¹ Ifa beren ero Hollum to hohonyok illohoi to hekilak hinyiahita ariai ojio tokoi ariai. ² Ati to holoŋitek hunna eliaha wati, ero Hollum to hoi to onyi honyie, lafa onyimu inyia hotorutak hirro bidaŋ, ati tara honyie atta inyia ayyeu hirro inno fau. ³ Ara lonyi honyie to honyie acialai no kuatan, ojio hidofe ocialari iko Hollum dede ojio inyia ottoŋita hirro bidaŋ to duaran to no honyie. Nafa etilibik inyia hiyyata innohonyie, atta inyia hittole ta hani he inyiet no haduarani te idoo, ojio hidofe agalik anjilohien binno to nyo esio ifa hiyyo inyia fure no olibo na agalik inno anjilohien. ⁴ Obe ifa Hollum emak lobo anjilo hata galik onyi honyi to hikumita , iyya nafa agalihini fure no honyie inno anjilohien. ⁵ To higierita obe Hollum ero to lobo anjilo hiro inafa elimak inyia to onyi honyi: "Era iyye onyi hanaŋ! Ena elimak nayya to hiyyo bi daŋ hijio ara nayya monyohoi!'' Atta inyia hijo to nobo higieri, ''Awu nayya hirra amonye honyi, ojio inyia owu hirra onyi hanaŋ''? ⁶ Nafa eyyani Hollum onyi honyie ille abaŋ inyia, onyi honyie ille lobotie a fau, atta inyia hirro: anjilohien illo honyie bi daŋ anyar omojo inyia.'' ⁷ Ojio to higieri erro hidofe hirram no anjilohien: ''Ehumak Hollum anjilohien illo honyie hijo hatara alo Oyirihien no ogol no owuon iyya ŋadief no hima.'' ⁸ Ati to higierita, egiorohini hidofe ino onyi Hollum: ''Iyye lia era Hollum le hikumo man fur, ejio iso iyye ewu hikumo no lobis to obie no hoi. ⁹ Emuno iyye hiyyo illohoi illo obe eyyau ejio iyye ebe emuno hiyyo illo owuon iko iyyata. Ati Hollum ille emojo iyye, emak iyye hotomune binno agalik lobo lo owuon.'' ¹⁰ Eyyen hidofe iyyohoi hijo onyi honyi agalik anjilohien to nyo egioro to higierita hiram no onyi Hollum, "Hollum ara ifa iyye iyyeu fau to hitieri. Atta hidofe iyye ayyeu hirro bi daŋ inno owuon to fau, hahier ojio hirro bi daŋ inno owuon to hide. Obe hirro niyya enyak wuana, ati ewu iyye adule wuana man fur. ¹¹ Ofu isia hisaha agwasari iyya nia ogwasari boŋojin ade. Ewu iso abibinari isia iyya ara isia ¹² boŋojin. Atta ati iyye hiloyyit hirro bidaŋ inno owuon ta fau hatara innak hirro ŋejuho, iyya tuŋani ille eciofok boŋojin ŋejuho. Ati ettole iso iyye na ociala, ejio iso iyye emanya fur!'' ¹³ Holobe Hollum ejo innak hirro te illak anjilohien hirro inia ojio inyia to onyi honyie: '' Tohunye ta hani he inyiet hanaŋ ejio iyye ekumo daŋ hanaŋ ati ajio nayya awu himir miorok illohoi bidaŋ anyar ewuon iyye to hide hosie!'' ¹⁴ Ara anjilohien jia oyirihien illo efahu Hollum hijo anyar egiama ojo hidofe orriŋa heruhok illo ottu Hollum etilohu daŋ, iyya ojio inyia hijo awu inyia higiem to hosie.