¹ Nga endi kukee ni ri adeleg, ma adiinjii, male anyolu ofu ako ni ku. ² Andani anya oluzo pagano du rii, eno edele disi rubanga du rii ri anyadi sereni, leti mgbii-mgbi si. ³ 'Disidu male anyini ajo mo'di lorojore Edi Rubanga di si ri kujoo kpe, "Yesu ni akalu" i. Mo'di zi jore," Yesu ni opi" na iyo de Endi okole ri ako na i. ⁴ Diadu nga Endi a kele ri mgbi mgbi, ti Endi alu. ⁵ I'bu edele ri mgbi mgbi, ti Opi ni alua ri i; ⁶ pi I'bu ni ovi edele ri mgbi mgbi, ki Rubanga ni alua ri kubaa kederu wa ni ni. ⁷ Diadu mo'di alu alu ni ake nga Endi a edele rii 'ba tuwadu ekonyizo. ⁸ A'dusiku mo'di zi alu ni endi ke laka lejo ciri dii, ongu zina ri ni endi alua ri ke laka lejo nga nizo rii. ⁹ Zina ri ni ake a'i endi alua ri si, ongu aka ri ni ake endi 'ba ni ru ezwa'zo rii. ¹⁰ 'Ba zipi ni ake mori nyuma edezo, ongu zina ri pi ni ake mori profetaa dii. Zina ni ake mori endi ni mgbi mgbi ni nizo, zina ni ake mori lorojozo ti mgbiimgbi ri si, ongu zina ri ni ake mori ti mgbiimgbi ri ni ekwi ayuzo. ¹¹ Nga di tuwadu ibu Endi alua ri di i, alnju mori alu alu ni Andaa lezo ri ani. ¹² Ru ni alu ti ewo na mgbi mgbi, ti emo mgbi mgbi ile tuwadu ru ile dii, disidu Kristo di saa andaa ani. ¹³ Endi alu ri si, ama tuwadu amesu batisimu ru alu ri si Andaa ni aga, de kolu Yudei'ba kusaa Giriki'ba, kusaa pagano'ba, de dimgbo'ba kusaa opiga, pi ake a'ini Endi alua ri ni mvukaa ayo. ¹⁴ Ru ni ewo alu ku, ti karaako. ¹⁵ De pa kujo, maa olukaa di ku si, ma ewo ru dii ku, ti gbadu andaa ni ewo ru dii kuu? ¹⁶ De bi kujo, "ma mi ku, di si du ma ewo ru dii ku, kedetee andaa ni ewo ru dii kuu? ¹⁷ De ru tuwadu kolu mi na, eri nga ingoni? De ru tuwadu kolu bi na, angu nga ingoni? ¹⁸ Ti Rubanga 'bi ewo mgbii mgbi ru di andaa lezo ri ani. ¹⁹ De ru kolu ewo alu papala na, alungee ru ni ingoni? ²⁰ Ti de ru ni ewo kolu mgbii mgbi saa i, ru ni alu. ²¹ Mi kujoa 'di ni kpe, "Male nyi ku i." Pi di saa kujoa pa ni kpe, "Male nyi ku i." ²² Ki ewo ru di lendere mori ako ri leru ra, ²³ pi ewo ru di ama rale laru ga to ri, amake laka laru nja, pi ewa ru di lendere kpe ripi ake aini laru ambamba. ²⁴ Diadu ewa rudi lendere loso ri pi ake aini laru ku adusiku esukii laru ra. Ki Rubanga emu a'i tuwadu kare alu ga, pi Ke laru nja ewo laru esukaa kuru ri pi'ni. ²⁵ Andaa ede di dudu laranjukaa kolu iyo ru ileni ga, ki kebedu ewo mgbiimgbi ile kumba kii ainga asi alu si. ²⁶ Dudu de ewa aluri kecandiru, ru tuwadu kecandiru kare aluga; kusaa de ewa ru di alu ri kesu laru ra, ru tuwadu kanjoru kii kare alu ga. ²⁷ Diadu anyi ru Christo dii pi ewa mgbiimgbi ru ile di i. ²⁸ Ongu Rubanga ovi ba ekelezia aga atizo ri maju du, erizoa ri profetaa du, inazoa ri laponyia du, ongu nga okpo ri edekaa ri pi i, pi ke lijwa di i, 'ba ikonyi kekaa ri pi i, pi 'ba 'ba ni di lase kaa ri pi, pi 'ba lorojo'ba ti mgbiimgbi si ri pi pi to. ²⁹ A'i tuwa du maju? A'i tuwa du profetaa,? A'i tuwa du laponyia? A'i tuwa du kedekii nyuma wa? ³⁰ A'i tuwadu kejwa kii ba? A'i tuwadu kolojoru kii ti mgbiimgbi ri si? A'i tuwa kayu kii ti mgbiimgbi rii? ³¹ Anyidu nga kele lagare pi ri asi tuwadu si. Ki medete anyini leti loso lagare pi ri ra.