¹ Ma Petero oluri uzwe kana Yesu Kristo ri mimothori oriri ‘banini o’du’ba irao ileki, atheba ponto, ai Galatia angwi Kapodokia, angwi Asia, ala Bitunia, ri ileki. ² Ami anda o’du’ba epeo ryeye ori athari nasi ani ithithu oyuru nithasi oluri awirina ani koru Yesu Kristo, ani uyuyi awiri erisi. Ma mimothori amini odo kwe athu ai keye ro kwe kolu twe amiro athunasi ³ Kwe ori atha osi ari Yesu Kristo ifufura ifura. Awi oyi awiri nasi oluri agwina ani okwe othile unweru, di adusiku awi inga Yesu Kristo oda lelesi. Ani akengo eyo a’du’ba odaku iki. ⁴ Riyeye oluri othia akariki, aka kenari odo a o’busi akairi nalu golu ni, nalugolu ileni ambwe oruna, o’busi omwaku angwi osuku oaweku. ⁵ Iya ilea mi ini orio, awi othe amio awiri ombamba si ani oloka ami, loka ileni kothe rena nani angwe olu okori nara. ⁶ Di ilenisi kwe amiri aside kofo, ju ilenini ami nairi azani ‘dute’dute, olu ningwa. ⁷ Ani amiri oni okoka de ‘diri a, ambaru dakap kegwe gwe ju lu’ba okao, asisi, amiri raka iya i thema, kolu intharu kope dakap ni. Obusi kezi amini ifufura. Ai agwero azi rithu, ini Yesu Kristo nenazo ⁸ Ami niyeri lagoni iye, ju adi inde lagoku nithuri lagoni ithu, rithuni agwisitwe oluri arina ongaku, ti kolu ri thuni agwiru oluri keki oru lelesi. ⁹ Ani nai loka itindi ri oluri loka amiri rikozo amiri rakari. ¹⁰ Eyo noni’ba oluri anda engo odo ori o’busi kokwe amini, o’du’ba ondu loka azi kozi ari kani rengo nagwisi. ¹¹ Oyuru Yesu Kristo ri oluri kolu amiri rwo ileni anda ena aza Kristo ri nga agwe basi o’du’ba kevovo mukoriki. Luba imori ende kale oyuru ilenisi kenari lu’bani iya nga ileki kolu dingi ingo nira. Angwi iya evo ingoleni. ¹² Ena lu’bani odo nga o’du’ba ai iyeye uiki iyeye ariri runiku, ti kiyeyeri lu’bani, nga airi iyeye kana andariki ilenini ‘bani ezini lu’bani olile nitha omba oyuru nitha rinasi oluri ezwe oruna ini ena lu’bani o, ju malaika go kondu onini ari ileki ni kale. ¹³ O’du ta twe twe amiri kongo esu mo’di oluri kithethe nari runi ebwo, ithe tar u ti ethe ta okwe oluri Yesu Kristo obusi keziri amini awiri ekisi, ¹⁴ O’du ta ’bani e’yo ari neri ‘baru nondu ku esu amiri oluzo nini athirisi oluri adi ini eyoku nani. ¹⁵ Lago amini ungweri ni kagwe twe. Angwi o’duta inthakaru ngara lelesi lii. ¹⁶ Ogwe odo sana angwi no’do ithakaru, esu manini oluri ithana. ¹⁷ Iya nomiri omi, awi ‘baniri ari noli rini koli esu baniri oluzonini, upeku, azi neyo odo baba. Iya ile iru ta lago, amiri olwa bwawa. ¹⁸ Ami nononi odo nga omwa’ba iki iya wai nga agweri de dakap adi epa amiku olwa oluri nga ala akake, oluri nende u amiri abira lelesi. ¹⁹ Ti ami epa ami Kristo ri erisi oluri athu na a, agwiru. Eri ileki kodu esu indigo ningwari ka niki, oluri eyoku odo biro. ²⁰ Lago epe ari ilekira athirisi kusi adi o’bwe buku. Iya enau ini nakira okona amiri e’yosi. ²¹ Ami naka ori awiri e’yosi, ori inga lago oda lelesi azi kokwe athu nani, ani inoni ori nothele ²² Ami ilenini nithu rou amiri e’yo nonile, azi niyeri adiki ni e’yo noni’ba iki athu nasi iya ile iye taru amiri asidisi lii. ²³ Othi amio unwe karu. Amini othi oluku esu ruri nanini, oluri konomwa, ti oluri kololu othi amio oriri e’yosi oluri kande nde kololu. ²⁴ Esu odo ‘bani lii kodu esu ayi niki. Agwe na kagwe esu ofu, ayini arina nini, ayi ko oawe azi ofuka ku’du’de bwa. ²⁵ Ti oriri e’yo kololu twe twe, ari ileni, olile nitha oluri enao ani iki.