¹ Hucuŋi nohonyie, halasira, etigolo iyyohoi eijo hidofe ettitto itai ta Habu lohoi Yesu. Iyya emoju itai hituhututa tara hohoi inno loton eijo itai etumuno Hollum, hidofe to loton nia, itudule higiama ahosiere. ² Nyo eyyen itai hijo esio iyyohoi hituhututa inne tara Habu Yesu. ³ Ara inna wahan no Hollum: lewak itai libe ibwara hirro inno somon, ⁴ hijo anyar otoŋ lobo oŋoruo honyie nalanyar to libe ojo to baŋi. ⁵ Ibaŋa ladaya ŋoruo inno illak hiyyo iyya hiyyo illo lobe loyyen Hollum. ⁶ To hiram nia, hotobiaŋa lobo eturwo kuyya etipala ilasi honyie. Abak iso Habu hiyyo ille ehuma hirro inne. Elimak ifa iyyohoi hiram nia ta hatai beren. ⁷ Obe ifa Hollum ellilloŋu iyyohoi hijo hotoduloi hihuma hirro inne ebwot. Onyimu ifa inyia iyyohoi hijo hotobwanyari iyyohoi tara hirro inno lorru. ⁸ Iyyania, lebo lobo abaŋ hiram inna, obe inyia ebo huwo, ati Hollum lesio Loyiri lolibo nohonyie ta hatai. ⁹ Ati abe naŋ awak egiorok ta hatai hemuno itai heruhok jai. Etiyenak Hollum to wan nohonye hijo itumune wati innahatai. ¹⁰ Dede, emuno itai heruhok daŋ ta Masedonia. Ati efia iyyohoi itai motiarak hijo, itumune wati innahatai binno. Hotobiaŋa itai etidiotok nobo hiram to lobo. Igemai hirro innahatai to wati innahatai, obe ara ho hirro inno hiyyo. Igemai ta has te innahatai. ¹¹ Elimak ifa iyyohoi itai hijo igemai hirro inne. Legem itai hirro inne, egigilo so illamuk hiyyo nalanyar te itai, egigilo iso hiyyo illo lobe eruk Kristo nalanyar ta hatai. Oyyen iso isia hijo eruk itai binno atta hijo elibo itai. ¹² Hidofe legem itai hirro inne, ebe iso itai eak lobo hotoluak itai innak hirro. ¹³ Halasira, awak naŋ anyar eyyen itai hiram na hayok illafa oye. Hijo hotobiaŋa itai emumuha isia iyya inna omumuhari illak hayok illohosie. Omumuha hiyyo liyya nyo obe isia owuon ho nobo heyik ta halu ho ye no tuŋani. ¹⁴ Leruk iyyohoi hijo oye ifa Yesu atta ŋebuhu to ye, Eruk iyyohoi daŋ hijo ottuba hiyyo illo oye iko Kristo. ¹⁵ Eruk iyyohoi hijo eyyani iso Hollum hiyyo liyya lawoŋ Habu, ebe iso iyyohoi eremik efie ahosiere tara liyya illafa ojiotori. ¹⁶ Ta far nyia, eyyorro iso Hollum to hilohitok, ojo hiyyo atta etiru hutuk no Anjilo la agalik. Etiru iso isia kwatan ne ikakan. Atta Habu to wan nohonyie awoŋ te ido afau. ¹⁷ Atta liyya illafa ottuba ho Kristo ebuhu, atta isia diote to hosiere. Ta halu, atta iyyohoi hawuarak illafa daŋ diote ahide atta efie ahide. Atta Hollum eyari iyyohoi ahide ottubari he isia te itiran. Eyari iso inyia iyyohoi heboŋohini ha Habu to oyyami. Ewuon iso iyyohoi iko Habu holoŋitek daŋ. ¹⁸ Iyyania, ittittok hirro inia te illak.