haggogim. ³ Iyal ta Israel kore le Rabuna ashan musada, leanu Sisera indu tusumiya(900) arabiya ta husan wa huwo azibu iyal ta Israel be guwa le feterat Ishirin (20) sena. ⁴ Biga Deborah mara al nebi(mara ta Lappidoth) kan yahu Gadi ta Israel fi zaman dak. ⁵ Hiya kan gi geni tehet shejera ta nahal ta Deborah beinu Ramah wa Bethel fi jebel ta Ephraim, wa iyal ta Israel gi ja le hiya ashan bi hilu masakil tomon. ⁶ Hiya rasulu ashan bi nadi barak jena ta Abinoam min Kedesh fi Naphatali. Hiya kelim le huwo, Yahweh Rabuna ta Israel amiru inta inu keli inta ruwa fi jebel ta Tabor, wa silu ma inta ashara alif (10,000) rujal min Naphtali wa Zebulum. ⁷ Ana bi jibu le inta sisera kaid ta Jesh ta jabin, ashan bi gabilu inta fi bahar ta Kishon, be kulu arabat bitou wa jesh bitou, wa ana bi wodi le inta nusra ashan bi demiru huwo, ⁸ Barak kelim le hiya, Iza kan inta bi ruwa ma ana bi ruwa, lakin iza kan inta aba ruwa ma ana , ana ma bi ruwa, ⁹ hiya kelim ana bi ruwa ma inta, lakin sika al inta gi douwuru fogo de ma jibu le inta karama. Ashan Rabuna bi wodi Sisera fi iden ta mara, biga Deborah gum fok wa ruwa ma barak le Kedesh, ¹⁰ Barak nadi rujal ta Zebulum wa Naphtali ashan bi ja lelimo fi Kedesh. Ashara alf rujal ruwa ma huwo, wa Deborah ruwa ma huwo. ¹¹ Lakin Heber(al Kenite huwo bara min Kenitiin- Humon usura ta Hobab(Nesiba ta Musa)- wa huwo dugu khima tou fi Oak fi Zaannim gerib ma Kedesh. ¹² Zaman humon kelim le Sisera inu Barak jena ta Abineam wosulu fi jebel ta Tabor. ¹³ Sisera nadi wa limu kulu jesh tou wa arabat tou al kan ma huwo, min Harosheth Haggoyim le nahar ta Kishon. ¹⁴ Deborah kelim le Barak, ruwa! De yahu yom al Rabuna wodi le inta nusra did Sisera. De ma Rabuna yahu gi gedimu inta? Biga Barak nezil tehet min jebel Tabor ma ashara alf rojul gi ja wara tou. ¹⁵ Rabuna lakbatu Sisera wa kulu jesh tou wa hasiin tou bes be kasuma ta seaf. Wa Sisera nezil tehet min husan tou wa jere be Kureyiin. ¹⁶ Lakin Barak istemir ashan bi hajimu jesh ta Sisera lahadi fi Harosheth Haggoyim, wa katulu kulu jesh ta Sisera bi kasuma ta seaf, wa mafi zol wahid al naja. ¹⁷ Lakin Sisera jere be kureyiin lahadi fi khema ta Jael, mara ta Heben al ta Kenite, ashan kan fi salam beinu Jabin melik ta Hazor wa usura ta Heber al ta Kenite. ¹⁸ Jael tala bara ashan bi gabilu Sisera,wa kelimu le huwo, fadal, taal ya seid taal le ana, mata kafu, biga huwo ja le hiya wa ruwa fi khema ta hiya, wa hiya kati huwo ma bataniya. ¹⁹ huwo kelim le hiya, min fadlak wodi le ana moya shirab, leanu atshan. Hiya fata kis ta leben wa wodi le huwo ashan huwo ashrabu. Wa biga reja kati huwo tani mara, ²⁰ huwo kelimu le hiya, wogif fi bab khema de iza kan ai zol ja asulu inta gal sei fi ai zol juwa khema hini? Kelimu la. ²¹ biga Jael(mara ta Heber) shilu hadid ta khema wa shakush fi iden ta hiya wa dakalu le huwo juwa fi seir leanu kan num shilu shedid, yala hiya dugu hadid ta khema de fi ras tou lahadi gedu be hinak fi turab wa huwo mutu. ²² wa zema Barak gi turudu Sisera, Jael tala bara ashan bi gabilu huwo wa kelim le huwo, taal ana bi wori le inta rajil al inta gi fetisu biga huwo ruwa juwa ma hiya, huwo ja ligo Sisera num tehet meit ma hadid ta khema de fi ras tou. ²³ Biga fi yom dak Rabuna nezil Jabin melik ta Canaan tehet iyal ta Israel. ²⁴ Guwa ta iyal ta Israel raba wa tala gowi did Jabin melik ta Canaan, lahadi humon demiru huwo.