¹ Ati oŋida iye ittiyenio eram ono Hollum on obis. ² Iramak lamarwak hotobyaŋahi orumai, hetelahahi osuhotye asai, heterrirryahi ewahiti hutto hwattek hosi, hatamanyahi ta neruk on ogol, ta amuno, bwo adihan tajya. ³ Iramak namarwak ŋorwo jo oŋida isi adahai ihwa aati hul olibori’to, oŋida isi obeŋi itisyahai laati bwo obeŋi amatai abalu. Oŋida isi ittiyenie erre hun oyiji’to. ⁴ Ijara isi ittiyenie aŋorwo hun hetehi yemuna imunori habiak hosi iko aduri hosi, ⁵ hotobyaŋahi osuhotye erre asai, hotobyaŋahi orotoi, hotobyaŋahi icaforoi te egyamita hosi, hotonyalamahi, bwo fe hotoniŋyehe habiak hosi. Tania obeŋi adi isi itarrohojye ekyanita huno Hollum. ⁶ Iramak monyomiji heterrirryahi ewahiti hutto hwattek hosi. ⁷ Te erre daŋ itahutak jyo laati etamijani on oyyu te egyama hoi. Ittiyenie eram Hollum ta ataji on olibo iko ta nelahode. ⁸ Ittiyenie to ofyoro hun obeŋi aati oremehini ŋalafari, tania iloriri adi leŋuŋunitanani nyo obeŋ obo eram an oremehiniere inyi itisyahiniere iye. ⁹ Isiŋye apiti hotoniŋyehe eleittaha hosi te erre daŋ itamunori isi. Iramak isi hotobyaŋahi itarisai, ¹⁰ bwo fe hotobyaŋahi ohoholye kuyya inyobye. Ijara ehanita hosi daŋ itakwace eram ono Hollum Etalahani hohoi. ¹¹ Nyo oleyo nya amehino ono Hollum an iyaŋuno’to etalahuna jyo aati daŋ, ¹² ittiyeniere hohoi ibusaniere emanyiti hun orrohoji iko ewahiti huno afau daŋ. Oŋida hohoi emanya ta abijon tajya iko ta alibori itamunori Hollum oŋitek daŋ. ¹³ Erra hohoi bwo fe eyihi ta amuno jo ottu adi Hollum hohoi al agalik’to iko akwatan on obolo, inyi Etalahani Yesu Kristo. ¹⁴ Nyo isyo nya inyi ahwan honyi tohohoi italahuniere hohoi t’eyyata daŋ bwo fe italiboryere laati irari ahulonyi hama, hul igyamai on oyyu te efiriwa. ¹⁵ Ittiyenie erre hunia bwo fe isiŋye laati ta agolon. Hobyaŋa obo atulo omyana iye.