¹ To nobo holoŋ no Sabato. Eno Yesu ahaji holobo etok lo Farisei adahari imune, ata isia ehutok oriŋari inya toktok. ² Ata lobo tuŋani lo oŋwai habalaco awoŋ to Yesu. ³ Ata Yesu hifia hejufutak ilo hifahita ilo Yudei he Farisei hijo, "Obis iso hetinyarari to Sabato?" ⁴ Oduehini ifa isia liŋliŋ. Ata Yesu arihu tuŋani lia ata hitinyar inya, ata efahak inya ade. ⁵ Atati inya hijo to hosie, “ŋai lia tara hatai lelum hito nohonye kuya hiteŋ to hiri to holong no Sabato obe awak epihu ade?” ⁶ Ati obe isia eheder hitiraŋ hifi nia. ⁷ Nafa egonyu Yesu ilak hiyo ilafa eliloŋu hiyo anyimu hitologita ino etaha elimahini inya isia daŋ hiti gir ina, ⁸ ’’Le liloŋu lobo tuŋani itai to karama no hiyama, ibaŋa etole ta harajin ino hosiere, nyo kuya owon lobo leliloŋu hiyo lalagalik itai. ⁹ Ati lawoŋ tuŋani lia daŋ, otu iso inya to wan nohonye monye karama eliloŋu itai daŋ, hijo tohoi, 'Isiara tuŋani lia mai nohoi,' Niya, owu iso inya hitole ta hara no fiahajok to iri. ¹⁰ Ati lelliloŋu inya iye ino itolojo ta mai nolofiak. Otu iso elliloŋu iye ata hijo, "Ila, tette woŋ a hosiere.' Eyyani is nia ohuo tohoi to hiji ho hiyo daŋ lia owon ikohoi dia to teremeja. ¹¹ Nyo tuŋani daŋ lalahaf wan nohonye ofiala iso ojo etifiala lobo wan nohonye ahafa iso inya.’’ ¹² Ejo Yesu to tuŋani lafa leliloŋu inya, "Isiara iye ŋiria no iŋalio kuya no harie, baŋa leliloŋ motte hoi, hilasi hoi, kuya hilahaŋ hatai kuya onyihari lohoi, lalabara iya to hose ofuo elienyu eliloŋu iye. ¹³ Ati lewana iye ho karama, ililoŋu locaŋak, haŋurak, yokiojok, ojo haŋodok. ¹⁴ Ata iso iye wuana ho jaha, nyo obe isia etidumak iye. Odumahini iso tohoi to hebuhu no habisak." ¹⁵ Nafa etiru lobo lohosie tara Ilafa etole ho Yesu to terefeja no ŋiria. Ata hijo, “Isiara jaha to lia ladaha iso imune to lobie no Hollum!” ¹⁶ Ata Yesu hijo to honye, “otiorok ifa lobo tuŋani ŋiria netok ata eliloŋuhiyo ariai. ¹⁷ Nafa olibe ŋiria, efahak inya hegiamani lohonyi heno helimak hiyo Ilafa elimak hijo, ‘Ifanu, nyo otubai hiro Iyania.’ ¹⁸ Ata isia bidaŋ ta mai hitiara hilima hijo, 'Einyaŋu ifa naya mana ajo naŋ luŋa ahu oriŋari, hibe woti, ibusak naŋ.’ ¹⁹ Ata lobotie hijo, ‘Einyaŋu iŋole naŋ ilak husuŋ haromok miet, ajo naŋ ahu hiciem isia, ila hibe woti.’ ²⁰ Ata lobo tuŋani hijo, ‘heletek naŋ yama, abe naŋ luŋa aremik awoŋ.’ ²¹ Ata hegiamani ŋacohari ata elimak etok lohonye hiro daŋ, ata etok lahaji lia hijoria, ata hijo to hegiamani, ‘kokuak ino ahikoi no bore na gala, Iyania lociaŋak, yokiajak, haŋodok he haŋurak.’ ²² Ata hegiamani hijo, etok, egiem naŋ daŋ inara ejo iye, ati ofitini nobo mai.’ ²³ Ojo etok to hegiamani, ‘Ino atulubaha, iko amaŋatin, ililoŋu hiyo hafanu ahotuai, anyar efut haji hanaŋ. ²⁴ Ajo naŋ tahatai, obe lobo tara Ilafa elimak naya eremik to hiniŋ ŋiria nanaŋ.''' ²⁵ Iyania, ofuo ifa iluluŋ no hiyo iko inya, ata inya yite ata hijo to hosie, ²⁶ “Lawoŋ lobo tuŋani ta hanaŋ ojo inya obe oliwari monye honye, hotonye, noŋoruo, dure, ilasira he hanasira, ojo manya nohonye daŋ hidofe obe eremik hira aheyiyanani hanaŋ. ²⁷ Lia lobe olorita Kuruce nohonye ata awoŋ ta halu hanaŋ obe eremik hira hejufutani hanaŋ. ²⁸ Lawak lobo tara hatai, duho haji nelesaga, obe ohunya ta fau ata hihien hinyaŋita hariŋari hiro ino oremik hetufutak haji? ²⁹ Nyo letiarak inyafau na haji ata enyai hesohak, ile egonyu ilak igiem nya elohitari inya, ³⁰ Ata hijo, ‘Etiara tuŋani lia duho na haji obe ati eremik esahak.’ ³¹ Lari etok ohu oriomori fere ho lobo etok obe lohunya ta fau ata hihien hijo horemik iso oseŋer hisihai tomon ilohonye rem ho etok lolotu loremori ho inya ho oseŋer hullo hisihai tomon harik? ³² Lobe, halarasa hariomok liya alamarai, ata efahak herarani lohonye to hosiere herara hiro ino himwara. ³³ Nia, lobe lobo lahatai ebusak hiro ino omuno inya, obe iso eremik hira hejufutani hanaŋ. ³⁴ Olibo balaŋ bino, ati lolite dwan nohonye, horemik iso duaran jai? ³⁵ Obe osiru hegiamari to huron he hidofe ta tanyan ino efuro. Ebihiro iso ade. Lia loowon ho yohe hitirita, isiara inya hetiru.”