1
Nayya Paulo, pit lo Yesu Kristo lafa onyimu Hollum hatara lefahata ta sayye innohonyie.
2
Sayye hunna innafa otiorok Hollum beren to higierita inno olibo, isia sayye innafa esio inyia hijio herara hekilak illohonyie.
3
Ara sayye hunna hiram no Lonyi honyie lafa ottu to woyyo ba Davide iyya egioro ania.
4
Ara inyeja Lonyi Hollum to golon no Oyiri to nohonyie no olibo. Nyo etiliek ifa inyia to duaran no ebuhuni honyie to ye, ara inyie Yesu Kristo Habu lohoi.
5
Te inyia, emoju iyyohoi hamehini iko rahan alefahat neyyani baŋi iko hiruk to hiji to hiyyo daŋ illo owuon ta fau, to fure nohonyie.
6
Hidofe elliloŋini ifa itai to hiji ho hiyyo daŋ ta fau nyo era itai illo Yesu Kristo.
7
Egiorok naŋ ta hatai daŋ hiyyo illo Roma, hullo omuno Hollum, ojo hidofe elliloŋo itai hiyyo hullo halibok. Isiara hamehini iko hilik na tajia ojo himwara nottu tara Hollum Monye hohoi ojo hidofe ara Habu Yesu Kristo.
8
Ahosiere, esio naŋ humo to Hollum hanaŋ to fure no Yesu Kristo daŋ te itai, nyo erarari hiyyo hiruk nahatai ta fau daŋ.
9
Ara Hollum asut hanaŋ, to higiama hanaŋ to honyie to oyiri ettitori naŋ sayye inno Onyi honye, nyo adule naŋ hilioto itai holoŋitek.
10
Efia naŋ hijio anyar bahati aŋa Hollum hikoi ta hanaŋ hebarie ta hatai na anyar to wahan to no Hollum iyya amojo naŋ holoŋitek daŋ.
11
Nyo egigilo naŋ no no hijio anyar attu naŋ hiwolo itai, hesiarari ta hatai iluahiti inno loyirihien hatai hetigolori itai;
12
hijio anyar ogol tajia innahatai to hiruk nanaŋ, ojio hidofe hiruk nanaŋ ogol te innahatai.
13
Halasira hanaŋ, awak naŋ anyar liyyen itai hijio egigilo ifa hijio attu iso ta hatai, ati eti ifa hikoi man iko iyyania. Ati awak ifa naŋ arrumek illak hinyomo to hiji hatai iyya awak hidofe naŋ illak to hiji ho paganohien.
14
Ara naŋ a tuŋani lohoros to hiyyo illo Grik ojo ta hatamonok, hullo elofere ojo hullo lobe elofere.
15
Ati ta hanaŋ, awak naŋ hittito sayye inno olibo ojo hidofe ta hatai hiyyo illo Roma.
16
Tonia, abe naŋ eloriri to sayye inno olibo, nyo ara sayye golon no Hollum netilohini hiyyo daŋ ille eruk, etiara to Yudea man to hiyyo illo Grik.
17
Nyo etuhutek Sayye hunna olibo nottu tara Hollum to hiruk to hiruk, iyya egiorohini ifa, "Amanya iso haliboni to hiruk."
18
Nyo ejoria Hollum te ido to hullo lobe eruk to honye, ojo hidofe daŋ to hullo harwuok ille etihita hiram inna dede te irruti innohosie.
19
Ejoria inyia nyo etuhutek inyia to hosie hirro hunna oremik hitiyyen isia Hollum
20
Man to hitieri no ayyeuni na fau etiliek hiyyeti innohonyie wuana nohonyie a Hollum iko duan nohonyie inna holobe lobo tuŋani egonyu. Tonia obe illak hiyyo iko illak ilieti.
21
Hara ta hido hijio oyyen isia Hollum, ati obe isia esio etihabwuo inyia iyya Hollum, obe hidofe esiara to honyie humo. Ati etibolit isia tajia innohosie iko higigilita innohosie ojo hidofe tajia innohosie oriok.
22
Ojio elofere isia, ati efittaŋa isia.
23
Hidofe eloit isia kwatan no Hollum lo obe oye hatara a rijori no tuŋani lokoluni to hita, kuyya cieŋi, kuyya ciaŋi hahonyak, ojo ciaŋi inno oreta ta fau.
24
Tonia ebusak Hollum isia iyya awak taji innohosie atta isia hitturru watik innohose to hirro inno somon.
25
Tonia eloit isia bisan no Hollum teler, atta hitihabuo ojo hidofe egiama to hiyyeti ta mai ho tuŋani hayyani, inyia Hollum lia letihabuo mak. Amen.
26
Atta Hollum ebusak isia assai afarari iyya awak tajia innohosie nyo eloito ŋorwo imohiti innohose e ifariti. Hidofe, ehuma liawa daŋ iyya isia.
27
Ebusak isia fioro iko ŋorwo innohose atta ihuma ifariti inno wati innohosie. Niyya te irruti innohosie daŋ, amoju isia baha no osiru te isia. Iyya ebo isia Hollum to higigilita innohosie, ebusak Hollum isia hegigile hirro inno orru hidofe ehuma rori inno obe olibo.
29
Efut isia iko irruti, somon, daya, liwa, hain, toho, ŋalafa, hinyaba, hilomiorok, muaŋa, hamuana, hahaya.
30
Efut isia hidofe iko haliwari Hollum, higiso, hitidara, hitahuo no wan, adule no hiyya, miasa no hesiok.
31
Obe isia owuon ho hiyyen; obe isia enyiak hira ho hullo eruk hiyyo to hosie, obe enyiak wuana ho mune, biaŋan no hamehini.
32
Oyyen ida hido isia ifahita inno Hollum, nojo, lia ille odule hihuma rori iyya hunna, ehuma osiru ye hosie. Ati ehuma isia hiyyata hunna ojo hidofe omuno hiyyo ille ehuma isia.