¹ Ibusak liwa, hinyiaba, telleri, hayini, iko mwaŋa daŋ. ² Iyya idoliaha hullo hesini bi aŋejuk, itudule siaha lee inno oyiri, hijo anyar ida ebolo itai to hetilahini, ³ le eciem itai hijo olibo hada Habu. ⁴ Ifanu to honyie ille amanya iyya moruo lafa ebo hiyyo haduhok, ati anyimu Hollum inyia, ati owuon anohonyie. ⁵ Ara iso itai iyya moru hunna amanya anyar eduhori haji to oyiri, anyar ida ewuon iyya olibo lo hetimojok hullo esiara hisiorita to oyiri hunna eruk Hollum to wuana no Yesu Kristo. ⁶ Egioro hijo, "Ihuma riŋa, etiara naŋ duho gul no Zion to moruo, anyimuni ojio hidofe olibo. To tuŋani leleruk to honyie obe iso owuon iko irri. ⁷ Itai hullo eruk itibanŋa. Ati, "to moruo iko ibak inna ebo haduhok, ara hiduhit no gul" ⁸ ojo moruo inna etigiama to haduhok. "Etigiama, ojio hidofe omiasa to hirro inno Hollum, te innafa eruk isia. ⁹ Ati era tai hiyyo onyimot, ahegiamak illo Habu. Hotobiaŋa itai era iluluŋ no hiyyo illo obe olibo, ati hetira ahiyyo illo Hollum luŋa, ojo anyar ida etileu itai higiemita hunna olibo iyya inno hellilloŋoni hatai ade to idumele man to cialai no honyie inna olibo binno. ¹⁰ Holobeŋ ifa itai era ahiyyo, ati era itai ahiyyo illo Hollum. Holobeŋ ifa itai efotu hamehini, ati iyyania efwotu itai hamehini no Hollum. ¹¹ Itai illo amuno nayya ayo nayya ta hatai ilia hewuotok iko hatamonok hijo anyar itai ebusak iwahiti inno watik, inna hatai nyo orrem hirro innia iko loyirihen innahatai. ¹² Itimune no osiru to hiji ho paganohien nero ida hido isia hiro inno orru ta hatai, egonyu iso isia higiemita inno olibo, iko hitihabwo Hollum to holoŋ nya ottuni inyia. ¹³ To fure na Habu, Hotoniŋe hekumok daŋ inno hiyyo ara to hido ta habu lia ara etok. ¹⁴ Kuyya ara ettok le efahu hijo anyar abahari hepalak iko haliwari hijo anyar etihabwori hegiamak ho hirro inno olibo. ¹⁵ Nyo ara hirro inno Hollum, hijo anyar etiduwek hiyyo hatumok to higima no hirro inno olibo. ¹⁶ Hetimanye iyya hiyyo hullo ahoni iko hetihok ho hipalita, ati anyar ida era apiti illo Hollum. ¹⁷ Hetibaŋa Hollum, Habu iko hiyyo daŋ. Hetimune hilasirak hohoi. ¹⁸ Hegiamak, hetibaŋa to hiyyo illohoi hullo hittaha iko to hulo oru daŋ do higema, do hifaha, iko ta nyalami. ¹⁹ Nyo, olibo hadihu tohoni hitigemita huna obe esuru to hiram no Hollum to honyie? ²⁰ Tahu ati libe nya hahadihu no hitigema iko baha to hiyyata inna hatai? Ati kuyya errumek itai baha to hitigemita inna hatai hunna olibo, ojo ta hadihu no hitigema innahatai, olibo to hosiere ho Hollum. ²¹ Iyya nafa ellilloŋori inyia itai, hijo odihu ifa Kristo hitigema te' tai hesiarari iyyeniti ta hatai no hujufuta. ²² Inyia lia ille obe eyyau, ojo hidofe obe enyiaba to hutuk nohonyie. ²³ Omoro hiyyo inyia, ati obe inyia omoru nohonyie. Etigema hiyyo inyia ati obe inyia ero, ati egigilo ifa inyia ta haŋotoni lolo'bis. ²⁴ Inyia to wan lohonyie lafa odihu hiyyata innohoi to yani, hijo anyar oye hiyyata innohoi ojo hehumari hirro ino olibo. ²⁵ To horroŋoni nohonyie, arumek itai libe. Esiabai ifa itai ade iyya kioro, ati iyya aciohini itai te Heyyohoni iko Heririani lo oyirihien hatai.