¹ Ani Paulo, apit olo Hollum bwo fe lefahata olo Yesu Kristo ilwahyere neruk ono onyimot hulo Hollum, bwo fe ittiyeniere jihosi nelahode an iyaŋuno’to amijana Hollum, ² iko nesu on osyo fur inya ocorok Hollum beryen hobeŋi oyyeuni afau bwo fe ittallik inyi gesemi. ³ To obo oloŋ inya onyimu Hollum italeyehi inyi ani neram honyi ittiyeniere jyo aati nyo inyi Hollum Etalahani hohoi. ⁴ Efak ni awaraga ana jihoi Tito lonyi hoŋ ahode ta neruk abotye. Ijara amehino iko nelik taji on ottu’to jyo Hollum Monye bwo Yesu Kristo Etalahani hohoi hatawana jihoi. ⁵ Te eram ana abusak ni iye ifau Kreto jo oŋida iye ituhok egyama an arasa’to bwo onyimu eleittaha klesya imisihi daŋ, ihwa eramak nya ni iye. ⁶ Oŋida lya al inyimu iye adaha ta abyaŋan ipali bwo owon iko aŋotte abotye hama iko aduri honyi hul iruhi bwo obeŋi omesye kuyya bu icaforoi. ⁷ Nyo oŋida eleittok klesya adaha ta abyaŋan ipali ihwa egyamani Hollum, oŋida inyi obeŋ itadara, obeŋ ijorya kwak, obeŋ amata abalu, obeŋ abahyo laati asai, obeŋ adaya agurusi. ⁸ ati oŋida inyi olwahyo atamonok, bwo omuno erre hun oyiji. Oŋida inyi ara atulo ol obi taji, ol obisi ehanita honyi, ol olibo bwo al irrirrya ewahiti hutto hwan honyi. ⁹ Oŋida inyi ogolik jyo ekyana ono nelahode ihwa ittiyenu nya inyi, tania te ettiyenita honyi hun obisi oremik inyi ittittoyo bwo fe itarraŋ jyo hul arai’to amyorok hulo Hollum. ¹⁰ Nyo owoni lamyosok iko hul ikyanai asai bwo lenyabak arryai, bwo fe ihiji hosi olwaji laati hul iruhi aŋoto ¹¹ Tania oŋida etuhe hosi itihoni, nyo itarrohoji isi aati arryai ittiyeniere erre hun orrohoji’to te ewahiti gurusi. ¹² Owon nya obo olosi al ara ekyanani hosi al ikyana ojo, Arai laati hulo afau Kreto agesomok oŋitek daŋ, arai isi ihwa acaŋi hun orrohoji’to bwo aŋarujok hul iboyoji’to. ¹³ Ara ekyana ana ahode ahode. Tania isiŋye isi bebe ta agolon nyo oŋida isi ogolihini ta neruk hosi. ¹⁴ Hotobyaŋahi isi itaniŋye eyabita asai huno Yudea, iko efahita wati hul iloiti to nelahode addi. ¹⁵ Jyo laati hul olibori’to, olibori erre daŋ. Ati jyo lebwatak iko hul obeŋi iruhi, iboti erre daŋ nyo iboti egigilita hosi bwo fe atajya hosi. ¹⁶ Ilyeti isi te etuhe hosi jo emijak isi Hollum, ati te ehanita hosi ihari isi inyi, nyo ifuti isi iko erre hun iboti’to iko amesyo. Tania ittallihi isi aŋoto. Ara ana efahi ninya isyo Hollum jyo Abramo jo oŋida isi obosye lonyirok hosi. igyama obo egyama on oyyu’to.