¹ To motie beren ta far na Sabato, ottu Maria Madalina iko Maria nobo oriŋari ilume to hitieri ne isabit. ² Ekikiro ifa fau binno nyo esuru ifa anjilo la Habu te ido obwarari morwo nafa ottuho to hutuk he ilume adde atta hittole to hide honyie. ³ Opiapiak ifa wan nohonyie iyya hilla, ojo boŋojin innohonyie obwor. ⁴ Abaŋ ifa herrirriak ille ikat man atta hittole iyya hayok. ⁵ Ati ero anjilo to ŋorwo hijo, “Ibaŋa abaŋ, nyo ayyen naŋ hijo esiaha itai Yesu loŋole esiho to kuruce. ⁶ Obe inyia tenni nyo ebuhu inyia iyya nafa erarari inyie. Ifanu itiwolo mai noŋole etiferihini hiyyo inyia. ⁷ Hidofe ifeti kokwak ilimak to heyiyanak illohonyie hijo, ‘Ebuhu inyia to ye. Itiwolo, lia eno to hosiere hatai a Galilea. Efi iso itai egonyu inyia dia.’ Ituwolo, elimak nayya itai.” ⁸ Ofwo ŋorwo kokwak adde tamai he’ ilume ta baŋi iko to mune no obolo atta isia hinyior elimari heyiyanak illohonye. ⁹ Ati eboŋ Yesu he isia atta hijo, “Itigolo daŋ.” ¹⁰ Ehutu ŋorwo to honye atta hidofe rigoŋi hatirori hejek innohonyie atta hitihabwo inyia. Ojo Yesu to hosie, “Ibaŋa abaŋ. Ifeti ilimak halasira hanaŋ anyar ofwo a Galilea. Ofwo iso isia hiwolo nayya teyya.” ¹¹ Hofwo ŋorwo tiji ania, ojo hidofe oseŋer ofwo abore gala atta herririak elimak te ettok la fadirihien hirro daŋ inne edoŋ. ¹² Ottuba ifa eittaha ille ikelesia daŋ ho marwak herarari he isia hiram nia atta isia hisio arobiyaha arria to oseŋer, atta isia hijo to hosie, ¹³ ”Ilimak to hiyyo hijo afanu ida heyiyanak illohonyie ta harie inni atta ahahalari wan nohonyie eijo iyyohoi ida efer.’ ¹⁴ Kuyya hidofe letiru mandir hiram inna, etilik iso iyyohoi hiram inna hijo anyar obe inyia ohu hibak itai. ¹⁵ Eyari isia arobiaha atta elimak hiyyo iyya efahahini ifa isia. Man iko iyyane, ero hiyyo illo Yudea ania. ¹⁶ Ati ofwo heyiyanak hullo tomon ho lobotie a Galilea adoŋe nafa etuhutek Yesu to hosie. ¹⁷ Nafa egonyu isia inyia, atta isia hitihabwo inyia, ojo illak arrasa hikuyya. ¹⁸ Ati ottu Yesu to hosie atta elimak isia hijo, “Ara golon ne ‘ido iko na fau daŋ innanaŋ. ¹⁹ Ifeti iyyane daŋ etiyenari hiyyo daŋ ta fau. Ibatiso isia to fure no Monye, iko Lonyi ojo no Oyiri lo’libo. ²⁰ Itiyanai isia hehuma hirro daŋ innafa elimak nayya ta hatai. Hidofe. Ituwolo, nyo awuon iso naŋ daŋ he itai holoŋitek daŋ man to hisidi na fau.’’