¹ Motiarak, ebe iyyohoi egiorok ta hatai ta far ojo holoŋitek inno lofuye hirro hunna hebarari. ² Eyyen itai binno ŋacohini na Habu. Etubur iso far nyia hiyyo binno iyya awoŋ no lohoho ahahalari hiyyo ta tari. ³ Ta far nyia, ero iso hiyyo hijo, 'ewuon iyyohoi ta mai nalanyar, ojo hidofe nobo run obe.' Ati obe isia odiarak watu innohose, ojo diahai iko irruti atta hidoŋ to hosie. Edoŋ iso hitihara nyia iyya diahai no hiito noŋoruo tetadori. Ogolo iso to lobo hebusari tara run nyia. ⁴ Ojo ta hatai hiyyo ille ira to hoi halasira, ojo hanasira, eyyen itai hirro inia. Ebe itai era iyya hiyyo illa amanya te idumele. Hotobiaŋa aciohini na Habu etubur itai. Hotobiaŋa far nyia etubur itai iyya hawoŋ no lohoho ahahalari hiyyo. ⁵ Era itai daŋ a durre illo cialai ojo durre illo far Ibe itai era lonyirok illo harie kuyya illo iriohi. ⁶ Hotobiaŋa iyyohoi ejoto iyya illamuk. ⁷ Ati hetudule hiriria ojo hosi odule ŋa. Liyya illo lojioto, oijoto isia ta tari, ojo ilia ebwoto, eboto daŋ ta tari. ⁸ Ati iyya era iyyohoi lonyirok illo far, anyar ehum iyyohoi riŋa eijo hidofe egigilo na anyar. Anyar eciofok iyyohoi buhu no suhe no huruk ojo no mune, ojo tamu no etilohini no moi. ⁹ Obe ifa Hollum iyyohoi hijo hetera iyyohoi illo jore, ati hijo anyar errumu iyyohoi etilohini ta Habu lohoi Yesu Kristo. ¹⁰ Inyia ifa oye te iyyohoi hijo kuyya eriŋa iyyohoi kuya hidofe efer iyyohoi, anyar emanya iyyohoi daŋ he inyia. ¹¹ Ilimak hirro innia te illamuk anyar obe wati innahatai elik. Itulwak wati iyya ne egiamari itai iyyania. ¹² Iyyania, efia iyyohoi itai halasira, iruho ilia ille egiama to hiji hatai ojo hidofe ara ettaha ta hatai ta Habu ojo hidofe etiyana itai. ¹³ Ewak hidofe iyyohoi anyar emuno itai isia binno te igem nohosie. Ituwuanai to himwara to hiji hatai. ¹⁴ Ettitto iyyohoi itai, halasira: Itisor heturwok, itulwak ille etaban to hiji hatai, itulwak ille elik, isiara hidi nahatai to hiyyo. ¹⁵ Hotobiaŋa lobo odumak run ho run to lobo, ati itudule siaha hirro inno olibo te illak ojo hiyyo daŋ. ¹⁶ Tomune holoŋitek daŋ. ¹⁷ Itudule mojo. ¹⁸ Isiara humo to Hollum to hirro daŋ. Nyo ara nia wahan no Hollum te itai to Kristo Yesu. ¹⁹ Baŋa etuduny Loyiri. ²⁰ Baŋa olisa hikilita. Iticem hirro bi daŋ. ²¹ Iniefa hirro inno olibo. ²² Ibusak igemita inno orru. ²³ Isiara Hollum lo himora hototubak itai halibok. Isiara oyiri nahatai daŋ tamai, oholio, ojo wati innahatai hototubahini obe hipali da ŋawoŋ na Habu lohoi Yesu Kristo. ²⁴ Agalik libe no lie lafa ellilloŋu itai, ojo lie lohu hidofe higem. ²⁵ Halasira, itimoje daŋ hidofe te iyyohoi. ²⁶ Itifonyak halasira daŋ to hijujura no hutuk. ²⁷ Efia naŋ itai to fure na Habu hijo anyar ehianak itai waraga inna ta halasira daŋ. ²⁸ Isiara hamehini na Habu lohoi Yesu Kristo hotowuana he daŋ he itai.