¹ Ta halu ho hirro hunna, ebonno Yesu ahide atta hijo, "Monye hanaŋ, awoŋ saa hanaŋ; Itahwo nayya a Lonyi hoi anyar etahwo Lonyi hoi iyye. ² Nyo esio ifa iyye naŋ hilohittok hagalihini hiyyo daŋ hijo anyar esio naŋ ille esio iyye ta hanaŋ manya no osio fur. ³ Manya no osio inna, hijo anyar oyyen isia iyye, hijo iyye Hollum ille lobotie dede iko Yesu Kristo lafa efahu iyye. ⁴ Etahwo naŋ iyye ta fau, Atuhok naŋ igem nafa esio naŋ hegiama. ⁵ Iyyania, Monye, etahwo naŋ daŋ iko hoi ho hitahwo nafa owuon man beren ta nafa eyyeuni iyye fau ho hirro daŋ inno owuon ta fau. ⁶ Etuhutek nayya fure nohoi to hiyyo daŋ illafa esio ta hanaŋ ta fau. Ara ifa isia illohoi; atta iyye hisio isia ta hanaŋ, ojo isia odule hiniefita hiram nohoi. ⁷ Iyyania oyyen isia hijo lesio iyye nayya innak hirro, afanu hirro niyya tara hoi, ⁸ esio naŋ to hosie rori innafa esio iyye ta hanaŋ. Amoju isia ojo hidofe oyyen dede hijo afanu tara hoi, man eruk hijo efahu iyye naŋ. ⁹ Amojo naŋ te isia. Abe naŋ amojo ta fau ati to ilia illafa esio iyye naŋ, nyo ara isia illohoi. ¹⁰ Ara hirro innanaŋ daŋ innohosie, ojo innohoi daŋ ara inneti, etihabwo naŋ te isia. ¹¹ Abe naŋ iyyania enyiak wana ta fau, ati owuon hiyyo illia ta fau, ajo naŋ attu to hoi. Monye lolibo, ogocie isia to fure nohoi hijo esio iyye isiea ta hanaŋ anyar ottuba isia nobotie, iyya era iyyohoi nobotie. ¹² Nafa halawuon naŋ he isia, adule naŋ hiniefita isia to golon no fure nohoi innafa esio iyye ta hanaŋ, eriria naŋ isia, ati obe lobo lebusari ade, aracie lonyi henyabani, hijo anyar otuba higierita. ¹³ Iyyania awoŋ naŋ to hoi; ati ero naŋ hirro hunna ta fau hijo efut mune nanaŋ to hosie. ¹⁴ Esio naŋ to hosie hiram nohoi; Aliwari fau isia nyo obe isia ara illafa fau, iyya abe naŋ hidofe awuon ta fau. ¹⁵ Abe naŋ amojo hijo anyar eyari isia adde ta fau ati anyar eriria iyye isia tara henyabani. ¹⁶ Obe isia ara illo fau, iyya abe hidofe naŋ ara la fau. ¹⁷ Igialak isia hatara illohoi te ibisiti; nyo obis hiram nohoi. ¹⁸ Iyya nafa efahahini iyye nayya afau, efahak hidofe nayya isia a fau. ¹⁹ Esio nayya wan nanaŋ to hoi te isia hijo anyar esio hidofe isia wati innohosie to hoi te ibisiti. ²⁰ Abe naŋ amojo te isia hame ati to ilia ille eruk ta hanaŋ to hiro nohosie. ²¹ Hijo anyar otuba isia nobotie, Monye iyya nia ewuanari iyye ta hanaŋ, awuon nayya dohoi. Amojo naŋ hijo hotowuana isia tohoi hijo anyar eruk fau hijo efahu iyye nayya. ²² Hitahwo nafa esio iyye ta hanaŋ--Esio naŋ do hosie, hijo hotubai isia, iyya inna etubari nobotie- ²³ Ajo nayya to hosie, eijo iyye ta hanaŋ, anyar olibo isia nobotie; ojo fau atta hiyyen hijo efahu ifa iyye nayya dede, atta mune isia iyya nia emunori iyye nayya. ²⁴ Monye, awak naŋ ille esio iyye ta hanaŋ, anyar owuon isia ika naŋ tamai na awuanari naŋ anyar egonyu isia lohwo nanaŋ, nafa esio iyye ta hanaŋ: Emuno ifa iyye beren holobe hitieri na fau. ²⁵ Monye lolo odua, obe ida hido hiyyo oyyen iyye, ati ayyen naŋ iyye, oyyen hullo hijo efahu iyye nayya. ²⁶ Etuhutek nayya fure nohoi to hosie, ati enyiak iso hidofe nayya etuhutek fure nohoi hijo hotowuana mune nemunori iyye nayya owuon ta tajia innohosie."