¹ Kida melik Darius amal karar, wa umon fetisu bet al indu mustanadat, mahal al ta kunuz, fi Babilonia. ² Fi al mudun al reisia ta Ecbatana fi Medina kitab kan ligo; de kan sejilat tou: ³ ''Fi awel sena ta melik Cyrus, huwo sadar kara an al bet ta Allah fi Urselim: 'Kede al bet biga abinu ze makan le zebiha, kede asas tou biga kutu, kede fok tou geni sitin mitirat, wa urud tou sitin mitirat, ⁴ ma talata sufuf ta hujar kubar wa saf ta loho jedid, wa kede al taman bi dafau be al bet melik. ⁵ Hasa jibu wara al dahab wa hajat fida tabi le al bet ta Allah, al Nebuchadnezzar jabu le Babilonia min al haikal fi Urselim wa rasulu umon wara le haikal fi Urselim. Intum kede kutu umon fi al bet ta Allah.' ⁶ Hasa Tattenai, al hakim ta Wulaya Beid min Bahar, Shethar_Bozenai, wa suraka al fi al Wulaya Beid min Bahar, kelik beid! ⁷ Sibu sokol ta bet ta Allah de barau. Hakim wa shyiuk ta Yahudin bi abinu bet ta Allah de fi makan dak. ⁸ Ana amiru gali intum lazim amulu zede le shiyuk ta Yahudin delin al abinu bet ta Allah de: Daam min daraib ta melik beid min Bahar biga bi istagdimu le dafa rujal delin ashan umon ma bi wogif sokol tomon. ⁹ Ai haja al deiru-ujul, korfan, au dinan le tekdima mahruk le Allah ta sama, dura, mileh, mosrub, au zet al ahasab le al amur ta al kahana fi Urselim-wodi hajat delin le umon kulu yom bedun fasal. ¹⁰ Amulu de kida umon bi jibu al tekdima le al Allah ta sama wa seli le ana, al melik, wa awulad tai. ¹¹ Ana amiru gali kan ai wahid kalifu karar de, amut lazim bi agilau min bet tou atanu fogo. Bet tou lazim biga bi gilibu makan wasaka ashan galat de. ¹² Kede Allah al kalas sibu isim tou le geni hinak sagitu ai melik au nas al arfa ida wa kalifu karar de, au le demiru bet ta Allah de fi Urselim. Ana, Darius, yau wodi karar de. Kede huwo biga nafisu ma jidiya!'' ¹³ Baad dak ashan le karar rasulu ma Darius al melik, Tattenai, wali ta Wilaya Beid min Bahar, wa Shethar_Bozenai wa suraka tou, amulu ai haja al melik Darius kan amiru. ¹⁴ Kida al shiyuk ta Yahudin abinu wa naja terhet al dirasat ta Haggi al nebi wa Zechariah, al jil ta Iddo. Umon kalasu buniyan tomon al ahasab le al karar ta Allah ta Israel wa be al karar ta Cyrus, Darius, wa Artaxerxes al melik ta Persia. ¹⁵ Al bet kan kalasu fogo al yom al talit ta al sahar ta Adar, fi al sita sena ta hukum melik Darius. ¹⁶ Nas Israelien, kahana, Lawien, wa al sujana ta al akirin iktefilu al dekdim ta bet ta Allah de ma farah. ¹⁷ Umon gedimu miya teiran, miya korufan, wa Urbumiya dan le al dekdim ta al bet ta Allah. Itnasar galamayat abu rajil kan kaman gedimu ze tekdimat katia le kulu Israelien, wahid le ai gebila fi Israel. ¹⁸ Umon kaman wasi kahana wa Lawien le sokol al gesimu le al kidma ta Allah fi Uselim, ze huwo kan moktub fi al kitab ta Musa. ¹⁹ Kida delin al kan lisa fi mihjar iktefilu al Paska fi al yom arbatasar ta al sahar. ²⁰ Al kahana wa Lawien kulu tahiru nufus tomon wa dabahu al zabihat Pussha le kulu al kan lisa fi mihjar, kulu ma nefsa tomon. ²¹ Nas Israilien al akal juzu ta al laham Paska yau delin al kan rija min mihjar wa kalas asilu nufus tomon min al adam nadafa ta al nas ta al ard wa fetisu Yahwa, al Allah ta Israel. ²² Umon e malian farah iktefilu al Iktifal ta esh al Ma indu kemira le saba ayam, leanu Yahwa kalas jibu le umon al farah wa gilibu gelba ta melik ta Assur le gowi idenat tomon fi al sokol ta bet tou, al bet ta Allah ta Israel.