¹ Ebusak Yesu manya atta eno afau ho Yudea man to masik innafa to hosiere hahari no Yordan, atta iluluŋ hinyak awoŋ to honyie. Atta inyia hinyiak hitiyana isia, iyya ara ifa igiem nohonyie. ² Afanu Farisei to honyie atta hifi, "Holibo mahu to hiito oliawa hapiahari iko oŋoruo honyie?" ³ Etiraŋ inyia, "Helimak Musa nyo ta hatai?" ⁴ Ojo isia atta hijo, "Esio Musa tuŋani hegiorok waraga no piaha atta efuhak inyia ade." ⁵ "Nyo to holoŋ na tajia innahatai inyia nia egiorok inyi hifahi nia to hatai," Ojo Yesu to hosie. " ⁶ Ojo hidonyie to hitieri na fau, 'Oyyeu Hollum isia hiito oliawa iko hiito noŋoruo.' ⁷ 'To hiram to nia anyar ebusak hiito oliawa monye iko hotonye atta atubahini iko hiito noŋoruo, ⁸ atta isia attubahini wan nobotie. Obe isia enyiak hira arik, ati wan nobotie.' ⁹ Iyyania hotobiaŋai lobo tuŋwani etipiek hirro inno ottubak Hollum." ¹⁰ Nafa owuanari isia ta haji, enyiak heyiyanak illo honyie hifi inyia. ¹¹ Atta inyia hijo to hosie, "Tuŋani lo opiaha ho oŋoruo honyie atta yama nobo ara inyia harotoni. ¹² Lopiaha inyia ho oliawa atta hinyiak yama lobo hiito oliawa, ara inyia harotoni." ¹³ Eyyani ifa hiyyo durre illo hitiŋi to honyie hijo anyar atan inyia isia, ati eriŋ heyiyanak isia. ¹⁴ Nafa egonyu Yesu, ejoria ifa inyia to hose isia, atta hijo to hose, "Ibusak durre illo hitiŋi hafanu ta hanaŋ, "Ibaŋai efuhai isia, nyo ara obie no Hollum nohose. ¹⁵ Dede ajo naŋ ta hatai, lia obe omoju obie no Hollum iyya hiito letiŋ obe ojiŋak to obie no Hollum." ¹⁶ Atta inyia akafu durre oho honyi atta hijak isia iyya atanyak inyia has innohonyie to hose. ¹⁷ Iyya etiara inyia loton nohonyie, anyieru lobo tuŋani to honyie atta rigoŋo to honyie, atta hifi inyia "Hetiyanani lolibo, hegiem iso naŋ nyo harutahini manya no losio fur?" ¹⁸ Atta Yesu hijo, "No nyo ellilloŋo iyye nayya hijo haliboni? Obe lobo haliboni, aracie Hollum lobotie. ¹⁹ Eyyen iyye hifahita inia ojo: 'baŋa ottohoi, baŋa oroto, baŋa ahahala, baŋa loteler, baŋa adaya hirro inno hiyyo, tabaŋa hotonyo hoi iko monyo hoi.'" ²⁰ Atta tuŋani lia hijo, "Hetiyanani, ejufuta naŋ hirro inia man nafa halara naŋ lonyarhalu." ²¹ Owolo Yesu to honye atta mune inyia. Atta hijo to honyie, "Owuon nobo sihin nebuha tohoi. Itinyaŋai hirro inno eyita iyye bidaŋ atta iyye hisio to lociaŋak, ejio iso iyye atta wuana te ibariti te ido. Atta iyye awoŋ ejufak, nayya." ²² To hiram nia, enyiai taji nohonyie hololibo; adou taji nohonyie atta eno ade, nyo owuon ifa inyia iko ibariti arria. ²³ Oriŋa Yesu atta hijo to heyiyanak illohonyie, "Ogol binno to habarak hajiŋahini to lobie no Hollum!" ²⁴ Atta heyiyanak illo honyie hililiha to hiro nohonyie. Ati enyiak Yesu hijo to honyie, "Durre, ogol nono hajiŋahini to obie no Hollum! ²⁵ ofiak to konikoni hajiŋari to itulo no lifira, agalik tuŋani la abara hajiŋahini to obie no Hollum." ²⁶ Eliliha ifa isia nono atta hijo to wati innohosie, "ŋai iso mahu oremik etilohini?" ²⁷ Owolo Yesu to hosie atta hijo, "Ogol iso to hiyyo, ati obe iso ogol to Hollum." ²⁸ Atta Peturu hitiara hiro to honyie, "Ee, ebusak iyyohoi hirro bidaŋ atta iyyohoi hujufuta iyye." ²⁹ Ojo Yesu, "Dede ajo naŋ ta hatai, obe lobo tuŋani lo