¹ Itagilu isi iruhori bwo iniŋyere eleittaha hulo okuma iko hobwok. Oŋida isi bwo fe ihanie egyamita daŋ hun oyiji. ² Oŋida isi obeŋi omorye obo atulo bwo obeŋi aŋalafai, ati oŋida arai awati hul anyalami iko atajya hun obiji jyo aati daŋ. ³ Nyo nya beryen era nya hohoi asitajak, ahamyosok, bwo esyaba hohoi addi. Era hohoi bwo fe apiti hulo ewahiti hwattek hohoi iko hulo ebaliti hun orrohoji’to huno afau. Emanya nya hohoi ta ahaini iko aliwa, bwo oliwarik aati hohoi. ⁴ 4Buo ninyia italeyehini ayiji iko abuaran taji ono Hollum etalahani hohoi, ⁵ Ati oleyo nya amehino ono Hollum Etalahani hohoi iko amuno honyi italahuniere hohoi. Nyo obyaŋara te ehanita hohoi hun oyiji hun ehanio hohoi, ati ta amehino honyi italahu inyi hohoi te ellillayo an itaŋejuhyere ataji ta adwaran ono Oloyiri ol Olibo, ⁶ al itufutak hohoi belete to Yesu Kristo Etalahani hohoi. ⁷ Tania ihenio inyi hohoi ahabisak ta amehino honyi, bwo fe ihuhumak inyi hohoi aharutak te eyihina ono nesu on osyo fur. ⁸ Arai ekyanita huna ahode. Awak ni iye idulo ittiyenio erre hunia oŋitek daŋ, tania oŋida laati hul iruhi jyo Hollum ihumi ihanio egyamita hun oyiji. Oyiji erre huna bwo olwahye isi aati daŋ. ⁹ Ati oŋida iye iha efita asai asai bwo erre huno hohonyok, ejorya, bwo aŋalafa te eram ono efahita huno Hollum, nyo erre ihwa hunia arai isi asai bwo obeŋi olwahye aati. ¹⁰ Al obusak atulo adaha iko eluluŋ heruhok bwo itipalyo inyi laati, isiŋye inyi, kuyya iha inyi esiŋyo etarrihi, obusak inyi. ¹¹ Nyo imijak iye ahode atulo ihwa alya iloit inyi ataji honyi addi jyo Hollum bwo odulo inyi iyyauta, tania oŋotoro inyi ahwan honyi hama. ¹² Al efak ni Aretema jihoi kuyya Tikiko, waŋ kokwak irwaŋaniere ikoŋ imiji Nikopoli nyo awak ni rasa dia ta ayafajin huno acoro. ¹³ Oŋida iye iniamaro Seno aŋotoni iko Apolo ta adaha hosi, jo oŋida isi owoni iko erre daŋ hun awahi isi. ¹⁴ Ijara aati hohoi ittiyenuni ihaniere egyamita hun oyiji ilwahyere laati jo oŋida isi obeŋi opwahi iŋijuniere aŋer hun oyiji. ¹⁵ Laati daŋ hul ewon ikoŋ ifonyai iye bebe. itifonyak laati hul omunoi hohoi ta neruk. Ijara amehino hatawana jihatai daŋ.