¹ Yesu nge nga laki ni pi ba Andaa lenile ri pi to. ² Andaa kujo, "Karania ai Farizei'ba to ri kii komi Muze di ni di ge. ³ Disidu anyede nga borodu aia jole anyede ri, anyede nga'di pi ongu anyulunde ai. Ki anyede nga aia edele riku, adusiku kujo kii nga ra, ki ede'kii nga na ku. ⁴ O-o, kombekii teri angidulu ngile kpe ri ayo, ongu kubaa'kii ba'zi ni embe ga. Ki ai aia'nga si ejju'kii (di'angwa) di'pidi ngi're na ni ga alusaa ku. ⁵ Nga twadu aia edele ri kedee kii dudu ba kunde ai i. Adusiku kawikii lejo Rubanga di onguru kepwaki aia kanju dudu 'ba kunde ai 'ba Rubanga di i. ⁶ Karama ga te kudukii ole laru di ayo ongu ekelezia ga saa kudukii komi laru to rii, ⁷ ongu soko aga kulekii lazi laru di ayo, ongu kulekii 'ba kulungu ai laponyia. ⁸ Ki kulee anya'i anyi lungwekaa laponyia ni ku, adusiku laponyi anyidi alu alu, ongu anyi tuwadu adiinzi. ⁹ Ongu anyulungwe modizi vudige dia ri anya ataa i ni ku, adusiku anyidi ata alu, andaa ni oru rubu ge. ¹⁰ Aka'i anyi anyi'ni lungwekaa laponyi ni ku, adusiku anya laponyi alu, andaa ni Cristo i. ¹¹ Modi asare amba si anyini aga ni ri kulee kolu anya opigo i. ¹² Madi andaa ni engare oru ri evo alongwia vuru, onguru modi andaa ni longwire vuru avo engaa oru. ¹³ Ki andainjwi anyini anyi ba cara Muzee 'di ni leni'ka ri pi ni, Farizei'ba to, lunjwa-lunjwa ba to! anyolobu leti opi rubu di ri 'ba ni cwi. Adusiku anyi anyangasi anyitoru laka ku, ongu anyile 'ba zibaa esu ire kutoru kii laka ripini saa rutokaa ku. ¹⁴ Anda injwi anyini anyi ba cara Muzee di ni lenika ri ni, Farizei 'ba, lunjwa-lunjwa'ba to adusiku anyulura awizi ni 'ba, pi anyelegi para dudu akujo anyi loso, disidu anyivo anyesu langbwa angbugwugodu ri ra. ¹⁵ Anda injwi anyi 'ba cara Muzee di ni leni'ba ri ni, Farizei'ba ni, lunjwa-lunjwa'ba ni to! Adusiku anyijwa meri ca, pi logo to ca ba ni asi ejore'ga anya maju i du, ongu de modi ejoru anya maju i du ra, anyibaa kecoru bura asi di i anyidi ani, kado anyi ewa eri si. ¹⁶ Anda injwi anyini, anyi 'ba 'ba'miako ri ni lase'ba ri ni, anyijo'kaa, "Modi ralu're kidori ni andaga ri, ede nga kuru. Ki modi ralure mula kidori di si ri, kulee kede nga andaa 'jole andaa kedee ra ri ra. ¹⁷ Anyi 'ba mi'ako lali ri! Ingo ni njagodu ni, mula na i de kidori kubaa mula ku'e okole ri ni? ¹⁸ Onguru, 'Modi ralure kidori anda ga ri, andaa ni nga iyo rii. Ki modi ralure azi kidori di ga ri si ri, kede nga andaa raluzo ri ayo.' ¹⁹ Anyi 'ba mi'ako ri! Ingo ni njagodu ni, azi na i de kidori kubaa azi na okole ni? ²⁰ Disidu mo'di ralure kidori si ri aluru ayo si ongu nga borodu diaru si saa to. ²¹ Mo'di ralure kidori si ri aluru ayosi ongu aluru andaa ni olure laka ri si saa