¹ Paulo pi Silvano to Timteo ni laka, eklezia Tesalonika'ba di ni Rubanga ni ama Ata ni aga pi ama Opi Yesu Kristu ni aga. ² Kiza kolu anyini pi i'bwe engare Rubanga Ata amadi di pi Opi Yesu Kristu di to. ³ Kulee amake anjo o'du tuwa Rubanga ni anyisi, ama adiinji, kende o'biru ra riani, a'dusi anya a'i a renjaka andaga si, pi anya le a renjaka anya lelega si. ⁴ Ayosi ama saa amecuru anyisi eklezia Rubanga di ni aga anya le'jo mika wa si a'i anyidi ni aga anyini ecandirega tuwadu, pi anya icandi anya asi epirega ri ni aga. ⁵ 'Di ke'dete le'jo lika anda Rubanga di, dudu akula anyi 'ba ate'ba ra keri Rubanga di to, anya icandi ndezo rii. ⁶ A'dusi andaani anda Rubanga ni icandi longwizo 'ba anyini ecandi'ba ri ni ruge, ⁷ pi kayu anyi 'ba ecandile ri pi amani saa, de Opi Yesu ni kumu kelende ru'bugesi Andaa anjeli okpo ri to ⁸ asi ni leda gwere ri to, kumgba 'ba Rubanga ni ni'ba ku ri pi a'i ofu loso Yesu Kristu di ni di atu'ba ri angala si. ⁹ Kuvo kundekii icandi olure tadu ri ra, vo kolukii lolu Rubanga ni andaga si pi Andaa eku pi mori ni ga si. ¹⁰ Andaa kumu kede 'di Andaa emunga o'du naninga Andaa eku esunga 'ba Andaa di pelere ri di niga si, pi a'i a'i'ba ri ka'ukii Andaa si cwi, a'dusiku le'jo amangele anyini ri a'iru ra. ¹¹ Le'jo 'disi amelegi anyisi o'du tuwadu, dudu Rubanga amadi ku'badu anyatera anya lungwelungwe ni ga pi Andaa mori si Andaa kede nga tuwadu loso ripi i'bu a'i di to. ¹² Amelegi 'di dudu Opi Yesu Kristu a ru kesu eku anyini aga, pi anyi saa Andaa ni aga, kende kiza Rubanga amadi di pi Opi Yesu Kristu di ani.