¹ Ero nayya hirro hunna ta hatai hijo hotobiaŋa itai ehuyuta. ² Efuhak iso isia itai ade ta hajik inno imojiti; dede awoŋ holoŋ nafa egigilori hatohok hatai hijo egiama inyia igiem na lanyar to Hollum. ³ Egiama isia hirro inia nyo obe isia oyyen Monye kuya nayya. ⁴ Ero nayya hirro hunna ta hatai hijo lawoŋ holoŋ nafa nia ta hatai, eremik iso itai egigilu isia iyya nafa nia elimahini nayya itai hiram nohosie isia. Abe nayya elimak itai hijo hirro inia man to hitieri nyo awuon ifa nayya iko inyia. ⁵ Iyyania, awu nayya to honyie lia ille efahu nayya; ati obe lobo lahatai efi nayya, 'Hewu iyye aji? ⁶ Ati ajo nayya hirro hunna to hatai, efut iso mijan ta tajia hatai. ⁷ Iyyania, elimak nayya itai dede: anyar iso ta hatai leno nayya ade; nyo lenyai nayya hawu ade, obe iso hesiŋani ottu; ati kuya leno nayya, efahu iso nayya inyia ta hatai. ⁸ Lawoŋ inyia, ottu iso hesiŋani etuhutek hijo epal fau to hiram no hiyyata, ibisiti ojo ŋoto ⁹ hiyyata, nyo obe isia eruk to nayya; ¹⁰ to higigilo no bisan, nyo eno nayya to Monye, ejo itai ebe enyiak egonyu nayya nobo; ¹¹ to higigilo no ŋoto, nyo oŋoto ifa hekumoni lafau inna. ¹² Ayita nayya hirro ariai hunna aremik nayya hijo ta hatai, ati ebe itai eremik hetiru isia na lanyar iyyania. ¹³ Tonia, ifa inyia, oyiri lo bisan, awoŋ, etidihita iso iya itai to bisan; nyo obe iso ero towan nohonyi; ati etiru iso hiro bi daŋ, ero iso inya hiro inia; ojo iso inyia opulok ta hatai hiro ino afanu iso. ¹⁴ Etihabwo iso inyia nayya, nyo eyari iso inyia hirro innanaŋ atta inyia elimak ta hatai. ¹⁵ Hirro bi daŋ inno Monye ara bi daŋ inanaŋ; Tonia, ajo nayya hijo eyari iso oyiri hirro inanaŋ atta apulok isia ta hatai. ¹⁶ Kai iyyania, ebe iso itai enyiak egonyu nayya; ta halu kai enyiak iso itai egonyu nayya.'' ¹⁷ Ero ilamuk heyiyanak illohonyi ta wati innohosie, ''Hojo inyia nyo tohoi to hiro nohonyie, ''Kai iyyania, ebe iso itai enyiak egonyu nayya,' ojo kai hidofe atta itai hinyiak egonyu nayya,' nyo awu nayya to Monye?'' ¹⁸ Ejo isia , Hara ŋari nyo nia ojio inyia, hijo kai iyyania? Ebe iyyohoi eyyen hiro innia ojo inyia.'' ¹⁹ Egonyu Yesu hijo owuon isia iko wahan hefiari inyia, ojo inyia atta hijo to hosie, ''Efia itai wati innahatai to hiram inna, nia ejo nayya 'Lobo kai, ebe iso itai enyiak egonyu nayya; ojo ta halu enyiak iso itai egonyu nayya? ²⁰ Dede, ajo nayya ta hatai, eyio iso itai ejo hidofe elalia, ati omuno iso fau; ejo itai iso ewuon iko hijiriŋa, ati oyito iso hijiriŋa nahatai amune. ²¹ Owuon iso hiito noŋoruo iko hijiriŋa lawahan inyia hitado nyo awoŋ holoŋ nohonyie no hitado hiito, obe iso inyia enyiak hiyyen diahai nyo to mune nohonyie hijo esini hiito ta fau. ²² Ewuon iso itai iko hijiriŋa iyyania, ati attu iso nayya hinyiak hiwolo itai; ojo tajia inna hatai atta wuana iko mune, obe iso lobo tuŋani oremik eyari ade mune nahatai tara hatai. ²³ to holoŋ nya ebe iso itai eremik hifi nayya. Dede, dede, ajo nayya ta hatai, kuya efia itai innak hiro to Monye hanaŋ, esio iso inyia ta hatai to fure nanaŋ. ²⁴ Man iyyania ebe itai efia innak hirro to fure nanaŋ; ifia ejo itai emoju anyar mahati ewuon homune nahatai ne efut. ²⁵ Ero ifa nayya hirro hunna ta hatai to hirori no hitihuti, ati awoŋ holoŋ inna abe iso nayya aremik hidas hiro ta hatai to hirori inno hitirijita ati awu iso nayya elimak ta hatai nolibo to Monye. ²⁶ To holoŋ nyia efi iso itai to fure nanaŋ, ajo nayya abe elimak ta hatai hijo awu iso nayya mojo to Monye te itai; ²⁷ nyo omuno Monye hanaŋ itai hijo emuno itai nayya ejo hidofe itai eruk hijo attu nayya tara Monye. ²⁸ Attu nayya tara Monye, ajo nayya attu iso afau; Eno naŋ ebusak fau ajo nayya awu to Monye hanaŋ.'' ²⁹ Ejo heyiyanak illohonyie hijo, ''Towolo, iyyania ero iyye nolibo; ero iyye to hirorita inno hitihuta. ³⁰ iyyania eyyen iyyohoi hijo eyyen iyye hirro bi daŋ, ejo iyye ebe ewak lobo hefia iyye. Nyo to innia, eruk iyyohoi hijo ettu iyye tara Hollum. ³¹ Etiraŋ Yesu isia, eruk itai iyyania?'' ³² Towolo, ehutu holoŋ, ee, awoŋ luŋa dede, nefu itai esisarahini, lobo daŋ ta haŋ honyie, atta itai ebusak nayya lobotie. Ati abe nayya awuon hame nyo owuon Monye iko nayya. ³³ Ero nayya hirro hunna ta hatai hijo ta nayya anyar mahati ewoun itai iko himwara. Ta fau inni ewuon iso itai hitigiemita arria ati anyar ebe itai ebaŋ: Agalik nayya fau.''