¹ Iyania ata heduduhak ho musuru daŋ iko ilak heyak afanu to Yesu etirari inya. ² Ata Farisei he hegiorok hiŋuŋunita to wati te ino hosie, hijo, “Elliloŋu tuŋani ileŋ heyak ata daha daŋ iko isia.” ³ Ata Yesu hiro hitigiri ina to hosie, hijo, ⁴ “Lari tara hatai, iya owon ida inya ho kioro hisihi nobotie ata nobotie litai, obe iso lebusak tomwana hotoŋuan hohotoŋuan to tim, ata asiahari lia olita man orumuni lia? ⁵ Iya arumu inya lia lafa lolita, olorok inya lia to loho ata mune. ⁶ Lojo inya eba ta haŋ honye, eliloŋu inya motiarak ojo onyihari honye daŋ arabotie, ejo to hosie, ‘Hetimune arumu naŋ ker lalaŋ lafa olita. ‘ ⁷ Ajo naŋ ta hatai, Iyania obolo iso mune te ido to heyyani lobotie lo oyito to hiyata inohonye agalik hiyo tomwana hotoŋwan ho hotogwan ilo obe owak eruk. ⁸ Iya owon nobo hito noŋoruo ha arobiya tomon, ati lojo inya etilite lobotie, obe letuwulek lomo ata hifie haji, ata hisiek kai-kai man orumuni? ⁹ Nafa arumu inya, ata hililoŋ motiarak honye, he Onyihari, Ata hijo, ‘Hetumunei ika naŋ, arumu naŋ rial lafa etilitek naŋ.’ ¹⁰ Iyania, ajo naŋ ta hatai, owon mune to hosiere ha anjilohien ilo Hollum to heyyani lobotie oyito.” ¹¹ Ata Yesu hijo, “Owuon ifa lobo tuŋani ho onyirok ilohonye ohorik, ¹² Ata lia hittiŋ tara hosie hijo to monye, ‘Baba, isiara ta hanaŋ ibariti ina ara lorutat inanaŋ.’ Ata inya abuanyak ibariti ino honye to hosie. ¹³ Ta halu ho holoŋitek kai, eno hito lettiŋ iko ibariti inohonye daŋ adoŋe na lalama, dia ata inya hinyaŋa hiro ino oru ina amanyari asai. ¹⁴ Nafa esok inya arobia inohonye daŋ, awoŋ hiŋa no loru a doŋe inya, ata inya hilociaŋ bi no. ¹⁵ Ata inya eno hisio wan nohonye egiemari adoŋe nya to lobo tuŋani, le efahak inya amana etamari bataha ino honye. ¹⁶ Ata inya manya ta habohol ino moro ina adaha bataha nyo obe ifa lobo tuŋani esio inya nobo daha. ¹⁷ Nafa agilu onyi lia ata hijo, ‘hara hegiamak ta haŋ ho monye hanaŋ jai ila adaha ŋiria netok, ajo naya aye ho hiŋa! ¹⁸ Awu naŋ ebusak mai ina ata naŋ eno to monye hanaŋ, awu iso naŋ hijo to honye, “Baba, eyyau naŋ to hosiere he ido, ojo to hosiere hoi. ¹⁹ Abe naŋ asiru hira a onyi hoi; ati ihumak naya ahegiamani lohoi.‘“ ²⁰ Nia, odiote loŋeye lia ata awoŋ man to monye. Nafa halalama inya, egonyu monye honye inya, ata amehini, ata hinyior efonyari ata hijur inya. ²¹ Ata onyi hijo to monye, ‘Baba, eyyau naŋ to hosiere ho ido iko to hosiere hoi. Abe naŋ asiru a onyi hoi.‘ ²² Ojo monye to hegiamak ilohonye, ‘Iyani boŋojin ino olibo kwak iticofok to honye, ihumak bilet ta hafialai honye iko hamuha to hejek inohonye. ²³ Iyani tauwo lo ofir isiahak to honye. Heti dahai karama nohonye. ²⁴ Oye ifa onyi hanaŋ, atti iyania awuaru inya. Olita ifa inya, Iyania arrumuni inya. ²⁵ 25Owuon ifa onyi honye ileŋ hittok ta mana. Ifa eliaha inya aŋati ha haŋ, etiru inya hififoho ojo caa. ²⁶ Ata inya hililoŋ lobo hegiamani ata hifi hijo, howuon nyo. ²⁷ Ata hegiamani hijo to honye, ‘Otu ida ilasi hoi ahaŋ inya nia, adumu monye hoi tawo lo ofir bi no ata esiahak to honye, nyo acohini inya a nalanyar.’ ²⁸ Ejoria ifa ilasi lehitok, ata hibo eno ahotwai, ojo monye otu abali, atanari inya. ²⁹ Ata ati onyi etok hitiraŋ to monye hijo, ‘toriŋai ŋasi huna lepitori naya to hoi, abe naya amiasa hifahita ino hoi, ejo iye ebe esio naya lobo oburuŋati lo hine hijo anyar abahak naya to karama motwarak hanaŋ, ³⁰ Ati awoŋ onyi hoi, eramitari ibariti ino hoi to somon, ata iye esiahak to honye tawuo lo ofir.‘ ³¹ Ojo monye to honye, ‘Onyi hanaŋ, adule naŋ ikohoi to holoŋi, ojo ina lara ina haŋ ara inohoi. ³² Ati osiru to hoi hehumahini karama ata mune, te ilasi hoi oye ifa Iyania ati awaru inya; olite ifa inya ojo Iyania arrumuni.‘“