¹ Ara ifa hifahita arrijori no hirro hunna olibo, hunna afanu iso, ati obe ara isia hirro inia luŋa, Tonia obe iso isia oremik etibisak hiyyo hullo afanu to hihumita hunna odule fadiri hisiara ŋasi daŋ. ² Kuyya etibisak iso hido isia hiyyo, opuak iso isia hesiarari to higemita nyo kuyya etilibo hihumita hiyyo hullo esio, ³ obe ida isia enyiak higigilo to hiyyatta innohosie. Ati to hihumita ŋasi daŋ to hiyyata ino hosie ⁴ nyo obe hoto no husuŋ kuyya no hine no oremik eyari hiyyata ade. ⁵ Niyya, nafa awoŋ Kristo afau ojio inyia hijio, "Ebe iyye ewak hisiorita iko hihumita, ati ehuhumak iyye wan ta nayya. ⁶ Obe hidofe iyye emuno hihumita hunna osuahak iko hunna hiyyata. ⁷ Atta Nayya hijo, "towolo Hollum, attu naya egiamari wahan nohoi, iyya egioro ifa to buk nohoi ta nayya." ⁸ To hosiere ojio inyia hijio: "Obe iyye emuno hisiorita iko hihumita, obe hidofe iyye ewak hihumita ino osuahahini iko ino hiyyata ino esiarari iyya egioro to hifahita. ⁹ Ta halu ojio inyia hijio, "Dede attu naya egiamari wahan nohoi, tonia, etupuak inyia itierit hitieri hijio, "Anyar etigol inyia hitarrihi. ¹⁰ To wahan to no Hollum, errumek iyyohoi libe nyo esio Yesu Kristo wan nohonyie hinyiahi hitieri to hiyyo daŋ. ¹¹ Holoŋitek daŋ owueta fadirihen hesiarari hihumita ino hosie edasedas, ati obe hihumita innia oremik eyyari hiyyata inno hiyyo daŋ adde. ¹² Ati esio ifa Kristo hihumi nobotie no odule mak to hiyyata, atta inyia hittole iko inyiet no Hollum. ¹³ Etila man ehumari miorok illohonye iyya ebalori hejek innohosie. ¹⁴ To hihumi nobotie etilib inyia onyimot ilo honyie mak. ¹⁵ Hidofe ara Oyiri lo Olibo asut lohoi atta inyia hijio, ¹⁶ "Ojio Habu, 'Ara naya himwara ne esio iso naya to hosie ta halu ho holoŋitek nia. Efiyak iso naya hifahita inanaŋ ta tajia innohose, hidofe egiorok iso naya higigilita innanaŋ to tajia innohosie, ajio hidofe egiorohini ta higigilita innohose."' ¹⁷ Ojio hidofe inyia hijio, "Abe iso naya enyiak agilu hiyyata innohosie iko irruti innohosie." ¹⁸ Tonia, lowuon hebusak no hiyata obe lobo tuŋani enyiak hisio hihumi to hiyata. ¹⁹ Tonia ilasira hanaŋ, ewuon iyyohoi iko hiŋere hajiŋari tamai no odua binno to hoto no Yesu, ²⁰ to hikoi ŋejuk na aŋa te iyyohoi hajiŋari aboŋo no orita nara iya wan nohonyie. ²¹ Nyo ewuon iyyohoi iko fadiri lettok binno lara ettok lo hiyyo illo Hollum. ²² Tonia hehutok aŋati ta tajia hunna obis, inne efut iko hiruk, ojio hidofe ino elileni te iwahiti ino orru, hidofe hehutok iko wati ino elileni to hifioŋ inno olibo. ²³ Hetigolik to heyik nohoi to biaŋan no hukuyya, nyo obe iso lia lafa ociorok hirro ino etipuak itieriti innohonye. ²⁴ Hidofe anyar egigilo iyyohoi to halasirak illohoi hetuwulori isia hamunori halasirak hosie ojio hidofe egiamari no olibo. ²⁵ Hidofe anyar iyyohoi ebe etupuak tubai no wati innohoi iyya egiama hiyyo hilak, ati hesiŋai halasria hohoi na agalik iyya egonyu itai holoŋ no Kristo eliaha. ²⁶ Kuyya omoju tuŋani bisan ojio ta halu, odule hiyya ojio inyia hidofe omuno hiyyata, obe nobo hihumi no oremik hefufuse hiyyata inne. ²⁷ Ati orrumek iso inyia ŋoto no lorru binno ojio hidofe hima no owulo binno noremik hitattur iso miorok illo Hollum. ²⁸ Ottohe ifa tuŋani to biaŋan no hamehini lia lebo lobo hifahita inno Musa lafa ero suti lohorik kuyya lohunik. ²⁹ Ati osiru iso haŋotori no obolo binno agalik to lia lebo Lnyi Hollum, lia lo omiana inyia to hoto ne emwarari no oremik hitilibo inyia, ojio hidofe omoro Oyiri lo hamehini. ³⁰ Nyo eyyen iyyohoi lia lafa ojio hijio, "Elienyu iso nayya ajio hidofe, "Aduma iso nayya." Enyiak hidofe inyia hijio, "Oŋot iso Habu hiyyo illohonye." ³¹ Dede, hahuyek ta has ho Hollum hauarani, ara hiram ne eyyani baŋi binno! ³² Ati itigilu holoŋitek innafa ellaŋ beren, nyo nafa eruhori itai hitigiemita inno ogol. ³³ Te innak holoŋitek ellohitari ifa hiyyo itai te imoriti iko ibahiti, ojio te innak holoŋitek ettole ifa itai nobotie iko hiyyo illo orrumek hitigemita. ³⁴ Nyo emehini ifa itai to liyya ille efita to kijan, ojio hidofe itai emuno nafa eyari hiyyo rori innahatai adde nyo eyyen itai hijio owuon hirro inna olibo agalik, ojio hidofe hiruk odule ta hatai fur. ³⁵ Tonia heruasak heyyik nahatai ade nyo errumek iso itai duma no obolo binno. ³⁶ Anyar ewuon iyyohoi ho dihan na tajia da hatai hijio lia lehuma to wahan to no Hollum, orrumek iso isia itierit. ³⁷ "Nyo ojio higierita hijio, 'Eba iso lia lo ottu, ati obe iso inyia elliŋa. ³⁸ Ati amanya iso hegiamani hanaŋ lo olibo to hiruk, ati loyite inyia, abe iso naŋ amuno inyia." ³⁹ Ebe iyyohoi era iyya liyya illo oyitori atta ye, ati ewuon iyyohoi iko hiruk hetilohini oholioho innohoi.