¹ Ata efahat iko halasirak ilafa owuon to Yudea etiru hijo omoju halufak hiram no Hollum. ² Nafa awoŋ Peturu a Yerusalem, ata ilafa liya owuon te iluluŋ no hagotok hitiara mwaŋa inya. ³ Ejo isia, "Eriaha iye iko hiyo ilo obe ogoto ejo iye edaha he isia!" ⁴ Ata Peturu hitiara hilima to hosie hiram nia nalanyar; hijo, ⁵ Amojo naya ifa to bore gala netok no Joppa, ata naya egonyu nobo sehin torigai iya ihulo otu afau, iya milaya netok te ido to kalii aŋwan; ino orubuni ta nanaŋ ⁶ Ata naya riŋa toktok. Ata naya egonyu hejek aŋwan ino ciaŋi ino fau, ciaŋi hahonyak, ciaŋi ino oreta, iko cieŋ ino hide. ⁷ Ata naya etiru nobo hutuk ojo ta nanaŋ, "Tete ahide, Peturu; totohoi ata iye hinya!" ⁸ Ajo naya, "Obe ara ania, Habu: Abe naya anya inak hiro to hutuk nanaŋ ino obe olibo iya ino oru." ⁹ Ati etiraŋ hirori hinya te ido, "Ino ehumak Hollum hotolibe, hotobiaŋai inyak heliloŋo hijo ebwot." ¹⁰ Eba na hinyahita hunik, ata hiro hinyak aciahari bi daŋ a hide ido. ¹¹ Teya, oweta ifa ilak hiyo lowunik to hosiere ho haji nafa ewuanari iyohoi; efahini ifa isia tara ho Kisariai ta nanaŋ. ¹² Elimak oyiri naya heno he isia, ojo hotobiaŋa naya awuon ho nobo higigia tara hosie. Halasirak ile ofu kanaŋ, ata iyohoi efi ahaji ho tuŋani lia. ¹³ Elimak inya iyohoi jai egonyu inya anjilo oweta te ikat ha haji ata hijo, "Ifahak hiyo a Joppa hefi henyahini Simone, ile ara fure Peturu. ¹⁴ Owu iso inya elimak itai nobo sayye no oremik etilahu itai iye ho hegiamak ila haŋ hoi." ¹⁵ Iya hetiara na naya hiro to hosie, awoŋ oyiri lo olibo to hosie, iya nafa tara hohoi to hitieri. ¹⁶ Egigilu naya hiram no Hollum, jai ojo inya, "Dede ebatiso Yoani to hifioŋ; ati ebatiso iso itai to oyiri lo Olibo." ¹⁷ Ati le esio Hollum te isia hisiorita no ara iya esiarari inya to hoi iya nafa eruhori iyohoi to Habu Yesu, hara ifa naya ŋai, hijo anyar etirija naya Hollum?" ¹⁸ Ifa etiru isia hiro inia, ata isia enyai holo ojo inak hiro to hitiraŋi, ati etihabwo isia Hollum ata hijo, "Ata Hollum hisio hebusak no hiyata ino manya na halufak.'' ¹⁹ Ata heruhok ilafa etisarrai hiyo ade to ye ne Stifen efie alamarai, a Fonisia, Sipro, iko Antioka, ati elimak isia hiram no Yesu hamai to hiyo iloYudei. ²⁰ Ata ilak ilafa afanu to Sipro iko Sirene man Antioka hiro to hiyo ilo Grik, elima ifa isia to hosie sayye ino olibo ino Habu Yesu. ²¹ Owuon ifa hani na Habu he isia; ata iluluŋ no obolo huruk ta Habu. ²² Afanu sayye ino hosie a kelesia no Yerusalem: ojo isia ata efahak Barnaba man ta Antioka. ²³ Ifa awoŋ inya egonyu hisiorita ino Hollum, omune ifa inya; ojo hido inya ata hitigol isia anyar odule iko Habu ta tajia ino hosie daŋ. ²⁴ Ara ifa inya tuŋani lo olibo ojo efut iko Oyiri lo Olibo iko huruk, ata hiyo ariaii afonihini ta Habu. ²⁵ Ata Barnaba eno a Tarsus anyar owu hiwolo Saulo. ²⁶ Ifa arumek inya dia ata eyani inya a Antioka. Atati awoŋ, to hiŋa nobotie otubahini isia ta mai nobotie he kelesia ata hitiyen hiyo ariaii. Eliloŋo ifa hiyo hejufutak hijo ara Kristiani hitierita ta Antioka. ²⁷ Iya to holoŋitek hunna afanu hekilak to Yerusalem antioka. ²⁸ Lobo tara hosie, lara fure Agabu, odioto a hide etihutek oyiri hijo owuon iso hiŋa nettok ta fau daŋ. Owu iso hitiara to holoŋitek ino Klaudio. ²⁹ Ata hejufutak, iya oremik ifa isia, awahan efahak luaha to halasira a Yudea. ³⁰ Egiem isia nia ata efahak arobiyaha to hiyo ilohittaha ta has ino Barnaba ho Saulo.