¹ Tonia iyya ekolok suti arria iyyohoi, hebusak hirro inne erosi iko hiyyata hunna eniefita iyyohoi tid, ojio hidofe hetinyetai to dihan na tajia to hikoi no owuon to hoi. ² Anyar erriŋa iyyohoi to Yesu le eciemini iko hetibisani lo mune no owuon iso ahosiere honyie. Ati omiana inyia irri no kuruce atta inyia hittole aŋati inyiet no kurus no Hollum. ³ Iko hetiriŋai to lia lodihu imoriti inno heyyak illo oliwari inyia hijio hotobiaŋa itai elafuho. ⁴ Ojio hidofe hotobiaŋa itai etaban ta tajia innahatai. ⁵ Errama itai iko hiyyata ati obe itai errama iko isia man owoni hotojin innahatai. Hidofe agwe itai hiro nafa esiŋari itai iyya lonyirok hijio: "Lonyi hanaŋ, baŋa omiana baha na Habu, hidofe, helafuho lesiŋa inyia iyye." ⁶ Nyo abak Habu lia lomuno inyia, hidofe etibis inyia lonyirok daŋ illo omoju inyia. ⁷ Adihu itai baha hetibisahini higemita innahatai. Ehuma Hollum ta hatai iyya onyirok, nyo ŋai monye lobe abak lonyi honye? ⁸ Kuyya obe inyia abak itai, iyya ehuma inyia to onyirok honyie daŋ, obe itai era lonyirok honye, ati era itai illo orotot. ⁹ Hidofe etihabuo iyyohoi monyie hohoi illia ta fau hullo abaha ifa iyyohoi, tonia anyar iyyohoi eniŋo Monye hohoi lia te ido harrumehini wuaran. ¹⁰ Iyyania abaha ifa monyie hohoi iyyohoi ta ŋasi kai iyya egigilo isia hijio olibo iso, ati abak inya iyyohoi haluahari iyyohoi harrumehini libe nohonyie. ¹¹ Ta saa na abahari, ewuon iyyohoi iko hijiriŋa nobe ara no mune ati ta halu eyyani hilik na tajia iko bisan te ilia illo oniŋe inyia. ¹² Tonia, itikaf has innahatai hunna elik ejio hidofe etigol huŋuta innahatai inne ekikiro. ¹³ Ihuhuma hikota inno obis to hejek innahatai hijio anyar lia loŋura hotobiaŋa ohuye ati orrumek iso golon. ¹⁴ Itisiahai manya to hilik na tajia iko hiyyo daŋ ojio hidofe itisiahai libe nyo obe lobo tuŋani oremik egonyu Habu. ¹⁵ Ihuma hiriria hijo hotobiaŋa lobo tuŋani to hiji hatai obe odiak hamehine, itirriŋa hijo hotobiaŋa liwai no oremik eyyani run to hiji hatai hetiharari hiyyo arria. ¹⁶ Ihuma hiriria hijio hotobiaŋa lobo to hiji hatai la ara osomo kuyya hidofe tuŋani le egigilo to hirro inno fau iyya Isau lafa etinyaŋak iruta honye to ŋiria. ¹⁷ Nyo eyyen itai hijio, ta halu awoŋ Isau siaha iruta nohonyie, ati ebo ifa Hollum inyia. Osiaha ida hido inyia to hidenya ati obe inyia oremik arrumek ikoi henyahuni iruta honye. ¹⁸ Nyo ibe ita efanu adoŋe no oliew, ojio hidofe owulo ahima, mai no owuanari idumele, harie ojio hai no oyyami. ¹⁹ Obe itai efanu etirari hitir ne ikakan, iko nobo hutuk ne ero hirorita na awak hetirak illohonyie hijo hotobiaŋa lobo tuŋani ero to hosie. ²⁰ Nyo obe ifa isia oremik hidi hirro inne elimahini to hosie: Otir ida hido nobo ciaŋ doŋe, isiara hiyyo hepuda inyia.'' ²¹ Ogolo ifa harriŋari to honyie, man ojio Musa to hosiere honyie hijo, "Abaŋ nayya luŋa binno man okikiro nayya wan.'' ²² Ati efanu itai to doŋe no Sion, to doŋe no Hollum lo owuar, nara fure nohonye Yerusalem ne idou, hidofe efanu itai ta anjilohien hullo ottuba to mune. ²³ Efanu hidofe itai to tubai no huwo ille egioro fureta innohosie te ido, ojio hidofe to Hollum haŋotoni lo hiyyo daŋ iko to oyirihien hullo halibok. ²⁴ Efanu hidofe itai to Yesu hetumwarani lo himwara ŋejuk ojio hidofe to ruasa no hoto neyyani tohoi hamehini agalik hoto na Abele. ²⁵ Itirriŋai nalanyar hijio hotobiaŋa itai ebo lia le ero. Nyo kuyya obe isia eris to nafa ebuarari isia lia la asara isia ta fau. Jai iso eris iyyohoi kuyya ebo hidofe iyyohoi lia lero te idou? ²⁶ Beren etir ifa hiro nohonyie fau ati iyyania, esio inyia itierit tohoi atta hijio, "To hinyiahi nobotie enyiak iso naŋ hittanniŋ fau, obe ara fau hame, ati ido daŋ." ²⁷ Lejio inyia hijio, "To hinyiahi nobotie, etuhutek nia hijio odumu iso hirro innafa oyyeuni ade inne ekikiro anyar odule hirro inno obe ekikiro man fur. ²⁸ Iyya amoju iyyohoi obe no obe ekikiro, hesiara humo to Hollum iko higemita hunno olibo ta baŋi iko to hitihabuo. ²⁹ Nyo ara Hollum lohoi iyya hima na adahari hirro bi daŋ.