¹ Nafa acialai motie, ewuaha fadirihien illo hittaha daŋ iko maruak illo hiyyo anobotie hattohori Yesu. ² Efit isia inyia. Eyari inyia, atta hisio Yesu to mandir Pilato. ³ Ifa egonyu Juda lafa etinyiaŋai Yesu hijio, aŋotohini ye to Yesu, atta inyia hiloit tajia nohonyie to hijiriŋa atta enyiahari arobiyaha tomwana hunik te ettok la fadirihien iko maruak, ⁴ atta hijo, “Eyyau nayya nyo etinyaŋai nayya lia lobe owuon iko hiyyata.” Ati etirraŋ isia hijio, “Obe ara hiram nohooi nia? Towolo iyye ta wan to nohoi.” ⁵ Atta inyia ebirok arobiyaha ta fau ta haji imojit nettok, atta ŋeno agore wan nohonyie hame. ⁶ Ahurru fadirihien hullo hittaha arobiyaha atta hijio, “Obe anyar hattubahini arobiyaha iko inno haji imojit inna hittok nyo ara isia idumuti inno ye.” ⁷ Ewuaha isia atta hinyiaŋa ta arobiyaha innia, mai nafa obuahari modie nyo awak isia hanuhari hatamonok. ⁸ To nia, to holoŋ nyia man iko ena, elliloŋo mai nyia, “Owoori no hoto.” ⁹ Attati hiro no hekilani Yeremiya etisiru nolojio, “Eyari isia orobiyaha tomwana hunik henyiaŋari mai nafa obuahari modie ¹⁰ nyo ara isia idumit innafa oŋotori onyirok he Isaraile iyya etuhutek Habu ta hanaŋ.” ¹¹ Etiwetik isia Yesu to hosiere ho Mandir atta Mandir hifia hijo, “Ira iyye Habu lo Yudea?” Atta Yesu hitirraŋ hijo, “Iyya ejio hido iyye.” ¹² Ati orrosita fadirihien illo hittaha iko maruak inyia hirro arria ati obe inyia etirraŋ nobo sihin. ¹³ Attati Pilato hijio do honyie hijo, “Ebe iyye etiru irrositi arria hunna orrosok isia iyye?” ¹⁴ Ati odua inyia liŋliŋ, to nia ellilliha mandir binno. ¹⁵ Ta far no hiyyom nettok ohou mandir lobo lefita iyya awak iluluŋ no hiyyo. ¹⁶ Ifa to holoŋi niyya owuon lobo haboloni to kijan la ara Baraba. ¹⁷ Nafa ottubai hiyyo daŋ ta mai nobotie, ojio Pilato to hose hijio, “Hiwak itai hijo hahek nayya ŋai ta hatai? Baraba kuyya hidofe Yesu le elliloŋo Kristo?” ¹⁸ Nyo oyyen Pilato hijo eyyani ida isia Yesu ta haini. ¹⁹ Heletole Pilato to kurus iŋotiit, efahak noŋoruo honye hiro to honyie hijo “Baŋa ehum nobo sihin to tuŋani la anyar, nyo ena eriga nayya norru binno te inyie.” ²⁰ Esusuta fadirihien illo hittaha hiwo daŋ hefiari Pilato hijo hotohek inyia Baraba, ojo hidofe hotottohoi ida Yesu. ²¹ Efia mandir to hosie hijo, “Hahek iso naŋ lari ta hatai?” Ojio isia “Baraba.” ²² Ojio Pilato atta hijo to hose hijo, “Hehum iso naŋ nyo to Yesu ille elliloŋo Kristo?” Ojio isia daŋ atta hitirraŋ daŋ to honyie hijo, “Isihok inyia” ²³ Ojio mandir atta hitirraŋ to hosie hijo, “Nyo nia lorru ne ehum inyia?” Ati eyyorro ifa isia binno hijo, “Isihok inyia.” ²⁴ Ewolo Pilato hijo ettallik inyie hihum nobo sihin nyo ewuwuoŋita hiyyo binno. To nia amoju inyia hifioŋ atta hillila to hosiere ho hiyyo atta hijo, “Abe naŋ aremik hiŋot ye no lobo tuŋani lobe owuon iko hipali. Itiwolo ati itai ta wati te innahatai.” ²⁵ Etirraŋ hiyyo daŋ hijo, “Isiara hotoŋot yee nohonye to hoi iko to durre illohooi.” ²⁶ To nia atta Pilato ahek Baraba to hosie, ati esio inyia Yesu habahari iko hesihohini. ²⁷ Atta oseŋer illo mandir eyari Yesu a haji inna hittok nyo owuon isia to let hidofe, ottubahini iluluŋ to honyie. ²⁸ Ohou isia boŋojin innohonyie atta eticiofok boŋo riet. Oyyir isia ihita no hikua atta esihok to honye atta hisio ciol ta hani he inyiet nohonyie. ²⁹ Origoŋo isia do hosiere honyie atta ellohitari inyia hijo, “Habu lo Yudea, odule manya ahosiere!” ³⁰ Omita isia hamilak to honye atta baha hoo nohonyie to ciol. ³¹ Nafa attuhok isia ellohitari isieja, ahou isia boŋo nara atta eticiofok boŋojin innohonyie tohonyie, hidofe orihori isia inyia adde hesihohini. ³² Ajiŋai isia allet atta hiboŋ iko lobo tuŋani lo Sirene lara fure nohonyie Simone, lafa orrosok