¹ Ati eŋot naŋ ta taji nanaŋ hijo abe iso naŋ enyiak awoŋ hiwolo hirro inno odiaha ta hatai. ² Nyo kuyya esio naŋ ta hatai hijiriŋa, ŋai iso esio ta hatai mune? obe ara ita ille ejiriŋa, to hira ta nahatai illalaŋ. ³ Iyya egiorok naŋ hijo lattu nayya ta hatai, hotobiaŋa naŋ enyiak hitijiriŋ ilia illa awak mune. Nyo eyyik naŋ te'tai daŋ hijo ara iso mune nanaŋ iyya nahatai nobotie. ⁴ Nyo egiorok ifa naŋ ta hatai to hijiriŋa no obolo iko diaha na taji hidofe to hidenya. Abe naŋ awak hisio diahai na tajia, ati anyar itai eyyen hisagaji no mune no obolo na amunori naŋ itai ⁵ Ati kuyya eyyani lobo tuŋani hijiriŋa, obe ara ta hanaŋ hamai, abe awak hisio no ogol binno ta hatai. ⁶ To tuŋani lia, oremik baha na abahari iluluŋ no hiyyo inyia. ⁷ Tonia anyar itai eloit to honyie hebusak inyia hidofe itiliha taji nohonyie ŋasso inyia ohu hihuma nobo sihin norru to hijiriŋa nohonyie no obolo. ⁸ Iyyania, alia naŋ ta hatai hijo anyar etuhutek itai mune nahatai to honyie. ⁹ Inyia ne egiorohini naŋ hijo anyar aciem naŋ itai atta naŋ hiyyen kuyya eruk mahu itai hirro daŋ. ¹⁰ Lebusak itai lobo tuŋani tara hiyyata te innohonyie, ebusak hidofe naŋ tuŋani le iyya itai. ŋari nyo nia ebusak naŋ-- lebusak naŋ nobo sihin-- ebusak naŋ te'tai to hosiere no Kristo. ¹¹ Ebusak naŋ hijo hotobiaŋa Sitan enyiob iyyohoi. Nyo ebe iyyohoi etumo higigilita innohonyie. ¹² Tanafa attuni naŋ a Trosa etiyenari hiram no Kristo aŋa Habu ikat to hosiere nanaŋ. ¹³ Ati abe ifa naŋ ayiri dia nyo abe ifa naŋ arrumu ilasi hanaŋ Tito, tonia abusak naŋ isia atta naŋ aciahari a Masedonia. ¹⁴ Ati humo to Hollum, lia lolwuak iyyohoi hagalihini rori daŋ to Kristo, hidofe etisarrik inyia iŋwojit no libo ta massik daŋ. ¹⁵ Nyo era iyyohoi ria no oŋwo girgir to Kristo to hiji he ilia ille etilohini iko te illia illo oye obe eruk. ¹⁶ Te illia illo oye, ara iŋwojit tara ye man to ye. Ojo te illia ille etilohini, ara ŋwajan tara wuaran man to wuaran. ŋai lia osiru to hirro inia? ¹⁷ Obe iyyohoi era iyya hiyyo arria ille etinyiaŋa hiram no Hollum te idumuti. Ati to libe no higigilita, ero iyyohoi to Kristo iyya efanu iyyohoi tara Hollum to hosiere ho Hollum.