1 Iyania ara hiruk heyik hijo afanu iso hirro hunna etila iyyohoi, ojo inyie ara heyik hijo owuon hiro dede hunna obe watik oliew. 2 Nyo to huruk hijio etimuno hiyyo illafa ho beren Hollum. 3 To hiruk eyyen iyyohoi hijio oyyieni ifa fau daŋ to hiro no Hollum, ati tara oyyieni ifa hirro hunna egonyu iyyohoi to hirro hunna obe wati olliew. 4 To hiruk esio ifa Abel hisiorita to Hollum inno olibo wati agalik hisiorita inno Kaino, Tara etuhutek Hollum ta Abel hijio, ebis iyye, nyo amoju Hollum hisiorita inohonyie. Oye inyia ifa beren ati arasa inyia hiro to hiruk. 5 To hiruk akafari ifa Hollum Enok ido holobe inyia ye. "Ati, obe ifa hiyyo orrumek inyia, nyo eyari Hollum inyia." Ati ojio ifa hiro to honyie hijo, etimuno inyia ifa Hollum holobe eno eido. 6 To biaŋan no hiruk, ogol hetihabuori Hollum, ati to lia la awak awoŋ to Hollum anyar eruk inyia hijo, arasa Hollum manye hidofe esio hijohiti to hiyyo illo etufa inyia. 7 To hiruk aduhok ifa Noa togoli hijio anyar etilahu hiyyo ta haŋ honyie, nyo elimak Hollum inyia hirro hunna obe wati oliew, ati atta inyia baŋi to higiemita inohonyie hunna ogot inyia ta fau, ati owu inyia hira aharutani lo habisak to hiruk. 8 To hiruk efaha Abramo, nafa ellilloŋori inyia hawuye adoŋe nyia nafa omoju inyia tara ho Hollum hijio doŋe orrutari nohonyie. Ati eno ifa inyia amai no obe inyia oyyen. 9 To hiruk, amanya ifa inyia ahatamononi ta fau nafa otiorohini to honyie. Hidofe amanya inyia iko Yokobo ojio Isako aharutak illo fau nyie tara honyie. 10 Ara hijo anyar oriŋa inyia ahosiere harumehini bore no gala inna ara haduhok innohonyie iso Hollum. 11 To hiruk orrumu ifa Sara duaran hesini hiito ta amaruahai nyo eyik inyia to lia lafa otiorok to honyie hijo, obe iso inyia etupuwak hiram nafa ero inyia. 12 To tuŋani lobotie, emaruwak ida hido inyia bi no no, afanu iso hiyyo ilo emonya iyya haher inno owuon te idou ojo hidofe emonya iso isia iyya siŋata inno owuon to otifor ha hari. 13 Oye ifa hiyyo hullo daŋ to hiruk holobeŋ isia arrumu hirro hunna otiorohini, ati egonyu isia hirro hunna ta alamarai atta mune, nyo ojo isia hijio era isie ahatamonok iko hallotok ta fau inna. 14 Nyo lia le ero iyyania, etuhutek hijo osiaha isia nobo fau anyar ara anohosie. 15 Kuyya ida le egigilo isia ta fau ne ediahari isia, erumu ida isie hikoi haciahari ade. 16 ati awak isia nobo fau nala anyar agalik, no lo owuon te ido. To nia obe Hollum eloriri hawuanari a Hollum lohosie. Nyo ehuhumak inyia mai te isia. 17 To hiruk no Abramo, esio inyia lonyi honyie Isako iyya hihumi to holoŋ nafa acamari Hollum inyia, 18 dede, lia lo omoju itieriti to mune eliaha ifa to honyie hesiarari lonyi honyie lobotie, ero ifa hido Hollum to honyie hijio, "Ehenini iso woyyo nohoi tara Isako." 19 Nyo eyik hijio oremik Hollum etibuhu Isako oye ida hido inyia , hidofe ara iyya omoju inyia Isako atta hiro atta ehumak te iyyohoi ahitimijani. 20 To hiruk etijak ifa Isako Yokobo iko Esau te imuniti hunna afanu iso. 21 To hiru etijak Yokobo onyirok ho Yesofo lobotie atta inyia hitihabuo Hollum lo ottirok wan nohonyie to hitehi, hijio eliaha ifa inyia ye. 22 To hiruk ero ifa Yosefo nafa eliaha ye nohonyie ta hajiŋahini no hiyyo Isarail, atta inya elimak isia heyari het innohonyie anyar onuhak. 23 To hiruk, eŋofok hesiok ho Musa inyia to yafajin hunik inafa esini hiyyo inyia, nyo egonyu isia hijio inyia hiito lolibo hidofe obe isia hifahi na habu. 24 To hiruk inna obolo Musa ebo ifa inyia hillilloŋo no hiyyo hijo inyia lonyi ŋani Farao, 25 atta inyia anyimu hetolojori iko hiyyo illo Hollum to hitigemita inno hosie, obe ara hamanyari to imuniti inno hiyyatta. 26 Egigilo ifa Musa hijio anyar hitigemita to fure no Kristo agalik ibariti inno Masir nyo orriŋa inyia to idumit no mwoi ottu. 27 To hiruk ebusak ifa inyia Masir, obe ara ta baŋi no Habu ati odule inyia halocie nyo egonyu inyia lia obe wan oliew. 28 To hiruk odule ifa inya yiri no laŋan no anjilo hidofe oruwas hiyyo to hoto hijio anyar obe toho no oŋewha ottir durre inno Isarail. 29 To hiruk allaŋ ifa isia hari no lodo iyya ara inyia fau no ote, nafa ojo hiyo ilo Masir ellaŋ adia hosie atta hifiioŋ awatari isia. 30 To hiruk ahuye ohitir inno doŋe no Yeriko nafa elutari hiyyo illo Isarail isia to holoŋitek hattarik. 31 To hiruk obe ifa Rahaba hasomoni oye nyo omoju inyia haliyamak to hilik ta na taji, Ara ida hido oye hiyyo illafa omiasa wati. 32 Ati ajo iso naŋ nyo ino emonya? Nyo abe naya awuon iko holoŋ helimahini to Gidion, Barak, Samson, Jefa, Davide, Samuele ojo inno hekilak, 33 ŋai lia iso orumek lobiehien to hiruk, to biaŋan no higiala to higemita, iko hamojini no itieriti. Esahak isia hutuhe inno emioho; 34 etudun isia hima no obolo; eris isia te ifija ho demi; to hilik to nohosie orumu isia golon hidofe obolo duaran to hosie hariomori atta isia hitatur miorok illohosie. 35 Omoju ŋoruo hayok illohosie nyo etibuhu isia. Etigem ifa ilak no loru man oyoori isia nyo ebo isia hahoni hijio anyar erumu waran nalanyar agalik. 36 Etigiama ifa hiyyo isia to hilohita to baha, hidofe to haririk iko hifita to kijan. 37 Erruwoŋ ifa hiyyo isia to moru, eŋiŋot isia to demio, eticiofo isia to leni inno hine iko inno kioro, etilociaŋ isia, etigema isia hidofe etiŋuwa ifa isia, 38 obe ifa lia ta fau olibo nobo, owuejita ifa to mur, to doŋiok, to nomi ojo to iwudoho hunna ta fau. 39 Owuon ida hido isia ahullo etumuno Hollum, to hiruk nohosie, obe isia oremik amoju hiro innafa otiorohini. 40 Nyo ehuhumak Hollum nobo sihin nalanyar agalik te iyyohoi, to nia obeŋ isia orumu bisan man ebarari to hoi hidofe.