to. ²² Onguru mo'di ralure Ru'bu si ri aluru komi Rubanga di si , pi Andaa ni rire diaru ri si sa to. ²³ Anda injwi anyini, 'ba cara Muzee di ni lenika ri ni, Farizei'ba, pi lunjwa-lunjwa'ba to! adusiku anyike alu-mudi di nga epe-epe ri anya esule ri ni ga, ki anyiba 'bi nga cara di angi-angi ri ni edere ga ku, ovidu, anda, kiza ongu kiza to. Ki esu nga di kulee anyede ra ri pi i ongu azika ri pi ebekaa edekaa ako ku. ²⁴ Anyi'ba 'ba mi ako ri pi laseka ri, anyi'ba bi lejo ekwi ako ri ni ga, ki anyi'ba bi le'jo bwa-bwa ri ni ga ku! ²⁵ "Anda injwi anyini, 'ba cara Muzee di ni leni'ba ri, Farizei 'ba, lunjwa-lunjwa 'ba to! adusiku anyulujwe kubaya ni ru laangwe ri i sakani di to, ki aru lele ri ni aga kuraka guluvo to ga ni. ²⁶ Anyi Farizei 'ba mi ako ri! anyijwe kubaya ni 'a pa sakani di ri to, dudu ogu na ku'e okole andaai saa i. ²⁷ "Anda injwi anyini 'ba cara Muzee di ni leni'ba ri, Farizei'ba, lunjwa-lunjwa'ba to! Adusiku anyiviru 'budi ru na efu'le buya si ingwe ri to vi, ru na laangwe si kelende pelere, ki aru lele ba kpo ni kwa ga ni ongu nga borodu aru ri andi. ²⁸ Leti ovi alua ri si, anyi saa laangwe si anyalande 'bani 'ba anda rii, ki iti'lele anyiga lunjwa-lunjwa si de pi cara ako to. ²⁹ "Anda injwi anyini 'ba cara Muzee di ni leni'ba ri, Farizei'ba, lunjwa-lunjwa 'ba to! Adusiku anyulubi 'budi profetaa di ri ra pi ongu anyegiri budi 'ba okole ri pi di saa ra. ³⁰ Anyijoo, "De tebe kesu amolu aa saa ama abi ninga ri si, esu amavo remure a'ito 'bazo profetaa ni eri ni ocuzo ni ku. ³¹ Disidu anyijo anya ti si ama anyi bonji 'ba profetaa ludi kaa ri pi di i. ³² Anyisaa anyede enji anya ata a edele ri ni tige. ³³ Anyi ini, anyi ini-boro ni bonji, anyipi langba asi olure tadu ri di ni aga si ingoni? ³⁴ Disidu, anyinde, maze anyini profetaa pi 'ba ciri rii, onguru ba cara Muzee di ni leni'ba ri pi to. Anyuludi zipi ra ongu zipi anyepaa kruce di ge, pi zipi anyimgba ai zo Rubanga di ni aga ongu anyuludu ailaangwe ganyi mgbwii-mgbwi aga si. ³⁵ Nga aru lendere vu na ni ga rii, Eri 'ba anda to ri di ocure vu'dige ri kemu kude anya'di ge ra, edozo eri Abele ni okole ri di si, bwi eri Zakaria ori Baraciah ni anya'dile zo ilegi di a lelega kidori to ri i. ³⁶ Gba-gbadu maajo anyini, nga dipi kwicidu kemu kude suru odu disi ri a dige. ³⁷ Yeruzaleme, Yeruzaleme,nyi profetaa ludire ongu 'ba zwele nyidi ri pi ni luware oni si ri! Mobi bonji nyidi ni pa lutale kare aluga vu si, gba a-u a bonji andaa di ni emuzo andaa opirikeke aga ri ani, ki nyileku! ³⁸ Nde'adi, nyaa zo lesi nyini lakaka. ³⁹ Disidu majoo anyini, anyinde ma ku edoru diadu muzo andaga bwi anyifu joo, 'Anda loso mo'di emure Opi a ru si ri ni."