¹ Owuon ifa Saulo ho hiruk to ye no honye. Ata hitigiama ne kelesia hitiara ta far nya to Yerusalem; ata heruhok daŋ esarik ta fau ho Yudea iko Samariai, ebusari efahat hamai. ² Ata heruhok ile lara monyemiji anuhak Stifen ata hihum twari no honye. ³ Ati eriafu ifa Saulo kelesia bino; owu inya a hajik ho hiyo daŋ eniefu liawa daŋ ho ŋorwo, etifitak isia ta babus. ⁴ Ati arrasa heruhok daŋ ilafa lesarai afau etiyenari hiram no Hollum. ⁵ Owu Filipo afau na Samariai ata hitiyana to hosie Kristo. ⁶ Ifa etiru iluluŋ no hiyo ojo owolo hituhutita inafa ehum Filipo, ata isia daŋ hihum hitira to hiro inafa ero inya ta mai. ⁷ Ata oyirihien ino ebwot ade tara hiyo ariaii inafa eniefita isia, oyo to hutuhien bino ata hiyo ariaii inafa eyohkie wati libe. ⁸ Obolo ifa mune to doŋe nya. ⁹ Ati owuon ifa tuŋani lobo to bore gala nya, fure no honye Simone, lafa ara hadufani; ehum ifa inya hitumuno hiyo ino Samariai, hijo ara inya lobo tuŋani la agalik bino to golon. ¹⁰ Etira ifa hiyo ilo hitaha iko ilo hitiŋi daŋ to honye, man ata isia hijo, ''Ara tuŋani ileŋ golon nya iko Hollum no ojo hijo, 'Obolo.'' ¹¹ Etira isia to honye, nyo etimuno inya isia to holoŋi ariaii to dufa. ¹² Ati ifa eruhu isia hitiyana no Filipo hiram nafa ho Hollum iko obie no Hollum ojo fure no Yesu Kristo, omoju isia batisimo, liawa daŋ ho ŋorwo. ¹³ Ata Simone daŋ eruhu ta wan nohonye: ta halu no hibatiso, nohonye odule inya hitole ho Filipo. Ifa ewolo inya iduariti iko hihumita ariaii, ata inya hililiha bino. ¹⁴ Ifa etiru efahat ilafa lowuon to Yerusalem hijoomoju hiyo ilo Samariai hiram no Hollum, ata isi efahak isia to hosie Peturu ho Yoani. ¹⁵ Ifa afanu isia afau, omojo isia to hosie, hijo anyar omoju isia Oyiri lo Olibo. ¹⁶ Man to holoŋitek niya holobe ifa oyiri lo Olibo eba to lobo lo hosie; Holobe ifa isia omoju isia batisimo to fure na Habu Yesu. ¹⁷ Ata Peturu ho Yoani atanyak has ino hosie te isia, ata isia omoju Oyiri lo Olibo. ¹⁸ Ifa ewolo Simone oremik hada Oyiri lo Olibo hiba to tuŋani ta hatanyak no has ino efahat, ata inya hisio isia arobiyaha. ¹⁹ Ata inya hijo, "Isiara naya golon ina, anyar atanyak naya has inanaŋ ojo isia ata omoju Oyiri lo Olibo." ²⁰ Atati Peturu hijo to honye, "Isiara yel nohoi daŋ hoto lite iko hoi, nyo egigilo iye hijo eruma iso hisiori no Hollum ta arobiya. ²¹ Obeiye mai to hiram inna, nyo obe taji nohoi obis to Hollum. ²² Ati ibusak iruti inia hoi, tomoje to Hollum, hijo hebusak inya daŋ iye ho inia ewak iye. ²³ Awolo naya hijo ewuon iye iko taji no odua tiek iko jore ne enoso iko hiyata." ²⁴ Etiraŋ Simone hijo, "Tomoje ta Habu, ta naya, hijo hotobiaŋa hiro inafa ero iye edoŋ." ²⁵ Ta nafa owuanari Peturu ho Yoani ojo isia ero hiram na Habu, aciahari isia a Yerusalem; te ikoi etiyena isia hiram no Hollum to hiyo ariaii ino Samariai. ²⁶ iyanIa ero anjilo la Habu to Filipo hijo, "Todiote ino aŋolon a tuluba no lowu a Yerusalem a Gaza."(Owuon Hikoi ina owu awaha). ²⁷ Odioto inya ata eno. Iyania owuon ifa lobo tuŋani le Ethiopia, hegiamani lo Kandase, Habu ne Ethiopia. Owuon ifa inya he ibariti daŋ inohonye. Otu inya a Yerusalem omojori. ²⁸ ociohini ifa inya le ettole to hide ho sigira nohonye, ojo inya ehiana hiro ino hekilani Isaya. ²⁹ Ata Oyiri hijo to Filipo, "Ino towunyaa aŋati ho sigira nia." ³⁰ Ata Filipo hinyior to honye, ata etiru inya ehiana Isaya hekilani, hijo, "Heyen iye hiro ino ehiana iye?" ³¹ Ojo tuŋani le Ethiopia ata hijo, "Jai ayen naya, hara ida lobo tuŋani elimak ta nanaŋ?" Ata inya tana Filipo hawoŋ a hide ho sigira hetolojo he inya. ³² Ara ifa ŋati nafa ehiana Filipo to Baibol nafa ehiana tuŋani le Ethiopia tiji, ''Edihori ifa hiyo inya amai oŋotori iya ker iko hulo ojo henyamani lohonye oduehini, obe ifa inya aŋa hutuk nohonye. ³³ To hitihara nohonye odumuni bisan nohonye ade tara honye: ŋai iso oremik etuhutek to dure ilo honye? Nyo eyari ifa wuaran no honye teni ta fau." ³⁴ Ati efia etok Filipo, ata hijo, "Atana naya iye, taŋai ero hekilani? To wan nohonye kuya te ilak hiyo?" ³⁵ Ata Filipo hiro; ata hitiyana hiram ina ne Isaya etiyena sayye ino olibo ino Yesu to honye. ³⁶ To loton nohosie to hikoi, afanu ifa isia te inak hifioŋ, ata etok lia hifia hijo, "Towolo owuon hifioŋ ini, nyo mahu etik naya hefotini batisimo?" ³⁷ Ata Filipo hijo, "Le eruk iye ta taji to nohoi daŋ, omoju iso iye batisimo.'' Ata tuŋani le Ethiopia lia hitiraŋ, ''Eruk naya hijo ara Yesu Kristo Oonyi Hollum.'''' ³⁸ Ata tuŋani le Ethiopia hitiwet sigira ata isia efie a fau a hifioŋ, ata Filipo iko etok le Ethiopia hibatis inya. ³⁹ Ifa afanu isia ade to hifioŋ, eyari oyiri na Habu Filipo ade; man obe etok le Ethiopia hinyak egonyu inya, ata inya eno hikoi no honye ho mune. ⁴⁰ Ati olieu Filipo to Asotu. Owu ifa inya te hikoi na mai nyie ata hitiyana sayye ino olibo ta masik daŋ, man eba to Kesariai.