¹ Nayya Paulo efahata lo Yesu Kristo to wahan no Hollum, ojo hidofe Timoteo ilasi hohoi. Egiorok iyyohoi te ikelesia no Hollum nolo'wuon to doŋe no Korinto, iko to hiyyo daŋ ta fau ha Acaya. ² Isiara hamehini hotowuana ta hatai ojo hilik na tajia no ottu tara Hollum Monye hohoi ojo tara Habu Yesu Kristo. ³ Isiara hitihabwo hotowuana to Hollum inyia Monye Habu lohoi Yesu Kristo, nyo ara inyia a Monye la hamehini ojo Hollum hetilahani daŋ. ⁴ Nyo etiliha Hollum iyyohoi to hitigemita te innohooi daŋ, hijo anyar eremik iyyohoi etilihu ilia illo owuon iko hitigemita to hitiliha nafa etilihari Hollum iyyohoi. ⁵ Iyya efut hitigemita inno Kristo tohoi, emiatahini iso hidofe hitiliha no Kristo tohoi. ⁶ Kuyya lawuon naŋ ho hitigemita ara isia to hitiliha nahatai iko etilohini nahatai. Kuyya awuon naŋ iko hitiliha ara inyia hitiliha nahatai, nyo edihu itai hitigemita iyya adihu naŋ. ⁷ Hidofe eyyik naŋ dede te'tai nyo ayyen naŋ hijo le'rrumu itai hitigiama ho naŋ, errumu iso hidofe itai hitiliha ho naŋ. ⁸ Halasira hanaŋ, awak naŋ hijo anyar leyyen itai hijo arrumu naŋ hitigiama binno ta fau he Asia, nyo ejiriŋa ifa naŋ binno agalik, egigilo naŋ hijo aye iso naŋ inni. ⁹ Dede aŋotohini ifa ye tohoi, ati to Hollum lo'remik etubuhu hayok. ¹⁰ Etilohu ifa inyia naŋ to ye no orru, hidofe etilohu iso inyia naŋ. Eyyik naŋ to honyie hijo odule iso inyia hitilaha naŋ gagaga. ¹¹ Egiem iso inyia inna iyya eluaha itai iyyohoi to mojo ta nahatai. Hidofe esio iso hiyyo arria humo to Hollum to libe to no hiyyo illo omojo te iyyohoi. ¹² Ara inna hitidara nanaŋ, hijo ayyen naŋ ta taji nanaŋ hijo alot ifa naŋ to libe iko to biaŋan no hinyiaba to hosiere ho hiyyo illa fau ojo hidofe to hosiere hatai agalik. Obe ara to ofioro inno fau ati ta hamehini no Hollum. ¹³ Ebe iyyohoi egiorok ta hatai nobo sihin inna obe itai eremik ehienu ojo hidofe nobe itai eremik hiyyen. ¹⁴ Iyya eyyen itai hirro hunna kai, eyyik naŋ hijo eyyen iso itai daŋ ta halu. Niyya iremik ta nayya ajo hidofe nayya te'tai to holoŋ na Habu lohoi Yesu. ¹⁵ Nyo eyyik ifa naŋ to hiram nia, awak ifa naŋ ŋawoŋ ta hatai to hosiere, hijo anyar enyiak itai mune. ¹⁶ Lagalari naŋ itai, ŋeno naŋ a Masedonia, ojo lacohini naŋ tara, attu iso naŋ hiwolo itai, ati enyiamak iso itai nayya le'no nayya a Yudea. ¹⁷ Nafa egigilori naŋ ania, ebo ifa naŋ bi? Hegigilo ifa naŋ hirro inne iyya tuŋani la fau, hijo hajo naŋ "E e" ojo "'Obe obe'' ta far nobotie? ¹⁸ Ati iyya obe Hollum eloit hirro innohonyie, obe hidofe rori innanaŋ eloito ta hatai hijo, ta halu, obe. ¹⁹ Etiyena iyyohoi ta hatai Lonyi Hollum Yesu Kristo, Nayya iko Silvano ojo Timoteo. Obe Yesu eloit hiro nohonyie atta hijo 'dede hidofe ta halu, obe iso ati ehuma inyia iyya ero inyia. ²⁰ To Kristo etisiru itieriti inno Hollum atta iyyohoi hitihabwo Hollum. ²¹ Ati etigol Hollum iyyohoi he itai hattubari iko Kristo, nyo onyimu inyia iyyohoi. ²² Esihok inyia iyyohoi atta hidofe hisio iyyohoi Oyiri ta tajia innohoi hatara a hitimijani hijo era iyyohoi a hiyyo illohonyie. ²³ Ati ellilloŋu naŋ Hollum hatara asut na taji nanaŋ hijo ara ta hamehini nanaŋ da hatai inyeja ne abiaŋari hawuyere da hatai a Korinto. ²⁴ Obe ara hijo awak naŋ hira eittok to huruk nahatai nyo ogol huruk iyyania, ati egiama naŋ he itai hijo anyar a luak naŋ huruk nahatai.