¹ Isiara mune no halasira hotodule. ² Ibaŋa loguwe heyyanini hatamonok, ati to higiama nohoi, ihu iso itai hellilloŋu anjilohien illo obe itai ehum hiyyen. ³ Hegigile to hiyyo hullo efita to kijan, iyya ewuon itai de iko isia ojo hidofe iyya etigiamari watik inna hatai iyya innohosie. ⁴ Hetibaŋa yama daŋ ojo hidofe ijotit na hayamani hotodule libe, ottu iso Hollum hiŋot itai ilia eroto iko ŋorwo inno hiyyo iko hasomok. ⁵ Ibusak koi inno imanyiti inna hatai adde tara munoi no gurusi. Itolojo bolioŋ to saŋ te inyia owuon ta hatai, iyya lo ojo Hollum to wan lohonyi. "Abe iso nayya ebusak itai hidofe abe aguwe itai." ⁶ Hetimune to hiŋere no erarai hijo, "Ara Habu haluahani hanaŋ; abe iso nayya abaŋ. Nyo iso nia egiama lobo ta hanaŋ?" ⁷ Egigile to hiyyo hullo edihita itai, hullo elimak ta hatai hikenita inno Hlloum ta hatai iko ilibiti innohosie; ojo hitimiaha no hiruk no hosie. ⁸ Arasa Yesu Kristo lobotie man iŋoŋole, ena, man tulaŋ. ⁹ Hotobiaŋa hitiyenita hunna epal wati eyari itai ade, ati olibo la duhohini taji to hamehini, ati obe ara to imohiti inno ŋiria hunna obe oluak ilia hullo amanya te isia. ¹⁰ Ewuon iyyohoi iko altari ne egiamari ilia illo obe wati owuon iko bisan no hadahari. ¹¹ Hoto no ciaŋi ara ahisiorita no hiyyata, eyyani hehumak hullo obolo amai no olibo, ojo wati innohosie omudahini to oger ha maŋat. ¹² Etigem ifa hiyo Yesu to hikat ha bali no Yerusalam, hijo anyar etihutu hiyyo to Hollum to hoto no honyie. ¹³ Ati ehafi to honyie adia amaŋat, anyar edihu hitigiama to fure no honyie. ¹⁴ Nyo ebe iyyohoi ewuon iko haŋ inna odule inni ta fau. Ati hetufai haŋ nyia ottu. ¹⁵ To Yesu, edule iso iyyohoi hisiara hisiorita hetihabuori Hollum, hitihabuo ara inyia a haŋeri no hutuhen no lo oyyen fure nohonyi. ¹⁶ Ibaŋa loguwe hegiama no hiro inno olibo iko hiluwak no motiarak, ara to hisiorita hunna etumuno Hollum bi no. ¹⁷ Hetiniŋe ojo hidofe hefahai te ettaha illahatai, hijo anyar odule isia hiriria itai iko oholioho inna hatai hijo anyar oyyen isia. Itiniŋe hijo anyar honyi erriria ettaha illa hatai itai to mune, obe ara to hijiriŋa inna obe oluak itai. ¹⁸ Itimoje te iyyohoi, hijo anyar olibo tajia innohoi ejo hidofe iyyohoi ewak manya no olibo to hirro daŋ. ¹⁹ Ati elalia nayya ta hatai hijo legiama itai no obolo aciohini iso nayya ta hatai kuak. ²⁰ Ati iyyania, isiara himwara no Hollum hotowuana daŋ iko itai, lia etubuhu heyyohoni lo kioro ille hittok, inyia Yesu Kristo Habu lohoi. To hoto itierit inna amanya tulaŋ, ²¹ ihuhumak ilibiti inno saŋ ta hatai anyar hegiamari egem nohonyie, ne egiama to wati innohoi hijo anyar etimuno inyia to hosiere honyie, inyia Yesu Kristo, isiara kuatan hotodule to honyie fur. Amen. ²² Ilasirak hanaŋ elalia naŋ ta hatai hijo hetidi to hirro no hisiŋa nia egiorok naŋ ta hatai. ²³ Hetiyyen hijo ilasi hohoi Timeteo owuanai ifa inyia lo obe efita, efanu iso iyyohoi daŋ he inyia hiwolo itai la woŋ inyia kuak. ²⁴ Itifonyak ettaha iko heruhok illahatai daŋ. Etifonya hidofe lia lo owuon te Italia itai. ²⁵ Isiara hamehini hotowuana iko itai bi daŋ.