¹ Halasira hanaŋ, awak naŋ hijo hotobiaŋa itai ettumo hiram no hisiorita inno Oyiri. ² Eyyen ifa itai hijo, ta nafa hera itai paganohien, ejufuta ifa itai rijorihien inno obe ero iyya orihita ifa isia itai. ³ Ajo naŋ ta hatai hijo obe lobo tuŋani le'ero to Oyiri no Hollum oremik hijo,'' orose ifa isia Yesu.'' Obe lobo ojo, ''Yesu Habu'' aracee to duaran no Oyiri lo' Olibo. ⁴ Iyyania owuon hisiorita inno olufa ati ara tara Oyiri lobotie. ⁵ Owuon hidofe higiemita inno olufa ati ara Habu lobotie. ⁶ Owuon hidofe koi ino egiam ino olufa, ati ara Hollum lobotie le'egiama hiro to hiyo daŋ. ⁷ Ati esiarahini to hiyyo daŋ hamai hamai Oyiri hijo hotoluak iluluŋ. ⁸ Esio Oyiri to lobo helefere, ojo hidofe to lobo ofioroho no hiro to Oyiri nobotie. ⁹ Esio inyia to lobo huruk, ojo to lobo esiorio no hitilibo no haŋwak to Oyiri nobotie. ¹⁰ Ojo to lobo esio esiorio no idwariti, ojo to lobo esorio no hikila. Ojo to lobo esio hiyen no Oyirihien ino olibo iko ino oru. Esio inyia to lobo hirori no olufa ojo to lobo hiloito to ŋadiafa. ¹¹ Ati egiama Oyiri lobotie hirro hunna daŋ, hidofe atta aharak to hiyo gele gele iya awak inya. ¹² Iyya ara wan nobotie, ati owuon ŋacio arria, ojo ŋacio inia arria ottuba to wan nobotie. Ara isia daŋ iyyania inno Kristo. ¹³ Nyo to Oyiri lobotie efotu iyohoi batisimo to wan nobotie, kuyya Yudea ojo Grik, kuya piti, kuya obe era piti, ewuon iyohoi daŋ iko Loyiri lobotie. ¹⁴ Nyo obe wan ara ŋati nobotie, ati ara inyia ŋacio arria. ¹⁵ Kuyya ojo heju hijo, obe naŋ ara ŋati no wan inna nyo abe naŋ ara hani. Obe ati inyia ara ŋati no wan dede? ¹⁶ Kuyya ojo hiyyok hijo, abe naŋ ara ŋati no wan nyo abe naŋ ara honyek. Obe ati inyia ara wan no ofiak? ¹⁷ Kuya lara ida wan daŋ tamai honyek, etira iso inya jai? Kuya lara ida wan daŋ hiyok, heŋuada iso inya jai? ¹⁸ Ati iyyania, ehumak Hollum ŋacio daŋ inno wan iyya awak inyia. ¹⁹ Lara isia daŋ ŋati nobotie, howuon iso wan aji? ²⁰ Iyyania, owuon ŋacio arria ati ara wan nobotie. ²¹ Obe honyek oremik hijo ta hani hijo, "Obe nobo igem nanaŋ iko hoi." Obe hidofe hoo oremik hijo to heju hijo "Obe naŋ awoun he igem iko hoi." ²² Ati ewak iyyohoi ŋacio inno wan inne elik. ²³ Ojo hidofe, iyohoi ewak ŋacio ino wan ino oliew agalik, ojo iso iyohoi esio baŋi netok to hosie. ²⁴ Obe ŋacio inne oliew ino wan awak hiriria neto, ati attubak Hollum wan nobotie hijo anyar efwotu ŋacio ino obe oliew hitahabuta agalik. ²⁵ Egiam inya ina hotobiaŋa bwanya owuon ta wan, ati anyar olwuak ŋati nobo to igiemi no tubai. ²⁶ lodiaha ŋati nobotie, odiaha ŋacio inno wan daŋ tamai, lo omune nobo ŋati, ojo ŋacio daŋ atta hitihabwo arabotie. ²⁷ Iyyania, era itai wan no Kristo, hidofe era itai daŋ ŋacio ino wan no honyie. ²⁸ Onyimu ifa Hollum hiyyo ilo egiama te ikelesia; lefahat to hosiere, hitarihi hekilak, ojo hetahunihi hetiyanak, ojo ojo hulo owan amanya nologol, ojo esorio no hetilibo, haluahak, haŋotok ho hiro, ojo ilo ero daŋ ta ŋadiefa ino olufa. ²⁹ Hara isia daŋ lefahat? Hera iso iyohoi daŋ a hetiyenak? Hera iyohoi daŋ hekilak? Hera iyohoi daŋ a hegiamak iko iduariti? ³⁰ Howon iso hiyo daŋ hitilib haŋuak? Heremik iso mahu iyyohoi hiro daŋ ta ŋadiefa? Heremik iso mahu iyyohoi daŋ tamai hiloit ŋadiefa? ³¹ Dee itisiahai hisiorita ino golon anyar agalik. Ati itituhutek iso naŋ itai hikoi no'olibo agalik.