¹ Ashan keda, Ana ze mosjun ta Rabana, ana gi asalu intum ashan bi ish hasab daawa al kan nadi ma intum. ² Ana gi asalu intum ashan bi ish be tawadu wa geni kwes wa geni ma subur, kede nina geni ma baad be muhaba, ³ Amulu takum ma kulu guwa takum ashan bi hafisu wehida ta Roho fi rebaat ta salam. ⁴ Fii jesad wahid wa Roho wahid, ze ma nadi intum le raja wahid akeet min daawa takum. ⁵ Wa fii Rab wahid, iman wahid, mamudiya wahid, ⁶ Wa Allah wahid wa Al ab le kulu, al huwo fuk al kul Wa bi wasat al kul wa fi al kul. ⁷ Allah wodi neima le ai zol min nina hasab magas ta hadiya ta al Mesih. ⁸ Huwo ze ma kitab kelim: "zaman arafau huwo fuk , wa huwo gedimu al mosjuniin le Abudiya wa huwo wodi hadiyat le nas." ^{9 10} Huwo "ruwa fok" maana tou shunu, wa kaman huwo nezilu tehet fi arid? Zol al nezilu tehet huwo nefsu al zol al kaman arfau fok al samawat, inu huwo bi mala kulu hajat. ¹¹ Al Mesih wodi nas taniin bi kun rusul, taniin bi kun anbiyaa, taniin bi kun mubesheriin, wa taniin gusus wa mualimiin. ¹² Huwo wodi musuliyat de ashan bi deribunas tou al kudusiin ashan bi amulu kidma, ashan bi abinu jesad ta al mesih. ¹³ Huwo bi istemiir abinu jesad tou la hadi nina kulu bi wosulu le wehida ta iman wa maarafa ta ibin Allah, wa nina biga bi raba fi iman wa bi wosulu le magas ta kamal ta Al mesih. ¹⁴ Mesih abinu nina ashan nina tani ma bi kun zi iyal sukeriin al gi jadawu wara wa gidam wa bi hizu bi amowaj ta moyo, wa bi arfau bi ai hawa ta taalim wa kabasu ta nas al bi kutat tomon ta kedib. ¹⁵ Lakin, wonusu al hak bi muhaba, kede nina raba bi ai teriga le huwo al yau ras, de yau, Al Mesih. ¹⁶ Mesih yau abinu al jesad kulu. wa huwo limu wa murbut sawa bi hubal al gi saidu, wa kan ai juzu gi ishtakal sawa ma baad, de yau bi wodi jesad raba ashan bi abinu nefsa tou fi muhaba. ¹⁷ Ashan kida, ana kelim wa gi asalu fi Al rab, inu intum keli tani ma ish ze nas ummamiin gi ish,fi jahala ta mukh tumon. ¹⁸ Fehim tumon duluma, umon merid min haya ta Allah. ashan jahala al fi umon, ashan gulub tumon al gowi. ¹⁹ Umon ma indu fadiya. wa umon selimu jesim tumon le shahwa. wa umon gi istemiir amulu ai shikil ta najasa. ²⁰ Lakin de ma yau haja al intum alimu an al Mesih. ²¹ Ana fekiri gali intum asuma an huwo, wa kan alimu fi huwo, ze hagiga al fi Yesua. ²² Kan alimu intum ashan bi sibu hajat ta uslub ta haya takun al kan zaman, ashan intum bi sibu insan al gedim. de insan al gedim de yau ta fasad ashan niyat tou ta kedib. ²³ Alimu intum ashan bi kun jedid fi roho t mukh takum, ²⁴ Wa bi libisu insan al jedid al kalagu fi sura ta Allah-fi biir wa kadasa al hak. ²⁵ Ashan kida, keli intum sibu kidib wa keli ai zol min intum wonusu al hak ma jeran tou, leanu nina ada ma baad. ²⁶ Kelli intum kun zalaniin lakin ma keli intum amulu katiya. ma takum keli shemish waga wa intum zalaniin. ²⁷ Keli intum ma wodi fursa le sitan. ²⁸ Zol al kan gi seregu keli ma seregu tani mara. keli huwo ishtakal, keli huwo amulu shokol al kwes ma ida tou , ashan huwo bi agder shariku haja ma deel al muhtajiin. ²⁹ Keli kalam al wasaka ma tala min kasma takum. intum keli istakhdimu kelimat al gi saidu le raba nas taniin, hasab hajat al umon deiru, ashan kelimat takum keli saidu nas al gi asuma intum. ³⁰ Wa keli intum ma sibu roho ta Allah kun haznaan, ashan bi wasat huwo yau kan khatimu intum ashan yom ta kulasa. ³¹ Keli intum sibu kulu hajat al gi waja,ghadab, zalan, mukhasama ma baad, wa shetima, ma kulu anwaa ta shar. ³² Keli intum kun letifiin ma baad, haniniin ma baad, afii badun, ze Allah fi al Mesih afii intum.