¹ Ara ifa Melkisedek habu lo Salem hidofe ara fadiri lo Hollum la galik daŋ. Eboŋohini ifa inyia iko Abramo nafa aciohini Abramo to toho nohonyie habuwok atta Melkisedek etijahak inyia. ² Esio ifa Abramo kal hitatomoni to honyi no hirro inno eyyani inyia ta mai horem, nyo ahosiere daŋ, ara Melkisedek ahabu lo bisan iyya etihutek fure nohonyie. Ara inyia hidofe habu lo Salem nojo habu elik taji. ³ Obe ifa inyia owuon iko monye, iko hotonye, ojo hohonyiok, obe ifa hitieri iko hisidi no manya nohonyie. Ati arasa inyia afadiri iyya onyi Hollum mak. ⁴ Iko ituwolo bolo no tuŋani ille nyo esio ifa Abramo kal hititamoni to honyie no hirrro hunna eyari inyia amai ho rem. ⁵ Dede onyirok ho Levi illafa omoju egiamari no fadirihien owuon isia iko hifahi no heyari hisiorita tara hiyyo, hijo ilasira illo Isarali ara ida hido isia onyirok ha Abramo. ⁶ Ati tuŋani lia Melkisedek lo obe ara to woyyo ba Lefi, omoju inyia kal hitatomoni hijo Abramo, hidofe etijak inyia lia lo owuon iko itieriti. ⁷ Hiram inna ara dede hijio, etijak tuŋani ille agalik lia odicio. ⁸ Ati niyya omoju fadirihien lia to woyyo ba Levi kal hitatomoni, no oye ida hido isia omoju Melkisedek kal nia ojo inyia ara tuŋani lo owuar fur. ⁹ Ati ajo naya hijo, Levi lo omoju kal hitatomoni, oduma ifa inyia beren kal no hitatomoni ta Abramo, ¹⁰ nyo owuon ifa inyia ta mai hohonyi honyie Abramo nafa eboŋori Melkisedek iko Abramo. ¹¹ Iyyania kuyya onyimu hiyyo bisan ta fadirihien illo woyyo ba Levi nyo te inyia omoju hiyyo hifahita, nyo obe iso ŋai enyiak wahan fadiri lobo lia ocialari iko Arone hoto'diote, ati tara ba Melkisedek? ¹² Nyo eloyit woyyo no fadirihien, anyar eloyit hidofe hifahita. ¹³ To hiyyo hullo elimahini hirorita hunaŋ to hosi ara isia illo nobo woyyo, hullo holobe lobo tuŋani higiama ta altari. ¹⁴ Ati iyyania, ara ifa dede hijio ottu ifa Habu lohoi to woyyo ba Yuda, woyyo nafa obe Musa eliet hijo hatara afadirihien. ¹⁵ Ati obis hirro huna ero iyyohoi hijo odioto lobo fadiri la ara iyya Melkisedek. ¹⁶ Obe inyia ara fadiri to hijufuta nohonyie hifahita, ati to duaran no wuaran no obe iso esid. ¹⁷ Nyo ojo ifa to honyie hijo ara iso iyye afadiri mak to woyyo ba Melkisedek. ¹⁸ Ati opuahan ifa hifahi nia to hosiere nyo elik ifa inyia ojo hidofe ofiak. ¹⁹ Nyo obe ifa hifahita etibis illak hirro ati ewuon iyyhoi iko heyihini na anyar agalik, ehutori iyyohoi to Hollum. ²⁰ Ehumak ifa Kirsto afadiri to hilifo. ²¹ ehumak fadirihien ilia to hosiere to biaŋan no hilifo, ati ero Hollum to Kristo hijio elifo habu. Hidofe obeŋ iso inyia eloyit hirorita innohonyie ara iso iyye afadiri mak. ²² To nia etigol Yesu itierit ŋejuk na la nayar agalik nafa maruani. ²³ Owuon ifa fadirihien aracie nyo oye lobo orutak iso lobo igem no inyia hegiamari mak. ²⁴ Ati odule Yesu mak to nia odule obe iso igem no honyi esaha. ²⁵ Ojio to nia oremik inyia hetilohini man mak lia daŋ hullo afanu to Hollum te inyia nyo amnaya inyia mak amojori te inyia. ²⁶ Anyar to hoi ha awuanari iko fadiri lo obolo iyya lia nyo olibo inyia hidofe obe inyia enyiaba, kuya hido eyyau amanya inyia to hiji ho heyyak hidofe etihabuwo inyia idoho. ²⁷ Obe Yesu esio hihumita holoŋitik daŋ iyya nafa ehumari fadirihien hullo hitaha, to hiyyata innohosie ahosiere, ojo ta halu ho hiyyata inno hiyyo. Ati ehumak ifa inya hifahi nobotie nesio ifa inyia wan nohonyie hayori to kuruce. ²⁸ Onyimu ifa hifahita inno Musa hiyyo hullo elik, ati hirro no hilifo no owuon ta halu ho hifahita, onyimu inyia Lonyi lo obis mak.