ebusak haji, iko halasirak, hanasirak, iko hotonye, kuya monye, kuya durre, kuya fau, to naya, iko to hiram no Hollum. ³⁰ ŋai lia obe omoju man hinyiahita hisihai nobotie ta fau inna, hajik, halasirak, hanasirak, hotonye, monye, durre, fau, iko ibariti, ojo ta fau nya ottu, iko wuaran no losio fur. ³¹ Ati ariai ilia ara hosiere ofu hira halu, ojo illo halu ofu hira hosiere." ³² Olot ifa isia to tuluba no owu a Yerusalem, ojo Yesu owu to hosiere hosie. Eliliha ifa heyiyanak, atta illafa ejufuta ta halu honyie baŋi. Atta Yesu hinyiak illafa tomon harik oger atta hitiara elimak isia hirro inno ofu hidoŋ to honyie kuak: ³³ "Itiriŋai, efu iyyohoi a Yerusalem, ojo hiyyo ofu eyari Onyi Tuŋani to lettaha illo hetimojok iko hegiorok. Ofu isia attohe inyia ojo hidofe ofu hisio inyia to halufak. ³⁴ Ofu isia hitifitaŋa inyia, omitak inyia hamilak, abak inyia, atta attohoi inyia. Ati owu inyia adietini ta halu ho holoŋitek hunik." ³⁵ Yokobo iko Yoani, durre ilo Sebedeyo, afanu to honyie atta hijo, "Hetiyanani, ewak iyyohoi iyye hegiema to hoi hirro inno efii iyyohoi to hoi." ³⁶ 36Ojo inyia to hosie, "Ewak itai hegiema naŋ nyo ta hatai?" ³⁷ Ojo isia atta hijo, "Aŋatak iyyohoi hotohunyia iko hoi to lobie hoi, lobotie oko inyiet ojo lobotie oko ihoroŋ." ³⁸ Ati enyiak Yesu hijo to hosie, "Obe itai eyyen hirro inia ero itai. Eremik itai himat kubaya no ahu naŋ himat, eremik itai hadihu hifoto nya ahu naŋ efotu?" ³⁹ Atta isia hijo to honyie, "Eremik iyyohoi." Ojo Yesu to hosie, " "Ikobo nyia ahu naŋ himat, efu itai himat. Ojo hefotu no ahu naŋ efotu, efu itai adihu. ⁴⁰ Ati ŋai ofu hitole ta hani ho inyiet hanaŋ kuya ta hani he ihorroŋ obe ara nayya aremik isio ta hatai ara no ilia illafa otiorohini te isia." ⁴¹ Nafa etiru heyiyanak illafa tomon, atta isia hitiara hijoria to Yokobo iko to Yoani. ⁴² eliloŋ Yesu isia atta hijo, "Eyyen itai hijo illa ara ettaha to halufak, erramitari hilohittok nohosie to hosie. ⁴³ Ati hotobiaŋa ara ania tohiji hatai. Tuŋani lawak bolo tohiji hatai anyar ara hegiamani lahatai, ⁴⁴ hidofe lawak hira hitieri tohiji hatai anyar ara apit lo hiyyo bidaŋ. ⁴⁵ Obe Onyi Hollum ottu hijo anyar egiama hiyyo to honyie, ati ottu inyia egiamari atta hisio manya nohonyie ahitilahi no hiyyo bidaŋ." ⁴⁶ Afanu isiaa a Yeriko. Nafa he ebusak inyia Yeriko iko heyiyanak illohonyie iko iluluŋ no hiyyo, owuon ifa lobo tuŋani dia lara fure Bartimeyo (ara ifa inyia onyi Timeyo), oŋodo lafa ettole to oger ho tuluba. ⁴⁷ Nafa etiru inyia hijo Yesu lo Nasarit lia, atta inyia hitiara huuwoŋita hijo, "Yesu, Onyi Davide, omehini ta hanaŋ!" ⁴⁸ Atta hiyyo ariai hiriŋ loŋodo, elimak inyia hotoduai. Ati arasa inyia yio ahide no, "Lonyi Davide, tomehini nayya!" ⁴⁹ Oweta Yesu atta elimak hellilloŋo inyia. Atta isia hillilloŋ loŋodo lia, ojo, "Iŋereja! Te'tte ahide! Ellilloŋo inyia iyye." ⁵⁰ Atta inyia ebire boŋo no hilik adde to wan honyie, atta diote ahide, atta awoŋ to Yesu. ⁵¹ Etiraŋ Yesu inyia hijo, "Ewak iyye anyar egiem naŋ nyo to hoi?" Atta oŋodo hijio, "Hetiyanani, awak naŋ riŋai." ⁵² Atta Yesu hijo, "Ino, etilibo huruk nohoi iyye." Teyya oriŋai inyia, atta ejufak inyia nafa eno Yesu to tuluba.