¹ Paulo ho Timoteo, hegiamak illo Yesu Kristo, te ilia hullo ellilloŋu YesuKristo illo owuon to Filipi, he ettaha ojo hejufak. ² Isiara hamehini hotowuana ta hatai iko humwara tara Hollum lohoi Monye hohoi ojo Habu Yesu Kristo. ³ Esio nayya humo to Hollum lagilu nayya itai. ⁴ Amojo nayya holoŋitek daŋ te itai, amojo nayya to mune. ⁵ Esio nayya humo to tubai nahatai to hiram no Hollum man to hitieri man he iyyania. ⁶ Ayyen nayya hijo lia le egiema ta hatai nalanyar, ohu iso esahak igem nohonyie man ta far no ottuni Yesu Kristo. ⁷ Obis ta hanaŋ hegigilori te itai nalanyar, nyo ewuon itai ta taji hanaŋ. Era itai ta hatai amotiarak to hamehini ojo hidofe to hiriria nahatai naŋ ta babus, to hiram no Hollum. ⁸ Oyyen Hollum hirro innanaŋ awak nayya egonyu itai nyo obolo mune no Yesu Kristo ta hatai ⁹ Amojo nayya hijo: anyar efita mune nahatai agalik dayya to ofioroho ojo to hiyyen. ¹⁰ Amojo naŋ hijo anyar eciem itai eijo hidofe enyimu hirro inno obis. Amojo nayya anyar ewuon itai no obis obe hipali man ta far no ottuni Kristo. ¹¹ Anyar efut itai ho haŋer inno bisan inna afanu tara Yesu Kristo, to lohuo no Hollum. ¹² Iyyania awak nayya anyar eyyen itai, halasira hijo eluak hirro innafa edwoŋ ta hanaŋ eyari sayye inno Hollum a hosiere binno. ¹³ Nyo etisarik haririk innanaŋ sayye no Kristo ta haŋ na Habu ojo to hiyyo illo owuon ta masik innak. ¹⁴ Ohiŋere halasira iyyania arria hiro hiram na Habu obe baŋi to hiro nanaŋ to hosie. ¹⁵ Etiyana illak iyyania hiram no Kristo ta hayini ojo to rija, ojo ilak to libe. ¹⁶ Oyyen illafa etiyana hiram no Kristo to mune hijo atafa nayya inni sayye inno Hollum. ¹⁷ Ati etiyana illak hiram no Kristo ta hayin ojo to teler. Egigilo isia hijo etihara isia nayya to hifita nanaŋ ta aririk. ¹⁸ Nyo? kuyya to higigilo nohosie, kuyya hidofe etuhuma kuyya obis, Agiofohini hiram no Kristo, amuno nayya to hiram nia! ee, amuno iso nayya. ¹⁹ Ayyen nayya hijo eyyani iso nia ta hanaŋ hetuluahini. Oremik iso nia hira dede tomojo nahatai ojo to luaha no Loyiri no Yesu Kristo. ²⁰ Amuno naŋ ajo hidofe ayyen hijo awuon ho huruk nobe esio nayya irri. Ati awak naŋ hijo hotodule Kristo kuatan ta iyyania man ahosiere to wuaran ojo to ye. ²¹ Ara Kristo ta hanaŋ manya ojo la aye naŋ osiru ha ayeri te inyia. ²² Ati lamanya nayya to hiriŋo, are nia haŋer inno hegiama nanaŋ, arasa hijo anyumu isio nari? Abe naŋ ayyen. ²³ Atidahini ati to hiji ho hirro inno. Awak nayya eno wuana ho Kristo, sihin no olibo binno! ²⁴ Ati olibo hidofe daŋ ta hanaŋ hawuanari te itai to hiram nahatai. ²⁵ Iyya ayyen naŋ hiram nia, ayyen naŋ hijo adule iso nayya he itai te igem nahatai ojo hidofe daŋ to huruk nahatai. ²⁶ Obolo hitahuo nahatai to Kristo Yesu to wuana nanaŋ he itai. ²⁷ Ihuhumak imanyiti innahatai no osiru sayye no Kristo. Abe hido nayya attu hiwolo itai kuyya abe nayya awuon ta hatai, awak naŋ etiru hijo ewueta itai to Loyiri nobotie. Awak nayya etiru hijo owuon oyiri innahatai nobotie to huruk na sayye. ²⁸ Ibaŋa abaŋ nobo sihin netirija miorok illahatai te itai. Ati inna to hosie ahituhuti no heturori isia. Ati ta hatai, ara hituhuti no hitilaha nyo ara inna no Hollum. ²⁹ Ojo ta hatai, era ifa nahatai to hiram no Kristo, hijo obe ara huruk to honye, ati errumu iso itai hitigiama te inyia. ³⁰ Arrumu itai iŋalafiti iyya innafa egonu itai tara ho naŋ iyya etiru itai hijo eba ta hanaŋ iyyania.