¹ Diadu le'jo Opi Yesu Kristu a engwizo pi ama remuzo kare aluga olurega Andaa to ri a dige, ama'i anyi okposi, ama adiinji, ² kulee anya asi kulumvuru ku pi akecandi anyi ku, de endi si kusa le'jo ti di si kusa waraga 'jole kende enga amadi si ri si, 'jore a'jo o'du Opi di esapi eze. ³ Mo'dizi akulunjwa anyi ku le'jo zi si. A'dusi o'du ile esa ku de saa 'bani 'dezo pi ri adi esa kuru na'i pi mo'di cara ngure ile e'deteru kuru, 'bura nga enjire ile'i. ⁴ 'Di andaa ni mo'di epelere nga tuwadu to rii pi rengare nga tuwadu lungwele Rubanga kusa rule rii to rii. Ayosi kumu kuri zo Rubanga ni elegire ga ri niga pi kumu kungi andaa ni oru rubanga du. ⁵ Anyera ku anda maa oluzo anyito ri ma'jo anyini nga 'dipi ra? ⁶ Diadu anyini ra nga andaa ni lugare dudu andaa kumu ke'deteru saa ro'bire ra ri ni ga rii. ⁷ A'dusi le'jo ruzure di cara ni di atuzo ri e'do i'bu edeka ra, ti mo'dizi aa andaa ni lugare diadu rii kusa ko saa andaa ni 'duzo pi letige si ri ni ga. ⁸ 'Di a vuga mo'di cara ni di ature ile avo e'detee ra, Opi Yesu a mule 'dile uluvi engare Andaa tige si ri si rii pi kumu kecoru nga iyo riani Andaa emunga. ⁹ Mo'di cara ni di ature ile kumu kemu i'bu Satani disi mori tuwadu to, nyumanyuma pi nga 'bani a'uzo enjo di to, ¹⁰ pi nga injwi tuwadu 'ba legwe'ba ra ri ni lunjwazo, a'dusi gakii imgbe gba leka dudu kalarirukii. ¹¹ Le'jo 'disi Rubanga kezwe a'ni lunjwalunjwa okpo rii dudu ka'ikii enjo ¹² pi dudu a'i tuwadu gba a'i'ba kuru ri pi a'i nga injwi le'ba ayo ri to akuli le'jo a'ia dige. ¹³ Ti kulee o'du tuwa amake anjo Rubanga ni anyisi, maa adiinji Rubanga a lele ndo rii, a'dusiku Rubanga lupe anyi kwe ni o'a ati rii lari esurega pelere Endi di si pi a'i gba aga. ¹⁴ Andaa lungwe anyi laka ofu loso amngele ri si, dudu anyesu eku ama Opi Yesu Kristu di. ¹⁵ 'Disi, maa adiinji, anyede okpo pi anyiko okpo lini lenile anyini rii, de ange anyini tisi kusa waraga si. ¹⁶ Diadu Opi amadi Yesu Kristu ni gbarii pi Rubanga ni ama Ata'i rii, amani lere pi amani asi emba tadu pi igeni loso ri to kiza si, ¹⁷ ke'bwe anya asi pi kemba anya asi i'bu loso ri ni ga tuwadu pi le'jo loso ri ni ga.