isi inyia halorori kuruce nolofuye isia esohini Yesu. ³³ Eba isia ta mai nara fure Golgota, nolo,”Mai no hoo.” ³⁴ Esio isia hifioŋ inna ajalaŋi hunna eharra iko nobo yani nolodua binno. Ati leniŋ inyia, atta inyia hibo himat. ³⁵ Nafa esihok isi inyia, atta isia hibwan boŋojin innohonyie to baha no muaŋa. ³⁶ Attati isia hitole heririari inyoa ta mai nyie. ³⁷ Hidofe, egiorohini to hide ho kuruce nohonyie to hiro inno irrositi innohonyie nojio, “Yesu ille, ara inyia a habu lo Yudea.” ³⁸ To holoŋ nia esihohini inyia iko hahalak lohorik, lobotie ta hani he inyiet, ojio lobotie ta hani he ihorroŋ nohonyie. ³⁹ Omoro hiyyo illo olot Yesu atta huta inyia to hafiala hijo, ⁴⁰ ”Iyye le ejio hijo etattur naŋ haji imojit nettok, enyiak duho to holoŋi hunik, itihoru wan nohoi, hidofe isuru iyyania to kuruce kuyya lera iyye dede Lonyi Hollum!” ⁴¹ Ellohitari hidofe fadirihien illo hittaha, hegiorok iko maruak inyia hijo, ⁴² ”Etilohu ifa inyia ilak, ettallik iso inyia etilohu wan nohonye. Inyia habu le Isarail. Tonia tojio to honyie isuru iyyania to kuruce, atta iso iyyohoi huruk to honyie. ⁴³ Eyyik hido inyia to Hollum. Tojio Hollum hetilohu inyia iyyania iyya awak inyia nyo ojio ifa inyia hijo, “Nayya Lonyi Hollum.” ⁴⁴ Atta hahalak illafa esihohini iko inyia moro inyia ania. ⁴⁵ Ta saa ille, no holoŋ iko iŋalio, orioho fau daŋ edumele tiir tiir, ⁴⁶ da saa hunik, elliloŋo Yesu nolokuat binno hijo, Eli Eli, lama sabaktani?” nojo hijo, “Hollum lalaŋ, Hollum lalaŋ, nyo ebusak iyye nayya?” ⁴⁷ Nafa etiru hiyyo illafa oweta dia atta isia hiro hijo, “Ellilloŋo inyia Elija.” ⁴⁸ Onyior hidofe lobo lohosie atta erutok hani nohonyie atta adumu boŋo atta eduttok a hotwai ho hifioŋ inne edualaŋa atta ehumak to hide ho siholo anyar etimatari isia. ⁴⁹ Ojo illak, “Ibusak hoi inyia hame. Itirriŋe, kuyya ottu iso Elia hetihoru inyia.” ⁵⁰ Edas Yesu yio no okuat binno to hutuk atta ebusak oyiri nohonyie. ⁵¹ Atta boŋo na haji imojit nettok guasa hame masik arik to hide man afau. Ojio fau ekikiro, atta moruo buara. ⁵² Ojio hidofe ilumioho aŋa ojo hiyyo halibok illafa oye beren atta ebuhu. ⁵³ Ta halu hebuhu no Yesu, afanu isia adde te ilumioho atta ajiŋak a bore gala no odua, egonyu hiyyo arria isia. ⁵⁴ Abaŋi ettok ho oseŋer iko hiyyo honyie hullo eriria Yesu, nafa egonyu isia hirro innafa edoŋ atta isia baŋi atta hijo, “Dede ara hada inyia Lonyi Hollum.” ⁵⁵ Owuon ifa ŋoruo arria dia inne eririra alamarai, ejufuta ifa isia Yesu ta Galilea haluahari inyia. ⁵⁶ To hiji hose, owuon ifa Mariya Madalina, hidofe, Mariya hotonye Yakobo iko Yosefu ojio hotonye lonyirok Sebedeyo. ⁵⁷ Nafa era kaikai, ottu habarani to doŋe na Arimatea lara fure Yosefu. Ara ifa inyia heyiyenani lo Yesu. ⁵⁸ Owu ifa inyia to Pilato hefiari wan no Yesu, atta Pilato efahak hiyyo hesiarari wan no Yesu to honye. ⁵⁹ Eyari Yosefu wan atta abubunak inyia to boŋo nololibo, ⁶⁰ Atta etiferik inyia te ilume honye inna ŋejuk nottulahini te ibak. Ettaborok inyia moruo nettok to hutuk he ilume atta eno adde. ⁶¹ Ettole Mariya Madalina iko Mariya nobo hame to oger he ilume. ⁶² To far na sabato afanu fadirihien iko ettaha iko Farisei to Pilato ⁶³ atta hijio, “Habu, agilu iyyohoi hiji, ojio ifa henyabani lia nafa ho owuar inyia hijio, “Ta halu ho holoŋitek hunik ebuhu iso nayya. ⁶⁴ Tonia ifahak oseŋer hetigolori ilume man to holoŋ hitahunihi, ŋaso heyiyenak illohonye afanu ahahalari wan nohonyie adde, ŋaso isia afanu hijio to hiyyo hijo, ‘Ebuhu inyia to ye, hidofe orru iso hinyaba nia agalik.” ⁶⁵ Ojio Pilato to hose hijo, “Ewuon itai iko oseŋer, ifeti itigolo ilume iyya eremik itai. ⁶⁶ Attati isia ŋefie etigolori ilume to moruo no otiohok dia, hidofe arasa oseŋer hiriria.